مسـافر عبـر الزمـن

خادم البتول

عضو نشيط
عضو نشيط
إنضم
13 أبريل 2012
المشاركات
1,062
مستوى التفاعل
1,031
النقاط
113
الإقامة
عابـــر سبيــــل

2524620.jpg



2013

- شوف يا دكتور: إنت تفتح صدري ح تلاقي الضلوع.
- مظبوط.
- تفتح الضلوع ح تلاقي القلب.
- صحيح.
- تفتح القلب ح تلاقي قرطاس.
- قرطااااااس؟؟؟
- أيوه قرطاس. قرطاس كبير.
- إنت بتقول إيه يا افندي قرطاس إيه؟؟
- يا دكتور اسمع بس اللي بقوله، هو قلبك وللا قلبي؟ انت ح تعرف اللي ف قلبي أكتر مني؟
- لا ودي تيجي!!
- المهم ح تلاقي إيه؟
- ح الاقي قرطاس!
- قرطاس قد إيه؟
- وبعدين بقا في الليلة دي!
- يا دكتور خليك معايا.. قرطاس قد إيه؟؟
- كبير! قرطاس كبير!
- عليك نووووور.. جوا القرطاس ده بقا فيه بقلاوة.
- إيه؟؟ بقلاوة؟؟؟؟
- بقلاوة وشوية بلح الشام......
- بقلاوة إيه يا جدع انت، انت شارب حاجة؟؟؟؟؟
- يييييه، يا عم أبوس صباع رجلك الصغير اسمع اللي بقوله من سكات أنا محبش المناهدة!
- اسمع إيه؟؟؟ عندك في القلب قرطاس بقلاوة؟؟؟
- أما شيء عجيب يا أخي هو قلبك وللا قلبي؟ أيوه قرطاس بقلاوة، أنا اللي حاطه بنفسي!
- كماااااااااان؟؟ وده حطيته فين بالظبط: في الأذين الأيمن وللا في البطين الأيسر؟؟
- الصبر من عندك يارب! يا جدعان شوفولنا دكتور تاني ده باين عليه خـُلل!
- أنا اللي خـُلل يا مجنون يا قرداتي؟ إنت فعلا مش محتاج دكتور قلب إنت محتاج دكتور مخ.
- يا جدع انت ح تجنني؟؟؟ اترزع اقعد على حيلك أنا لسه مخلصتش كلامي...
- يا محمووووود، يا عاااااااااااادل: تعالو ارموا الافندي ده بررره.....



2113
يعود المسافر عبر الزمن من حيث جاء، بعد مائة عام من هذه الأحداث، وهو القرن الذي اكتشف خلاله الإنسان طاقة المشاعر واستطاع قياسها وحتى رؤيتها بمناظير خاصة، ثم استطاع بعد ذلك عبر قوة العقل وباستخدام الخيال تشكيلها أيضا في أي شكل يريد، مع حفظها في أي مكان يريد.


- شوف يا دكتور: إنت تفتح صدري ح تلاقي الضلوع.
- مظبوط.
- تفتح الضلوع ح تلاقي القلب.
- صحيح.
- تفتح القلب ح تلاقي قرطاس.
- هاهاهاها.. ظريف إنك تستخدم شكل القرطاس بالذات! عادة الناس بتحط علب مجوهرات، مش قراطيس.. هاهاهاها باين عليك ابن نكتة ودمك خفيف!
- ميرسي ده بس من ذوقك يا دكتور.. المهم القرطاس ده فيه بقلاوة.
- بقلاوة؟؟ سيدي ياسيدي ع الحلويات! دول يبقوا بنات أكيد! باين عليك شقي!
- لا دول اخواتي... بس هم فعلا بحلاوة البقلاوة وهي طالعة سخنة كده وبتنز شربات.. مالقيتش حاجة أحلى من كده.. فيهم واحدة بس خليتها حرنكش، لأنها بتحبه، بس دي كمان مستوية ومعسّـلة أوي.
- هاهاهاها، ومين الحرنكش بقا؟
- دي اسمها حبو، والبقلاوة خد عندك يا سيدي: اللي شقشق واللي رورو واللي روزا واللي إيملي واللي بتول واللي أمة واللي وايت واللي دونا واللي إيريني واللي هيلانه واللي تماف واللي بنت المسيح واللي لارا واللي......
- حيلك حيلك حيلك كل دول؟؟
- لا لسه كتير.. ده غير كمان شوية بلح الشام.. الولاد يعني :): اللي إتش واللي كريس واللي أيمون واللي بودي واللي أدمانتيوس واللي جيجو واللي روقه واللي چوني واللي
ـ كفاية كفايـ....
ـ لسه لسه: ....واللي بونا واللي حبيب واللي كوبتيك واللي صوت صارخ واللي كاليمو واللي
چاكس واللي أمير واللي ساد واللي عادل واللي......
- كفاية أوي كفاية :).. دا كده الكشف ح يكون كله عطور وألوان وح استمتع!
- أنا أوعدك ح تسمع كمان موسيقى أول ما توصل للقرطاس ده!
- واااو موسيقى كمان؟ للدرجة دي المحبة؟ دي تبقا حالة نادرة. :)
- المهم ماوصيكش...
- طبعا طبعا مفهوم.. دي أغلى حاجة! احنا النهارده تكوينات الطاقة دي نفسها بتساعدنا حتى أثناء العمليات: نقفل بيها أي جرح أو نوقف أي نزيف!
.............................
.............................
.............................

