سفر الجامعة - الأصحاح 8 | Hebrew Old Testament (Tanach)

  • 1. מי כהחכם ומי יודע פשׁר דבר חכמת אדם תאיר פניו ועז פניו ישׁנא׃
  • 2. אני פי־מלך שׁמור ועל דברת שׁבועת אלהים׃
  • 3. אל־תבהל מפניו תלך אל־תעמד בדבר רע כי כל־אשׁר יחפץ יעשׂה׃
  • 4. באשׁר דבר־מלך שׁלטון ומי יאמר־לו מה־תעשׂה׃
  • 5. שׁומר מצוה לא ידע דבר רע ועת ומשׁפט ידע לב חכם׃
  • 6. כי לכל־חפץ ישׁ עת ומשׁפט כי־רעת האדם רבה עליו׃
  • 7. כי־איננו ידע מה־שׁיהיה כי כאשׁר יהיה מי יגיד לו׃
  • 8. אין אדם שׁליט ברוח לכלוא את־הרוח ואין שׁלטון ביום המות ואין משׁלחת במלחמה ולא־ימלט רשׁע את־בעליו׃
  • 9. את־כל־זה ראיתי ונתון את־לבי לכל־מעשׂה אשׁר נעשׂה תחת השׁמשׁ עת אשׁר שׁלט האדם באדם לרע לו׃
  • 10. ובכן ראיתי רשׁעים קברים ובאו וממקום קדושׁ יהלכו וישׁתכחו בעיר אשׁר כן־עשׂו גם־זה הבל׃
  • 11. אשׁר אין־נעשׂה פתגם מעשׂה הרעה מהרה על־כן מלא לב בני־האדם בהם לעשׂות רע׃
  • 12. אשׁר חטא עשׂה רע מאת ומאריך לו כי גם־יודע אני אשׁר יהיה־טוב ליראי האלהים אשׁר ייראו מלפניו׃
  • 13. וטוב לא־יהיה לרשׁע ולא־יאריך ימים כצל אשׁר איננו ירא מלפני אלהים׃
  • 14. ישׁ־הבל אשׁר נעשׂה על־הארץ אשׁר ישׁ צדיקים אשׁר מגיע אלהם כמעשׂה הרשׁעים וישׁ רשׁעים שׁמגיע אלהם כמעשׂה הצדיקים אמרתי שׁגם־זה הבל׃
  • 15. ושׁבחתי אני את־השׂמחה אשׁר אין־טוב לאדם תחת השׁמשׁ כי אם־לאכול ולשׁתות ולשׂמוח והוא ילונו בעמלו ימי חייו אשׁר־נתן־לו האלהים תחת השׁמשׁ׃
  • 16. כאשׁר נתתי את־לבי לדעת חכמה ולראות את־הענין אשׁר נעשׂה על־הארץ כי גם ביום ובלילה שׁנה בעיניו איננו ראה׃
  • 17. וראיתי את־כל־מעשׂה האלהים כי לא יוכל האדם למצוא את־המעשׂה אשׁר נעשׂה תחת־השׁמשׁ בשׁל אשׁר יעמל האדם לבקשׁ ולא ימצא וגם אם־יאמר החכם לדעת לא יוכל למצא׃
أسفار الكتاب المقدس
أعلى