سفر أيوب - الأصحاح 23 | Hebrew Old Testament (Tanach)

  • 1. ויען איוב ויאמר׃
  • 2. גם־היום מרי שׂחי ידי כבדה על־אנחתי׃
  • 3. מי־יתן ידעתי ואמצאהו אבוא עד־תכונתו׃
  • 4. אערכה לפניו משׁפט ופי אמלא תוכחות׃
  • 5. אדעה מלים יענני ואבינה מה־יאמר לי׃
  • 6. הברב־כח יריב עמדי לא אך־הוא ישׂם בי׃
  • 7. שׁם ישׁר נוכח עמו ואפלטה לנצח משׁפטי׃
  • 8. הן קדם אהלך ואיננו ואחור ולא־אבין לו׃
  • 9. שׂמאול בעשׂתו ולא־אחז יעטף ימין ולא אראה׃
  • 10. כי־ידע דרך עמדי בחנני כזהב אצא׃
  • 11. באשׁרו אחזה רגלי דרכו שׁמרתי ולא־אט׃
  • 12. מצות שׂפתיו ולא אמישׁ מחקי צפנתי אמרי־פיו׃
  • 13. והוא באחד ומי ישׁיבנו ונפשׁו אותה ויעשׂ׃
  • 14. כי ישׁלים חקי וכהנה רבות עמו׃
  • 15. על־כן מפניו אבהל אתבונן ואפחד ממנו׃
  • 16. ואל הרך לבי ושׁדי הבהילני׃
  • 17. כי־לא נצמתי מפני־חשׁך ומפני כסה־אפל׃
أسفار الكتاب المقدس
أعلى