لكل البنات والعرايس الجداد _ دوره تعليم الطبخ واحده واحده لتعليم الأكلات الأساسية..!!

[ABOTARBO]

الملوخية الناشفه

الملوخية الناشفه

طبعا مفيش مقدير معينة بس ححاول اعمل مقادير
المقادير
فص ثوم متوسط مفروم
2 طماطم متوسط مبشور او مضروبة فى الخلاط
معلقة كزبرة نشفة كبيرة
معلقة سمن او قطعة زبدة حسب الرغبة
شوربة وياريت تكون دسمة
ملوخية نشفة
الطريقة
طبعا حنجيب الحلة الحنعمل فيها ونحط الثوم والكزبرة والسمن او ذبد ونحطهم على النار واول متصفر الثومة متخلهاش تغمق نحط الطماطم وتسمعى الطششششش
وبعد كدة تحطى الشوربة على طول متسبكيش الطماطم وسيبى الشربة تغلى كويس على النار
يعنى تغلى 2 دقيقة وبعدين تحطى الملوخية وطبعاً
توزنى متخلهاش تخينة ولا خفيفة دى بالنظر ويادوب تفور زى القهوة وتنزليها من على النار
+ على فكرة الملوخية مش مستحب انها تغلى على النار لانها بتسقط وطعمها بيتغير وحتى لما تسخنيها متغلهاش
​

 

[ABOTARBO]

اهم توابل بنستعملها فى البيت

الفلفل والكمون مهمين جدا ياريت نشتريهم حب ونطحنهم فى البيت بيبقوا تحفه
الكسبره الناشفه بتبقى حلوه اوى على الاكل
الكارى بنعمل بيه رز او فراخ او اى حاجه تانيه
الشطه وطبعا مهمه فى اى بيت
الورق اللورى بيتحط على الشوربه او الاكل زى الفراخ واللحمه وغيره
الحبهان طبعا مهم جدا مع الاكل
توابل الكبسه بتخلى رز الكبسه حلو اوى ولونه بنى
توابل اللحمه والفراخ بنستعملهم مع اللحمه والفراخ المشويين واحنا بنتبلهم
توابل الكفته حلوه اوى مع الكفته المشويه
القرفه بنستعملها على بعض الاكلات
الزعتر وطبعا بنستعمله مع الاكل والحاجات المشويه


copy
​

 

[ABOTARBO]

شاورما اللحم المفروم :

شاورما اللحم المفروم :

وصفه سهله وبسيطه وكمان موفره جدا

المقادير

لحمه مفرومه
بصلايه مبشوره
توابل ملح وفلفل وكمون
بصلايه مقطعه شرائح
فلفل اخضر مقطع

الطريقه

بنضرب اللحمه المفرومه فى الكبه وعليها البصله المبشوره والتوابل
بعد مانطلعها من الكبه بنعملها اقراص وندخلها الفريزر تجمد وبعدين بنحمرها
بعد مانحمرها بنقطعها شرائح وبنجيب طاسه فيها سمنه ونشوح البصلايه الجوانح كويس والفلفل الاخضر وبعدين ننزل باللحمه ونقلبها ونسيبها شويه على نار هاديه ونحط التوابل

وبالهنا والشفا
​

 

[ABOTARBO]

كفتة الفراخ

كفتة الفراخ

سهله اوى وكمان لذيذه جدا والاطفال والكبار بيحبوها وكتير مننا ميعرفوش الطريقه بتاعتها
الطريقة
بنجيب قطعه من الفراخ المسلوقه على حسب الكميه ال انتى عايزه تعمليها وبنفرمها فى الكبه
ونحط عليها بططسايه مسلوقه ونفرمها
وكمان بيضه نايه والبهارات وبرضو نفرمها
وبعد كده نحط شويه بقسماط شويه بشويه لحد ماتتماسك مع بعضها

وبعد ما تخلص ناخدها ونصبعها ونرشها بالبقسماط ونحطها على طبق
وبعدين نحمرها وبس كده
بتبقى تحفـــــــــه

بنعمل جمبها رز ابيض او مكرونه عاديه او مكرونه بالباشميل

وممكن كمان نعمل كميه ونخزنها فى الفريزر لحد ما نحب نستعملها مش بيجرى ليها اى حاجه
​