- إيه يا دكتور ساكت ليه؟ اتكلم معايا بصراحة.
- الحقيقة انت فعلا محتاج عملية، لكن أنا بفكر في حاجة تانية. فيه حاليا تجارب جديدة وممكن نلغي العملية خالص!
- تجارب جديدة؟ تجارب إيه؟
- تجارب Self Healing أو "الشفاء الذاتي". في حالتك دي أعتقد ممكن.. اللي كل الناس دي في قلبه يقدر يشفى ذاتيا بدون جراحة، ولو صحيح مش شايف فيهم غير حلاوة لدرجة البقلاوة، يبقا التجربة....
- والحرنكش لو سمحت.. :)
- ... لو صحيح مش شايف فيهم غير حلاوة لدرجة البقلاوة والحرنكش :) يبقا التجربة ممكن أوي تنجح، خاصة إنك بتقول اخواتك، يعني الحب بدون غرض، ودي "طاقة صافية"!
- إذن يا دكتور خلينا نبتدي.
- عبّر عن حبك. انت أكيد عارف أول قوانين الطاقة الحديثة: حب بدون تعبير...
- طاقة بدون تأثير.
- قول لكل اللي بتحبه إنك بتحبه بدون خجل.. حتى لو مش موجود اكتبله.. عبّـر له عن حبك ولو بكلمة.. عبـّر له عن تقديرك.. قوله شكرا.. قوله إنه غالي عندك.. قوله إنك ممنون لأنك عرفته.. إن وجوده عمل فرق، وأنك سعيد لأنه في حياتك.. ما تستناش المناسبة أو الفرصة لأن يمكن عمرها ما تيجي.. وما تستناش إنه يحتاج ده لأنه غالبا مش ح يقول وانت مش ح تعرف.
.............................
.............................
.............................

- أعتقد إني فاهم نظرية العلاج ده يا دكتور.. مش دي قاعدة "المجال المشترك"؟
- يااااه... تمام تمام... انت باين عليك دكتور!!
- لا لا أبدا.. أنا حلواني.. مش بقولك بقلاوة؟ :)
- هاهاها.. حلوة.. فعلا دمك خفيف.
- أصل الحب ده هو مصدر الحلويات كلها يا دوك. :)
- صحيح، وانت محبتك واضحة أهي ع المونيتور قدامي.. إنت فعلا حلواني! :)
- المهم القاعدة دي هي اللي بتقول إن الحب مجال طاقة مشترك، مظبوط؟
- مظبوط: الحب مجال طاقة واحد ومشترك، المهم إنه يدور ويتحرك، لكن مش مهم مين اللي بيحركه.
- إنما زمان بقا كان لسه عندهم حسابات الأنا والبرستيچ والكبرياء والـ.....
- لا لا لا زمان إيه يا راجل، دول كانوا متخلفين جدا!
- فعلا تخلف، مالوش اسم تاني!

- خلاص خلينا نبتدي، ونتقابل بعد أسبوع من دلوقت نعمل تيست تاني.
- أخدت من وقتك كتير ميرسي جدا يا دكتور...
- ميرسي ليك انت: شرفتني بزيارتك، وفرحتني بطاقتك، وضحكتني بقرطاسك :)
يا محمود، يا عادل: تعالو وصّـلوا البيه لو سمحتم.



