سفر أيوب - الأصحاح 2 | Hebrew Old Testament (Tanach)

  • 1. ויהי היום ויבאו בני האלהים להתיצב על־יהוה ויבוא גם־השׂטן בתכם להתיצב על־יהוה׃
  • 2. ויאמר יהוה אל־השׂטן אי מזה תבא ויען השׂטן את־יהוה ויאמר משׁט בארץ ומהתהלך בה׃
  • 3. ויאמר יהוה אל־השׂטן השׂמת לבך אל־עבדי איוב כי אין כמהו בארץ אישׁ תם וישׁר ירא אלהים וסר מרע ועדנו מחזיק בתמתו ותסיתני בו לבלעו חנם׃
  • 4. ויען השׂטן את־יהוה ויאמר עור בעד־עור וכל אשׁר לאישׁ יתן בעד נפשׁו׃
  • 5. אולם שׁלח־נא ידך וגע אל־עצמו ואל־בשׂרו אם־לא אל־פניך יברכך׃
  • 6. ויאמר יהוה אל־השׂטן הנו בידך אך את־נפשׁו שׁמר׃
  • 7. ויצא השׂטן מאת פני יהוה ויך את־איוב בשׁחין רע מכף רגלו עד קדקדו׃
  • 8. ויקח־לו חרשׂ להתגרד בו והוא ישׁב בתוך־האפר׃
  • 9. ותאמר לו אשׁתו עדך מחזיק בתמתך ברך אלהים ומת׃
  • 10. ויאמר אליה כדבר אחת הנבלות תדברי גם את־הטוב נקבל מאת האלהים ואת־הרע לא נקבל בכל־זאת לא־חטא איוב בשׂפתיו׃
  • 11. וישׁמעו שׁלשׁת רעי איוב את כל־הרעה הזאת הבאה עליו ויבאו אישׁ ממקמו אליפז התימני ובלדד השׁוחי וצופר הנעמתי ויועדו יחדו לבוא לנוד־לו ולנחמו׃
  • 12. וישׂאו את־עיניהם מרחוק ולא הכירהו וישׂאו קולם ויבכו ויקרעו אישׁ מעלו ויזרקו עפר על־ראשׁיהם השׁמימה׃
  • 13. וישׁבו אתו לארץ שׁבעת ימים ושׁבעת לילות ואין־דבר אליו דבר כי ראו כי־גדל הכאב מאד׃
أسفار الكتاب المقدس
أعلى