 

[ABOTARBO]

الفراخ بالبخار

الفراخ بالبخار

طريقتها سهله اوى وكمان بتبقى طعمه مووووووووت

الطريقه

نجيب الفرخه ونغسلها كويس ونقطعها 7 قطع كويس كده
ونجيب بصلايه كبيره او اتنين ونبشرهم ونحط عليهم التوابل الملح والفلفل والكمون ونقلبهم كويس
نجيب الفرخه ونحشيها بين اللحم والجلد البصل المتبل
ونحطها فى حله بس تكون مقلوبه يعنى الجلد لتحت واللحم لفوق ماشى كده
ونحط عليها كوبايه مايه وقالب فاين فودز والبهارات ونحطها على النار ولما تغلى نهدى عليها
وهى هتستوى منها فيها على نار هاديه
ولما تستوى نشبلها ونحمرها فى السمنه

بيبقى طعمها حلو اوى
​

 

[ABOTARBO]

الكبد و القوانص "طيور"

الكبد و القوانص "طيور"

:download:
بجيب الكبد والقوانص واقطعهم صغير وبعدين اجيب طاسه واحط شويه زيت واحمر بصلايه مقطعه محترمه كده معاها فلفل اخضر مقطع واشوحهم شويه
ويعدين انزل بالكبد والقوانص ويعدين اقطع عليهم طمطمايه وطبعا احط التوابل ملح وفلفل
وازود ربع كوبايه مايه واسيبها اول ماتغلى اهدى خالص واسيبها تستوى
بيبقى طعمها جامد وحلو اوى

​

 

[ABOTARBO]

الفاصوليا الخضراء

الفاصوليا الخضراء

طبعا معظمنا بيحبها وكمان طريقها سهله

الاول هنقطع الفاصوليا بالشكل ده

كمان أحب اقطعها بالطول كمان يعنى بتبقى رفيعه خالص

وبعدين اجيب بصله اقطعها جوانح يعنى شرايح رفيعه واحمرها فى السمنه وانزل عليها بالثوم المفروم كمان يتحمر وبعدين انزل بالفاصوليا واقلبهم كويس على النار

واروح نازله عليهم بعصير الطماطم والبهارات وكسبره ناشفه واسيبهم يغلوا شويه مع بعض
وبعدين انزل عليها بالشوربه واسيبها تستوى على نار هاديه

الطريقه دى بتخلى طعمها حلو اوى وكمان خفيفه وطعمه

وطبعا بنقدمها مع رز بالشعريه واللحمه

وبالهنا والشفا
​

 

[ABOTARBO]

الرقاق باللحمة المفرومة

الرقاق باللحمة المفرومة

المقادير

رقاق
لحمه مفرومه ومتعصجه
شوربه وياسلام لو شوربه بط تبقى تحفه لكن لو فيش عادى اى حاجه
سمنه او زبده

الطريقه

بنسقى الرقاق فى الشوربه بس تكون دافيه مش سخنه اوى
ونجيب صينيه وندهنها سمنه الاول بسيط وبعدين نرص الرقاق
ونيجى فى الوسط نحط اللحمه المفرومه بعدين نكمل بالرقاق المسقى فى الشوربه
وبعدين ندهن وشه بسمنه او بيض باللبن ونقطعه مربعات وبعدين ندخله الفرن على درجه 200 لحد مايستوى ويحمر

وبالهنا والشفا
​

 

[ABOTARBO]

شوربة العدس

شوربة العدس

المقادير

ربع كيلو عدس اصفر
جزر مقشر ومقطع حلقات
بصلايه مقطعه مربعات
طمطمايه مقطعه
ثوم صحيح
بصلايه مبشوره
بهارات ملح وفلفل
مكعب مرق دجاج

الطريقه

بنجيب حله فيها ميه ونغسل العدس ونحطه فيها
وعليه البصلايه والجزر والطمطايه والثوم ونسيبهم يتسلقوا كويس
بناخد الخليط ونضربه فى الخلاط ونصفيه
بنجيب حله ونحط فيها سمنه ونحمر البصلايه المبشوره وبننزل بشوربه العدس وبعدين نحط التوابل مرقه الدجاج