* * *
 
التعديل الأخير:

R.O.R.O

اسندنى فى ضعفى
عضو مبارك
إنضم
20 يونيو 2012
المشاركات
18,394
مستوى التفاعل
4,653
النقاط
113
الإقامة
حضن يسوع
بجد موضوعك فرحنى وضحكنى واسعدنى
ان فى ناس قلبها صافى وعندها محبة لكل الناس
ميرسى ليك جدا يا خادم البتول
لكلماتك وانك زكرت اسمى من ضمن اخواتك
ربنا يديم المحبة بين كل الناس وبين اعضاء المنتدى لاننا فعلا كلنا اخوات
واحلى تقييم

 
التعديل الأخير:

إيمليــآ

نحوكـ عيّني ..♥
عضو مبارك
إنضم
21 يونيو 2012
المشاركات
3,792
مستوى التفاعل
1,128
النقاط
0
الإقامة
عآلمى آلخـآص ..~
,.

عآرف إن " خآدم آلبتول " &" آلمحبة ، وآلرغبة فى إسعآد آلآخرين " .... مربوطين دآيماً ببعض عندى
لدرجة إنى كل مآ حد يجآملنى بفتكركـ علطول هههههـ

فأول مآ أشوفلكـ مشآركة قبل مآ أقرآهآ بحضر نفسى لجرعة طآقة رسمى

كل آلنآس بتسعد بحب آلآخرين ليهآ
لكن آلنقآء وآلسلآم آلحقيقي ، هو فى سعآدة آلإنسآن بحبه للآخرين .. زيكـ كدآ :)


شكراً حقيقى خآدم على تحريكـ آلطآقة آلمشتركة
إللى حتى لو عصلجت وعطلت شوية ، هتفضل موجودهـ وهيجى شخص جميل مليآن بعمل ربنآ .. ويحركهآ :flowers:





.،
 

Desert Rose

I have a dream
عضو مبارك
إنضم
10 نوفمبر 2010
المشاركات
8,448
مستوى التفاعل
1,987
النقاط
113
موضوع جميل وراقى اوى زى صاحبه, فيه معانى جميلة ورقة ومحبة بنفتقدها كلنا , وميرسى انك افتكرتنى وحطتنى من ضمن البقلاوة او زى ما بيقولوا اليونانيين Baklava على فكرة بحبها اوى واليونانيين بالذات بيعملوها حلو جدا , انت فتحت نفسى بالطبق ده :flowers:


- إنما زمان بقا كان لسه عندهم حسابات الأنا والبرستيچ والكبرياء والـ.....
- لا لا لا زمان إيه يا راجل، دول كانوا متخلفين جدا!
- فعلا تخلف، مالوش اسم تاني!
ممكن ميكونش كبرياء او أنا , ممكن يكون حاجات تانية , زى كده طاقة طاردة متقدرش تقاوم طردها ليك

 
التعديل الأخير:

هشام المهندس

عضو مبارك
عضو مبارك
إنضم
15 مايو 2011
المشاركات
4,544
مستوى التفاعل
964
النقاط
0
الإقامة
baghdad
موضوع جميل بكلمات رقيقه
يستحق التقييم حتى لو اسمي مش مكتوب
الرب يباركك على محبتك
 

+إيرينى+

واحدة معاكم
عضو نشيط
إنضم
26 أبريل 2009
المشاركات
11,235
مستوى التفاعل
2,952
النقاط
113
يسلم إيديك

أنا فعلا مقتنعة إن طاقة الحب ديه بتعمل معجزات

 

واثقه فيك يارب

╬حبيبة البابا╬
عضو مبارك
إنضم
11 يوليو 2012
المشاركات
12,881
مستوى التفاعل
3,353
النقاط
0
الإقامة
قلــــب يســـــــوع
ده ايه الموضوع الجميل ده
وايه الفكره العبقريه دي
وايه طبق البقلاوة الرهيييييييييب ده :)

بجد شكرا ليك "خادم البتول" علي موضوعك الرائع
وكلامك الاروع وشكرا لانك ذكرت اسمي المتواضع من ضمن الاسماء الغاليه عليا .
ربنا يديم عليك نعمة المحبه للاخرين
لان للاسف بقي فيه ناس كتير مش جواها غير
الغل والحقد والكراهيه والشر لناس تانيين .

بمناسبة الغل والحقد بقي
هو طبق البقلاوة ده بالزيت ولا بالسمنة:fun_lol:
 

geegoo

عضو مبارك
عضو مبارك
إنضم
5 أبريل 2008
المشاركات
2,319
مستوى التفاعل
456
النقاط
83
شوف ياخويا البنات و كلامهم :)
مركزين ازي مع البقلاوة ... ما فيه صنف تاني ...
بلح الشام موجود و بقوة :)
من بلحة .. قصدي من جيجو الي خادم البتول :)
ربنا يفرح قلبك زي ما موضوعك فرح ناس كتير ...
 

