Daniel - Chapter 4 | Latin Vulgate (Vulgate)

  • 1. {cf2 (3:98)} Nabuchodonosor rex omnibus populis gentibus et linguis quae habitant in universa terra pax vobis multiplicetur
  • 2. {cf2 (3:99)} signa et mirabilia fecit apud me Deus excelsus placuit ergo mihi praedicare
  • 3. {cf2 (3:100)} signa eius quia magna sunt et mirabilia eius quia fortia et regnum eius regnum sempiternum et potestas eius in generationem et generationem
  • 4. {cf2 (4:1)} ego Nabuchodonosor quietus eram in domo mea et florens in palatio meo
  • 5. {cf2 (4:2)} somnium vidi quod perterruit me et cogitationes meae in stratu meo et visiones capitis mei conturbaverunt me
  • 6. {cf2 (4:3)} et per me propositum est decretum ut introducerentur in conspectu meo cuncti sapientes Babylonis et ut solutionem somnii indicarent mihi
  • 7. {cf2 (4:4)} tunc ingrediebantur arioli magi Chaldei et aruspices et somnium narravi in conspectu eorum et solutionem eius non indicaverunt mihi
  • 8. {cf2 (4:5)} donec collega ingressus est in conspectu meo Danihel cuius nomen Balthasar secundum nomen dei mei qui habet spiritum deorum sanctorum in semet ipso et somnium coram eo locutus sum
  • 9. {cf2 (4:6)} Balthasar princeps ariolorum quem ego scio quod spiritum deorum sanctorum habeas in te et omne sacramentum non est inpossibile tibi visiones somniorum meorum quas vidi et solutionem eorum narra
  • 10. {cf2 (4:7)} visio capitis mei in cubili meo videbam et ecce arbor in medio terrae et altitudo eius nimia
  • 11. {cf2 (4:8)} magna arbor et fortis et proceritas eius contingens caelum aspectus illius erat usque ad terminos universae terrae
  • 12. {cf2 (4:9)} folia eius pulcherrima et fructus eius nimius et esca universorum in ea subter eam habitabant animalia et bestiae et in ramis eius conversabantur volucres caeli et ex ea vescebatur omnis caro
  • 13. {cf2 (4:10)} videbam in visione capitis mei super stratum meum et ecce vigil et sanctus de caelo descendit
  • 14. {cf2 (4:11)} clamavit fortiter et sic ait succidite arborem et praecidite ramos eius excutite folia eius et dispergite fructum eius fugiant bestiae quae subter eam sunt et volucres de ramis eius
  • 15. {cf2 (4:12)} verumtamen germen radicum eius in terra sinite et alligetur vinculo ferreo et aereo in herbis quae foris sunt et rore caeli tinguatur et cum feris pars eius in herba terrae
  • 16. {cf2 (4:13)} cor eius ab humano commutetur et cor ferae detur ei et septem tempora mutentur super eum
  • 17. {cf2 (4:14)} in sententia vigilum decretum est et sermo sanctorum et petitio donec cognoscant viventes quoniam dominatur Excelsus in regno hominum et cuicumque voluerit dabit illud et humillimum hominem constituet super eo
  • 18. {cf2 (4:15)} hoc somnium vidi ego rex Nabuchodonosor tu ergo Balthasar interpretationem narra festinus quia omnes sapientes regni mei non queunt solutionem edicere mihi tu autem potes quia spiritus deorum sanctorum in te est
  • 19. {cf2 (4:16)} tunc Danihel cuius nomen Balthasar coepit intra semet ipsum tacitus cogitare quasi hora una et cogitationes eius conturbabant eum respondens autem rex ait Balthasar somnium et interpretatio eius non conturbent te respondit Balthasar et dixit domine mi somnium his qui te oderunt et interpretatio eius hostibus tuis sit
  • 20. {cf2 (4:17)} arborem quam vidisti sublimem atque robustam cuius altitudo pertingit ad caelum et aspectus illius in omnem terram
  • 21. {cf2 (4:18)} et rami eius pulcherrimi et fructus eius nimius et esca omnium in ea subter eam habitantes bestiae agri et in ramis eius commorantes aves caeli
  • 22. {cf2 (4:19)} tu es rex qui magnificatus es et invaluisti et magnitudo tua crevit et pervenit usque ad caelum et potestas tua in terminos universae terrae
  • 23. {cf2 (4:20)} quod autem vidit rex vigilem et sanctum descendere de caelo et dicere succidite arborem et dissipate illam attamen germen radicum eius in terra dimittite et vinciatur ferro et aere in herbis foris et rore caeli conspergatur et cum feris sit pabulum eius donec septem tempora commutentur super eum
  • 24. {cf2 (4:21)} haec est interpretatio sententiae Altissimi quae pervenit super dominum meum regem
  • 25. {cf2 (4:22)} eicient te ab hominibus et cum bestiis feris erit habitatio tua et faenum ut bos comedes et rore caeli infunderis septem quoque tempora mutabuntur super te donec scias quod dominetur Excelsus super regnum hominum et cuicumque voluerit det illud
  • 26. {cf2 (4:23)} quod autem praecepit ut relinqueretur germen radicum eius id est arboris regnum tuum tibi manebit postquam cognoveris potestatem esse caelestem
  • 27. {cf2 (4:24)} quam ob rem rex consilium meum placeat tibi et peccata tua elemosynis redime et iniquitates tuas misericordiis pauperum forsitan ignoscat delictis tuis
  • 28. {cf2 (4:25)} omnia venerunt super Nabuchodonosor regem
  • 29. {cf2 (4:26)} post finem mensuum duodecim in aula Babylonis deambulabat
  • 30. {cf2 (4:27)} responditque rex et ait nonne haec est Babylon magna quam ego aedificavi in domum regni in robore fortitudinis meae et in gloria decoris mei
  • 31. {cf2 (4:28)} cum adhuc sermo esset in ore regis vox de caelo ruit tibi dicitur Nabuchodonosor rex regnum transiit a te
  • 32. {cf2 (4:29)} et ab hominibus te eicient et cum bestiis feris erit habitatio tua faenum quasi bos comedes et septem tempora mutabuntur super te donec scias quod dominetur Excelsus in regno hominum et cuicumque voluerit det illud
  • 33. {cf2 (4:30)} eadem hora sermo conpletus est super Nabuchodonosor ex hominibus abiectus est et faenum ut bos comedit et rore caeli corpus eius infectum est donec capilli eius in similitudinem aquilarum crescerent et ungues eius quasi avium
  • 34. {cf2 (4:31)} igitur post finem dierum ego Nabuchodonosor oculos meos ad caelum levavi et sensus meus redditus est mihi et Altissimo benedixi et viventem in sempiternum laudavi et glorificavi quia potestas eius potestas sempiterna et regnum eius in generationem et generationem
  • 35. {cf2 (4:32)} et omnes habitatores terrae apud eum in nihilum reputati sunt iuxta voluntatem enim suam facit tam in virtutibus caeli quam in habitatoribus terrae et non est qui resistat manui eius et dicat ei quare fecisti
  • 36. {cf2 (4:33)} in ipso tempore sensus meus reversus est ad me et ad honorem regni mei decoremque perveni et figura mea reversa est ad me et optimates mei et magistratus mei requisierunt me et in regno meo constitutus sum et magnificentia amplior addita est mihi
  • 37. {cf2 (4:34)} nunc igitur ego Nabuchodonosor laudo et magnifico et glorifico Regem caeli quia omnia opera eius vera et viae eius iudicia et gradientes in superbia potest humiliare
أعلى