سفر هوشع - الأصحاح 4 | Hebrew Old Testament (Tanach)

  • 1. שׁמעו דבר־יהוה בני ישׂראל כי ריב ליהוה עם־יושׁבי הארץ כי אין־אמת ואין־חסד ואין־דעת אלהים בארץ׃
  • 2. אלה וכחשׁ ורצח וגנב ונאף פרצו ודמים בדמים נגעו׃
  • 3. על־כן תאבל הארץ ואמלל כל־יושׁב בה בחית השׂדה ובעוף השׁמים וגם־דגי הים יאספו׃
  • 4. אך אישׁ אל־ירב ואל־יוכח אישׁ ועמך כמריבי כהן׃
  • 5. וכשׁלת היום וכשׁל גם־נביא עמך לילה ודמיתי אמך׃
  • 6. נדמו עמי מבלי הדעת כי־אתה הדעת מאסת ואמאסאך מכהן לי ותשׁכח תורת אלהיך אשׁכח בניך גם־אני׃
  • 7. כרבם כן חטאו־לי כבודם בקלון אמיר׃
  • 8. חטאת עמי יאכלו ואל־עונם ישׂאו נפשׁו׃
  • 9. והיה כעם ככהן ופקדתי עליו דרכיו ומעלליו אשׁיב לו׃
  • 10. ואכלו ולא ישׂבעו הזנו ולא יפרצו כי־את־יהוה עזבו לשׁמר׃
  • 11. זנות ויין ותירושׁ יקח־לב׃
  • 12. עמי בעצו ישׁאל ומקלו יגיד לו כי רוח זנונים התעה ויזנו מתחת אלהיהם׃
  • 13. על־ראשׁי ההרים יזבחו ועל־הגבעות יקטרו תחת אלון ולבנה ואלה כי טוב צלה על־כן תזנינה בנותיכם וכלותיכם תנאפנה׃
  • 14. לא־אפקוד על־בנותיכם כי תזנינה ועל־כלותיכם כי תנאפנה כי־הם עם־הזנות יפרדו ועם־הקדשׁות יזבחו ועם לא־יבין ילבט׃
  • 15. אם־זנה אתה ישׂראל אל־יאשׁם יהודה ואל־תבאו הגלגל ואל־תעלו בית און ואל־תשׁבעו חי־יהוה׃
  • 16. כי כפרה סררה סרר ישׂראל עתה ירעם יהוה ככבשׂ במרחב׃
  • 17. חבור עצבים אפרים הנח־לו׃
  • 18. סר סבאם הזנה הזנו אהבו הבו קלון מגניה׃
  • 19. צרר רוח אותה בכנפיה ויבשׁו מזבחותם׃
أسفار الكتاب المقدس
أعلى