AdmanTios

Ο Ωριγένη&
عضو مبارك
إنضم
22 سبتمبر 2011
المشاركات
2,815
مستوى التفاعل
1,566
النقاط
0
الإقامة
Jesus's Heart
في التعبير عن التقدير ........ نقول شكراً

في التصريح عن مدي الغلاوة .... نقول أغلي الغاليين

في الإفصاح عن الإمتنان ..... نقول محبتُك بالقلب للمنتهي

في الإعراب عن المحبة .... نقول ربنا يفرح قلبك دوماً أخونا
الغالي " خادم البتول " صاحب أجمل قلب صافي رائع مُحب
للكل من الأحباء بمعدن قلبك الذهبي ...... مودتي و إحترامي

" يا محمود، يا عادل: بـلغوا البيه لو سمحتم "
 
التعديل الأخير:

tamav maria

مشرف سابق
مشرف سابق
إنضم
29 يونيو 2008
المشاركات
10,315
مستوى التفاعل
2,235
النقاط
0
انا فرحانه انا طلعت من ضمن بقلاوة المنتدي


خادم البتول
حقيقي عرفت تعبر عن محبتك للمنتدي وكل اعضاءه
أمام هذه السطور
وأمام هذا الطُوفان من عمق الحب
الممتدفق في سطورك
أسجل اعجابي بموضوعك
دمت بخير... ودام قلمك الرائع في سماء الابداع
 
التعديل الأخير:

خادم البتول

عضو نشيط
عضو نشيط
إنضم
13 أبريل 2012
المشاركات
1,062
مستوى التفاعل
1,031
النقاط
113
الإقامة
عابـــر سبيــــل


صباحكم ســـكر
وريحــان وعنبـــر

أولا أشكركم وأشكر محبتكم جميعا على كل كلماتكم وتقديراتكم الغالية جدا جدا في قلبي. بمشيئة ربنا يكون لي عودة تانية للرد بتفصيل أكتر على رسايلكم، لكن أحب في الدقايق المتاحة دلوقت إني بس أعمل تأكيد سريع على أمر معين: وهو إن الأسماء المذكورة هنا أيها الأحباء هي طبعا مجرد عينة، وإن حتى الترتيب مالوش دلالة في ذاته. لو كان بإيدي كنت بالتأكيد ذكرت أسماء كتيييير جدا.. لكن طبعا كان مستحيل لأن العدد بالفعل كبير.. وعليه اخترت بس الأسماء النشطة أكتر في دائرة قراءاتي وكتاباتي حاليا، أو الأسماء اللي أصحابها بالفعل كان ليهم تأثير فـيّـا شخصيا، ولو حتى بـ "جملة واحدة" زي جيجو. أما من ناحية المحبة فهي قطعا للجميع، والبقلاوة قطعا من الجميع، و"القرطاس كبير" عمدا عشان التأكيد على المعنى ده :). أهم حاجة أحب أقولها هو النفي تماما لفكرة إن الأسماء دي هي بس اللي أنا "فاكرها".. أبدا.. وهل اقدر أنسى أم زي "كاندي شوب"؟ وهل أقدر أنسى أب زي "صوت صارخ"؟ وهل أقدر أنسى عملاق صامت زي "النهيسي"؟ وهل أقدر أنسى بطل غيور زي "فريدي"؟ وهل أقدر أنسى أساتذة وكوماندوز زي "مولكا" و"باول"؟ دول بس الأكبر ـ سنا أو مقاما ـ أيضا كعينة فقط، لكن لا يمكن تتخيلوا أيها الأحباء كم الأسماء اللي في عقلي بالفعل في اللحظة دي.. من أول عياد لحد فيبي.. أسماء حتى لأعضاء حاليا خارج نطاق الخدمة تماما! ولسه فوق كل ده: هل أقدر أنسى نجوم صاعدة ومشرقة زي "فيرونيكا" و"أنت شبعي" و"الكرمة الصغيرة" و"جوجو"؟ وهل أقدر أنسى حتى "الجيران"، خاصة لو كانوا أميرات حسناوات زي "هيفاء الهاشمي"، أو أدباء رائعين زي "جاكس"، أو فنانين مرهفين زي "أنس"؟ ده حتى "روك".. تصوروا حتى "روك" فاكره!!! :smile01


مرة وأنا جديد هنا سألت عضو قديم: أنا نفسي أعرف روك ده بيعمل إيه بالضبط في أم المنتدى وعلى إيه يعني أحمر كده وصلاحيات وهيلمان؟ صاحبنا بص شوية في السقف كده وبعدين قاللي: روك ده شغلته يغيّر أسامي الأعضاء.. اللي عايز يغيّر اسمه يروح لروك وهو يغيرهوله.