وممكن لو نحب نزود شعريه عادى بنحمره مع البصلايه المبشوره وبعدين ننزل بالشوربه عادى

وبالهنا والشفا
​

 

[ABOTARBO]

لقمة القاضى

لقمة القاضى

المقادير

كوب دقيق
معلقه نشا
نصف معلقه سكر
نصف ملعقه صغيره ملح
خميره
ماء

طريقه الشربات
كوبايه ونصف سكر + كوبايه ونصف مايه وندوبهم على النار واول مايغلوا نطفى ونسيبهم يبردوا

طريقه لقمه القاضى

بندوب الخميره مع السكر بشويه مايه وبعدين نضيفهم على الدقيق والملح والنشا ونزود المايه شويه بشويه لحد ماتمتزج مع بعض بس تكون سايله خالص
نسيبها تخمر وترتاح وبعد ماتخمر ناخدها وبالمعلقه كوره كوره ونقليها فى زيت سخن ولو فيه قمع يبقى كويس اوى نعمل بيه
وبعدين نشيلهم ونحطهم فى الشربات على طول ونبقى نصفيهم منه

وبالهنا والشفا
​

 

[ABOTARBO]

طاجن المكرونة باللحم المفرومة

طاجن
المكرونة باللحم المفرومة

المقادير
1/4ك لحمة مفرومة
1/2ك مكرونة قلم
1ك طماطم
2 بصلة كبيرة
2فلفل اخضر رومى كبير
ملعقة سمنة+1/4كوب زيت
ملح+فلفل اسمر + سنة بهارات + سنة كبابة صينى +كمون+شطة (حسب الرغبة)

الطريقة
1. يفرم البصل فرماً ناعماً
2. يوضع البصل وعلية شوية فلفل اسمر بدون سمنة الى ان تجف مية البصل
3. ثم يوضع الزيت والسمن والفلفل الاخضر(يدوب يدبلو)
4. ثم توضع اللحمة وعليها جوزة الطيب والبهارات والملح ونسيبها لغاية ما تغمق(ونخليها تتلسع شوية علشان تبقى ريحتها زى المشوية)
5. نحط عليها عصير الطماطم المتصفىوالكمون ونتركها حتى تتسبك تماماً
6. تسلق المكرونة وتصفى جيداًووتقلب جيداً مع الخليط السابق(ويترك جزء من الخلطة لتغطية الوجة وتوضع فى الفرن حتى يحمر وجهها.
وبالهنا والشفا
​

 

[ABOTARBO]

صنية البطاطس المحمرة باللحمة المفرومة والخضار

صنية البطاطس
المحمرة باللحمة المفرومة والخضار

المقادير
1/4ك لحمة مفرومة

1/2ك بطاطس مقطعة شرائح

حبتين طماطم كبار


خضار مشكل


2 بصلة كبيرة

2فلفل اخضر رومى كبيرلتوضع فى الصينية
2فلفل اخضر رومى كبيرللعصاج
ملف كامل بالصور لكل الاكلات باللحمة المفرومة متجدد

2 ملعقة سمنة
زيت للتحمير
ملح+فلفل اسمر + سنة بهارات + سنة كبابة صينى +شطة (حسب الرغبة)

الطريقة
· نعصج اللحمة
1. يفرم البصل فرماً ناعماً

2. يوضع البصل وعلية شوية فلفل اسمر بدون سمنة الى ان تجف مية البصل
3. ثم يوضع السمن والفلفل الاخضر(يدوب يدبلو)
4. ثم توضع اللحمة وعليها الكبابه الصينى

والبهارات والملح ونسيبها لغاية ما تغمق
(ونخليها تتلسع شوية علشان تبقى ريحتها زى المشوية)

· تحمر شرائح البطاطس فى الزيت
وتوضع علي صينية الفرن
ويحمر البصل واللحمه الي ان تحمر ويضاف اليها الخضار

توضع البهارات الفلفل والملح وتوضع 3اكواب ماء وتوضع علي النار لمدة 15 دقيقه
وتسكب علي البطاطس وتوضع علي الفرن لمدة 40 دقيقه
​

 

[sha2awet 2alam]

