سفر أيوب - الأصحاح 35 | Hebrew Old Testament (Tanach)

  • 1. ויען אליהו ויאמר׃
  • 2. הזאת חשׁבת למשׁפט אמרת צדקי מאל׃
  • 3. כי־תאמר מה־יסכן־לך מה־אעיל מחטאתי׃
  • 4. אני אשׁיבך מלין ואת־רעיך עמך׃
  • 5. הבט שׁמים וראה ושׁור שׁחקים גבהו ממך׃
  • 6. אם־חטאת מה־תפעל־בו ורבו פשׁעיך מה־תעשׂה־לו׃
  • 7. אם־צדקת מה־תתן־לו או מה־מידך יקח׃
  • 8. לאישׁ־כמוך רשׁעך ולבן־אדם צדקתך׃
  • 9. מרב עשׁוקים יזעיקו ישׁועו מזרוע רבים׃
  • 10. ולא־אמר איה אלוה עשׂי נתן זמרות בלילה׃
  • 11. מלפנו מבהמות ארץ ומעוף השׁמים יחכמנו׃
  • 12. שׁם יצעקו ולא יענה מפני גאון רעים׃
  • 13. אך־שׁוא לא־ישׁמע אל ושׁדי לא ישׁורנה׃
  • 14. אף כי־תאמר לא תשׁורנו דין לפניו ותחולל לו׃
  • 15. ועתה כי־אין פקד אפו ולא־ידע בפשׁ מאד׃
  • 16. ואיוב הבל יפצה־פיהו בבלי־דעת מלין יכבר׃
أسفار الكتاب المقدس
أعلى