- باااااااااااااااااااااااس؟؟؟؟؟؟؟؟؟؟؟
- بس!

:smile01


...........
يستحق التقييم حتى لو اسمي مش مكتوب
..........


أولا إنت اسمك أول إسم! :)

صدقني يابن عمي لو قلتلك إنت بالذات اسمك سقط سهوا، لأني كنت عايز اكتبها "إتش" كاسم تدليل زي معظم الأسماء، وفي نفس الوقت خايف يكون اسم بعيد أوي عن "هشام" زي ما انت معروف أكتر وبالتالي الناس ماتلقطش بسرعة مين المقصود، خاصة إن فيه تدليلات تانية لهشام زي هشهش وهيشو وغيرها. يعني باختصار تركت الاسم على جنب مؤقتا لحد وقت النشر. عايز أقولك إن الأسماء دي خدت وقت غير عادي أثناء الكتابة وبعدها!

المهم، مش بس عشانك، لكن بصدق أنا كنت بالفعل خدت قرار عام، إن كل اللي يدخل ويشارك في التوبيك ده لازم ينزل اسمه (استغلالا لإمكانية "تحرير الرسائل" اللي أخيرا وبعد عام كامل حصلت عليها ^_^). ده الحقيقة كان الحل الوحيد والأخير لمسألة الأسماء، واللي بعده مباشرة قدرت أخيرا أنشر التوبيك ككل. وطبعا ده كان قرار سري، لكن خلاص بقا طالما فتحنا الموضوع. :)

أخيرا وبغض النظر عن الأسماء: طبعا، طبعا مش ناسيك أبدا إنت بالذات يا أخي الحبيب! وطبعا إنت بالتأكيد من المجموعة اللي على "وش القرطاس" (مع إن صدقني البقلاوة اللي تحت بتشرب شربات أكتر وبتبقا أحلى:))! أشكرك شكر خاص لكلماتك الرقيقة وتقييمك الثمين، وأشكر جميع الأحباء مرة تانية على كل رسايلهم ومشاركاتهم، وإلى لقاء آخر قريب، على المحبة دائما نلتقي.


* * *
 
التعديل الأخير:

حبيب يسوع

عضو مبارك
عضو مبارك
إنضم
15 مايو 2007
المشاركات
15,458
مستوى التفاعل
1,956
النقاط
0
موضوع مميز جدا والجميل فيه
كمية الحلويات البقلاوة وبلح الشام
الرب يباركك
 

Coptic4Ever2

عضو مبارك
عضو مبارك
إنضم
7 مارس 2007
المشاركات
2,003
مستوى التفاعل
634
النقاط
0
الإقامة
تحت الصليب
موضوع رائع جدا ومعانى ممتازة وحلويات بنحبها كلنا

انا كمان ممنون انى عرفتك

وتستاهل احلى تقييم

ولو ينفع تاخد تقييم دوبل تستحق

 
التعديل الأخير:

حبو اعدائكم

حبو...
عضو مبارك
إنضم
9 أكتوبر 2011
المشاركات
14,191
مستوى التفاعل
4,782
النقاط
113
الإقامة
مصر
بقلاوه و حرنكش
ههههههههههههههههههههههههههههههههههههههههههههههههههه فى واحده هتيجى تقراء بقلاوه و هتقع من طولها من الضحك--
بجد يا بتول انت بجد موضوعك تحفه جدا جدا--
اشكرك على محبتك الجميله الى زى السكر :)
 

sha2awet 2alam

شقاوة قلم
عضو مبارك
إنضم
23 يناير 2012
المشاركات
5,276
مستوى التفاعل
1,807
النقاط
0
مبدع و مجامل
ميرسيه انك افتكرتنى :)
 

خادم البتول

عضو نشيط
عضو نشيط
إنضم
13 أبريل 2012
المشاركات
1,062
مستوى التفاعل
1,031
النقاط
113
الإقامة
عابـــر سبيــــل

