تم تعطيل الجافا سكربت. للحصول على تجربة أفضل، الرجاء تمكين الجافا سكربت في المتصفح الخاص بك قبل المتابعة.

سفر مراثي إرميا - الأصحاح 5 | Hebrew Old Testament (Tanach)

1. זכר יהוה מה־היה לנו הביט וראה את־חרפתנו׃
2. נחלתנו נהפכה לזרים בתינו לנכרים׃
3. יתומים היינו אין אב אמתינו כאלמנות׃
4. מימינו בכסף שׁתינו עצינו במחיר יבאו׃
5. על צוארנו נרדפנו יגענו לא הונח־לנו׃
6. מצרים נתנו יד אשׁור לשׂבע לחם׃
7. אבתינו חטאו אינם אנחנו עונתיהם סבלנו׃
8. עבדים משׁלו בנו פרק אין מידם׃
9. בנפשׁנו נביא לחמנו מפני חרב המדבר׃
10. עורנו כתנור נכמרו מפני זלעפות רעב׃
11. נשׁים בציון ענו בתלת בערי יהודה׃
12. שׂרים בידם נתלו פני זקנים לא נהדרו׃
13. בחורים טחון נשׂאו ונערים בעץ כשׁלו׃
14. זקנים משׁער שׁבתו בחורים מנגינתם׃
15. שׁבת משׂושׂ לבנו נהפך לאבל מחלנו׃
16. נפלה עטרת ראשׁנו אוי־נא לנו כי חטאנו׃
17. על־זה היה דוה לבנו על־אלה חשׁכו עינינו׃
18. על הר־ציון שׁשׁמם שׁועלים הלכו־בו׃
19. אתה יהוה לעולם תשׁב כסאך לדר ודור׃
20. למה לנצח תשׁכחנו תעזבנו לארך ימים׃
21. השׁיבנו יהוה אליך ונשׁוב חדשׁ ימינו כקדם׃
22. כי אם־מאס מאסתנו קצפת עלינו עד־מאד׃

أعلى