بغض النظر انى موت من الجوع و انا بقرا الكلام دة ... بس بجد جبااااار شجعتنى جدا انى اما افطر ادخل المطبخ و اشتغل بقا
ربنا يبارك تعبك بجد

 

[مسرة]

عندي اقتراح يا رب يعجبك
الاقتراح هو انك تجمع اسماء الاكلات كلها و ترتبها واحدة بعد الاخرى
و لما واحد بيكون يريد يقرا كذا اكلة يضغط عليها فقط و تفتح عنده مباشرة
و القرار لك ​

 

[ABOTARBO]

بغض النظر انى موت من الجوع و انا بقرا الكلام دة ... بس بجد جبااااار شجعتنى جدا انى اما افطر ادخل المطبخ و اشتغل بقا
ربنا يبارك تعبك بجد

ربنا يخليكى تاسونى
ميرسى لتشجيع حضرتك

عندي اقتراح يا رب يعجبك
الاقتراح هو انك تجمع اسماء الاكلات كلها و ترتبها واحدة بعد الاخرى
و لما واحد بيكون يريد يقرا كذا اكلة يضغط عليها فقط و تفتح عنده مباشرة
و القرار لك

حاضر من عينيا
بس افضى بس واعمل الاقتراح الحلو دة
صلواتك
​

 

[مسرة]

حاضر من عينيا
بس افضى بس واعمل الاقتراح الحلو دة
صلواتك​

على راحتك و امتى من يعجبك
الرب يباركك ​

 

[+bent el malek+]

موضوع جميل قووووووووووووى
ومجهود رائع
ربنا يبارك حياتك

 

[ABOTARBO]

​

 

[ABOTARBO]

وصفة سريعة فى العزومات ليكى يا عروسة

لعمل بودنج فاكهه اعملى اى فاكهة بتحبيها عصير مع اضافة لبن للعصير وظبطى السكر فى العصير حسب ذوقك فى الطعم وبعدين حطى العصير فى اناء على النار ودوبى نشا "كورن فلور "فى ماء بارد ولما العصير يسخن حطى النشا وقلبى لحد ما يتكثف وبعدين حطيه فى كاسات أو أكواب او اطباق صغيرة وفوق كل كاسه حطى قطعه من نفس نوع الفاكهه اللى عملتيها وبكده تكونى عملتى بودنج طبيعى فى البيت ,ممكن تعملى نفس الطريقة بكاكاو او فانيليا​

 

[ABOTARBO]

افكار للفطاااااااار

[ أسياخ الجبن المشويه ] ​

نجيب اي نوع جبنه بيضه بيكون عندك فالبيت + فلفل بارد ملون ​

نقطع الجبنه مكعبات + الفلفل ​

وندخلها اصياخ بالدور .. ثم نحطها ع الشوايه بدون زيت ​

​

نقلبها حتى تنشوي جميع الجهات ..​

​

وبعدين نعمل الشاي وزي مهو بيحبه بلبن او ساده او فيه ناس بتحب العصير مع الفطار وقدميه مع التوست لو عندك وممكن تدخلي التوست شويه فالفرن العادي على صينيه كده علشان يتحمص بيبقى تحفه او لو عندك ميكرويف اسرع او الفرن الا بالكهرباء وكمان حطي جنبهم مربى وممكن قطعة زبده مكعبه صغيره يعني انتي وزوقك بقى وقدميه بطريقه لذيذه وبسيطه ​

​

​

الفكرة التانيه :-​

البيض على الفطور بس بشكل مختلف :-​

بيض + بقدونس + بصل + ثوم + طماط + فلفل بارد [ بصل اخضر ] حسب الرغبه ​

نقطع البصل ونحمسه بالزيت ثم نضيف الثوم المهروس .. ثم الطماط والفلفل البارد بعد التقطيع وباقي الخضار .. ​

​

نصبها بصينيه بعد دهنها بالزيت و ندخلها الفرن بعد رشها بالجبن .. ​

بالقلايه اسرع ونغطيها بغطى قدر .. ​

​

بعد ماتتحمر من تحت نقدمها .. ​

​

مع رشة بقدونس مفروم وبطاطس وخبز محمص .. ​

​