"خلي بالك من رورو"
:)
أول تعليق وأول تقييم
ودايما أول كل حاجة بيكون لها طعم خاص:
أول حب.. أول مرتب.. أول مولود....
أول جوازة :smile01

ميرسي جدا يا أحلي أخت على مشاركتك الجميلة
وعلى تقييمك الغالي
انا اللي بالعكس يسعدني ويشرفني إن اسمك مكتوب
ربنا يباركك ويفرح قلبك ويسعد كل أيامك

:Roses:

يا سمو الأميرة

بالعكس
: احنا اللي بمجرد ما نشوف

ألوانك
الرقيقة المميزة

فوريا بنشعر بطاقة حب كبيرة
حتى قبل ما نقرا أي كلمة :)

إيملي: انتي قلتي جملة في غاية الروعة والصدق:
إن السلام الحقيقي لما تحبي.. مش لما تتحبي!

شكرا ليكي انتي يا أميرتنا على كل أفكارك البديعة
وعلى كل تقديرك وكلماتك اللي بالتأكيد ماستحقهاش أبدا.

أتمنى أتمنى أضيف فعلا ولو لمسة حب بسيطة
لكن المؤكد إن القلوب اللي زي قلبك في العالم
هي اللي بتمدنا أولا بالقوة والتحمل والأمل.

:Roses:

طبعا برنسيس روز
طبعا فاكرك.. مين يقدر ينساكي :)
وطبعا فاهمك.. وحتى كمان موافقك
بالتأكيد "الطاقة السلبية" أو "الطاقة الطاردة" ممكن تكون قوية جدا
وممكن تكون بالفعل أكبر من الإنسان.. أي إنسان

لكن حتى لو كان ده الواقع فعلا:
لسه فرق كبير أوي بين إنسان بينسحب وهو مليان محبة وإشفاق ورحمة
وإنسان بينسحب وهو مليان ضيق أو رفض أو حزن
ده لأن الانسحاب في ذاته مش هو الهزيمة.. ولا البقاء هو الانتصار
الهزيمة والانتصار هم أولا محبتك.. وهم دايما داخلك!

ميرسي سمو الأميرة على كل محبتك
وعلى كل قوتك ;)

:Roses:

أشـــــكرك
هشام المهندس.. أخي الحبيب

مرة تانية أشكرك على مشاركتك
ومرة تانية شكري ليك بالفعل خاص جدا.

لحد كتابة رسالتي التانية هنا كنت إنت الشخص الوحيد
الوحيد اللي بيشارك ويكتب ويعطي تقدير وتقييم..
رغم إن اسمك مش موجود ابتداء!

كل الناس شاركت كرد فعل أمام لحظة محبة
لكنك الشخص الوحيد اللي شاركت مش كرد فعل
وإنما حضرت عشان تصنع لحظة محبة جديدة!

أد كده انت شخص جميل
وأد كده شكري وتقديري وإعزازي ليك
بالفعل خاص جدا :)

:Roses:

أيوووووه
أيوووه ياسكندراني انت يا سكر
وانا اقول البحر بيضحك ليه
وإيريني نازلة تملا القلل :)

تسلم إيديكي وعنيكي وفوقك وتحتك وحواليكي
ربنا يسعدك يابو قلب أبيض وطيب :)

:Roses:

بتـــــول
أكتر واحدة زعلت لغيابها أول ما رجعت ومالقيتهاش
وأكتر واحدة فرحت لما شفتها بعد شوية بتتسحب وتدخل!

قلت في نفسي: غريبة أوي!!!
هي البنت دي بتيجي معايا وتمشي معايا وللا إيه؟
هي "القلوب عند بعضها" أوي كده؟ :)

ميرسي يا قمر على كلامك الجميل وعلى كل تقديرك وتشجيعك
ربنا يباركك انتي كمان ويبارك حياتك
ويحميكي تحافظي على قلبك نقي وجميل
زي ما عرفناه دايما.

:Roses:

بلحـــــة
من خادم البتول إلى البلحة جيجو
ربنا يفرح قلبك انت كمان أخي الحبيب

طبعا البنات مركزين في البقلاوة
بلح الشام حلو.. صحيح.. بس حلاوته دي أصلا منين؟؟؟
عشان بيسحب "شربات" من البقلاوة!

يعني لما نقول جنس "حلويات"
يبقا البقلاوة هي الأصل!

خدها مني كلمة: لولا البقلاوة ما كان بلح الشام
وأنا راجل حلواني وفاهم بقول إيه!

