سفر الجامعة - الأصحاح 12 | Hebrew Old Testament (Tanach)

  • 1. וזכר את־בוראיך בימי בחורתיך עד אשׁר לא־יבאו ימי הרעה והגיעו שׁנים אשׁר תאמר אין־לי בהם חפץ׃
  • 2. עד אשׁר לא־תחשׁך השׁמשׁ והאור והירח והכוכבים ושׁבו העבים אחר הגשׁם׃
  • 3. ביום שׁיזעו שׁמרי הבית והתעותו אנשׁי החיל ובטלו הטחנות כי מעטו וחשׁכו הראות בארבות׃
  • 4. וסגרו דלתים בשׁוק בשׁפל קול הטחנה ויקום לקול הצפור וישׁחו כל־בנות השׁיר׃
  • 5. גם מגבה יראו וחתחתים בדרך וינאץ השׁקד ויסתבל החגב ותפר האביונה כי־הלך האדם אל־בית עולמו וסבבו בשׁוק הספדים׃
  • 6. עד אשׁר לא־ירחק חבל הכסף ותרץ גלת הזהב ותשׁבר כד על־המבוע ונרץ הגלגל אל־הבור׃
  • 7. וישׁב העפר על־הארץ כשׁהיה והרוח תשׁוב אל־האלהים אשׁר נתנה׃
  • 8. הבל הבלים אמר הקוהלת הכל הבל׃
  • 9. ויתר שׁהיה קהלת חכם עוד למד־דעת את־העם ואזן וחקר תקן משׁלים הרבה׃
  • 10. בקשׁ קהלת למצא דברי־חפץ וכתוב ישׁר דברי אמת׃
  • 11. דברי חכמים כדרבנות וכמשׂמרות נטועים בעלי אספות נתנו מרעה אחד׃
  • 12. ויתר מהמה בני הזהר עשׂות ספרים הרבה אין קץ ולהג הרבה יגעת בשׂר׃
  • 13. סוף דבר הכל נשׁמע את־האלהים ירא ואת־מצותיו שׁמור כי־זה כל־האדם׃
  • 14. כי את־כל־מעשׂה האלהים יבא במשׁפט על כל־נעלם אם־טוב ואם־רע׃
أسفار الكتاب المقدس
أعلى