فكرك انت لو المنتدى ده مافيهوش بنات
كان ممكن انت تشوف توبيك زي ده أصلا؟
هه.. ولا في الأحلام يابني!
ولا كل قسم الكتابات ده كان يبقا موجود
ولا كل الشعر والفن والموسيقى اللي في العالم!

واتعلموها بقا يا بلـــح
عشان دي "صنعة" و"أصول" و"حلاوة شرقي"
مش "جاتوهات" عِـرّة زي بتاع اليومين دول!
:smile01

:Roses:

أدمانتيوس
الأكثر كرما دائما معي..
الأكثر صفوا ومحبة وعطاء!

أخي الحبيب.. لا أخفيك: أنا ح اكون أسعد إنسان في العالم..
لو بس شفت نفسي "نصف" أو حتى "ربع" ما تراه أنت في ضعفي!

لكن الحق إنك إنت الجميل..
عشان كده عيونك ـ تسلم عيونك ـ مش بتشوف غير الجمال!

صلي لأجلي أخي الحبيب
صلي لأجل أن أكون في بساطتك ومحبتك
أنا اللي بشكرك.. ربنا يفرح قلبك ويبارك أيامك

:Roses:

تماف ماريا
كلماتك وإعجابك شهادة كبيرة جدا بالنسبة لي
خاصة إنك بالفعل من الأقلام المميزة
اللي دايما أستمتع بالقراءة ليها..

ده طبعا غير الثقافة الكتابية الرفيعة..
والردود اللي دايما أتعلم منها

ربنا يباركك أختي الغالية
أشكرك وأشكر حضورك وتشجيعك ومحبتك

:Roses:

حبيب يسوع
أبينا وأستاذنا الحبيب
بركة كبيرة إنك تحضر في أي موضوع
وتقول "الكلمتين بتوعك"
ثم تخرج في صمت كالعادة!

بركة كبيرة عالمنا الأرضي عادة مش بيفهمها
لأنه كالعادة لسه بيدوّر على اللمعان.. والضجيج.. وفنون الاستعراض

لكن الضعفا اللي زيي كده عارفين كويس أوي مقامك
ودايما يسعدني حضورك
ويفرحوني "الكلمتين بتوعك" : )

:Roses:

كوبتيــــــــك
من سوء حظي إني تقريبا عمري ما اتكلمت مباشر معاك
ومفيش توبيك قبل كده جمعنا
لكن قراءتك النهارده للموضوع بالفعل أدهشتني
منتهى الفهم والعمق والذكاء
تقريبا انت أكتر واحد فهمت رسالتي!

لما تقوللي:
"انا كمان ممنون انى عرفتك"
يبقا انت وصلتك كل المعاني وفهمت كل شيء!

شابوه أخي الحبيب :)

وميرسي دوبل طالما عايز تشرفني بتقييم دوبل
(مش غريبة طالما اسمك Coptic4Ever2)!

:smile01

:Roses:

الحرنكش
ده انتي اللي زي السكر يا أختي الجميلة
انتي اللي قلبك ما يتكررشي ومحبتك كلنا بنشرب منها
انتي اللي بساطتك لسه بتبهرني..
وسماحتك لسه بحاول اتعلمها

دايما يارب بتضحكي
ودايما يارب يبعد عنك الشر ويباركك ويفرح قلبك
ميرسي يا أحلى "حبو" على حضورك ومشاركتك

:Roses:

الصوت الصارخ
أبينا الحبيب.. أشتاق منذ زمن أن أراك في موضوعاتي المتواضعة
فاليوم لا تتصور فرحتي واحتفائي بحضورك!

أما تشجيعك وتقديرك وإعجابك فشهادة أشكرك كثيرا عليها.

ربنا يبارك صحتك وعمرك
أبي الحبيب
ويعوضك عن كل تعبك وجهادك..
وفي الختام أشكر رسالتك ومحبتك..
اللي كانت بالفعل مسك الختام. :)

:Roses:



 

white.angel

فيلسوفه مسيحيه
عضو مبارك
إنضم
6 يوليو 2010
المشاركات
3,777
مستوى التفاعل
1,303
النقاط
0
دائماً كتاباتك شهد :)
- بمناسبة الحلويات بقى D: -


ميرسى ليك يا بتول لمحبتك ... المحبه اعظم دواء ممكن تكتشفه البشريه :) :)
 

خادم البتول

عضو نشيط
عضو نشيط
إنضم
13 أبريل 2012
المشاركات
1,062
مستوى التفاعل
1,031
النقاط
113
الإقامة
عابـــر سبيــــل


شـقشـق


مبــدع؟ يمكــن!

لكن "مجامل" دي ربنا بعتهالي على لسانك..
عشان أشرح ببساطة اللي غاب ـ للأسف ـ عن ناس كتير!

* * *

السؤال هو: هل خادم البتول ينافق..
هل يغازل القلوب ويعبث بضعفها أو احتياجها..
هل يلعب دور "مستر سعادة" الذي يريد فقط إرضاء الجميع..
هل هو على الأقل فقط "يجامل

الإجابة: لمــــــاذا؟ :)

يحرضني الشيطان أن أعلن الآن عن بعض ما حققت بالفعل في هذا العالم..
ولكن حتى في حدود المعروف والمتاح ـ رغم قلته ـ لماذا؟
حقا لماذا يفعل خادم البتول ذلك؟

فهل حقا يحب هذا الرجل الجميع بلا قيد أو شرط؟
الإجابة: نعــــــم!

إذن: هل نحن هنا في حضرة قديس؟
الإجابة: بالقطع لا.. بل أبعد ما أكون عن ذلك!

لكن الأمر بسيط جدا أيها الأحباء..
الأمر كله هو فقط أن نفصل بين الخطية والخاطئ!
أن نكره الخطية ونرفضها، نعم..
لكننا أبدا لا نكره الخاطئ أو نرفضه..
بل بالعكس: نشفق عليه لأنه يخطئ ابتداء!

حتى إذا كان عــدوا..
بدلا من أن نراه خصما مقاوما شرسا..
نعلو ونترفع كي نراه بالأحرى حسب حقيقته: ضعيفا هشا منهزما..
تورط هو نفسه في الخصومة وفي المقاومة وفي الشراسة!

هو يكره، نعم، لكننا نحب...
ذلك أن الحب في ذاته هو أعظم قوة وهو برهان الانتصار..
بينما الكراهية بالأحرى هي عنوان الهزيمة ودليل السقوط!


نعم، منتداكم أيها الأحباء مليء بالضعف والخوف والشك!
منتداكم مليء بالأخطاء التي هجرته شخصيا بسببها قبل ذلك..
وما زلت أهجره.. وما زال غيري أيضا يهجره!

ولكن رغم كل شيء ـ أعرف ـ هناك قلوب ما تزال تنبض!

خلف كل القسوة ـ أعرف ـ
هناك انكسار..
يشتاق بالأحرى لمن يجبره، لا من يفضحه!

خلف كل الكبرياء ـ أعرف ـ هناك عطش..

يشتهي بالأحرى لمسة المطر، لا لسعة الشمس!

وفي الأعماق بعيدا ـ أعرف ـ هناك طفل..
ما زال حيا داخل كل منا.. يصارع لأجل البقاء!

هذا الطفل هو ما أفتش ببساطة عنه وأحاول أن أراه..
في نفسي وفيكم!

هذا ـ وهذا فقط ـ هو كل ما يجدر أن يشغلني حقا هنا..
في تلك "اللحظات" التي تجمعنا معا قبل أن يمضي كل منا في رحلته!

وهذا ببساطة هو ما أحبه ـ نعم ـ دون أي قيد أو شرط.

* * *

شــقشــق
أشكرك كثيرا أيتها الرسولة :)
ربما لا تعرفين ما أعرف، أو تشعرين بما أشعر
وربما تعرفين حقا وتشعرين!
بكل حال شاءت الحكمة العليا أن تأتيني الكلمة منك
كي أجيب عن أسئلة تردد صداها بالفعل في قاع الكون!

بكل حال شاءت الحكمة العليا أن تأتيني الكلمة على لسانك
فتباركتِ سيدتي وتبارك هذا اللسان! :)


* * *

 
التعديل الأخير:

خادم البتول

عضو نشيط
عضو نشيط
إنضم
13 أبريل 2012
المشاركات
1,062
مستوى التفاعل
1,031
النقاط
113
الإقامة
عابـــر سبيــــل


أقول إيه بس؟

أنا عارف البقلاوة اللي في الآخر دي مالهاش حل
دايما تبقى معسّلة أكتر! :)


avatar97554_4.gif


بس الكيوت ده بالذات واحشني جدا جدا
(من أيام الفيلم بتاع عبود :smile01)

ميرسي جدا أختي الغالية على تقديرك وكلماتك وتقييمك الغالي..

ربنا يباركك ويفرح قلبك يا أحلى فيلسوفة :)

* * *

 
أعلى