انا مكنتش عايزة اتدخل فى النقاش هنا لسببين اولهم انى مش بحب السياسة والسبب التانى ان الموضوع مكانش عن ارائنا فى عبد الناصر بس بما انه بقا كده خلاص , مش قادرة امنع نفسى من التعليق
طيب هو اللى انا لاحظته ان فعلا تنطبق علينا ( احنا المصريين ) عبارة نجيب محفوظ العبقرية فى رواية اولاد حارتنا " لان أفة حارتنا النسيان هكذا قالوا ياحارتنا "
خلاص عبد الناصر بقا بطل فعلا ؟ عبد الناصر مريض ومهووس بالسلطة وده السبب اللى خلاه ميهتمش بجمع المال علشان محدش يقولى انه مات ومش معاه حاجة
ده مش دليل معاه ابدا , لان الناس ليها انواع مختلفة من الهوس وعبد الناصر مهووس بالسلطة والزعامة وهوسه بيها كان اقوى من حبه للمال
فالسلطة على فكرة بتدى نشوة اكتر من جمع المال واكتر من المخدرات ومعظم القرارات اللى اخدها عبد الناصر اخدها لتدعيم حبه وعشقة للسلطة وللزعامة بتاعته ومش علشان خاطر مصر
زى ماخلى الجيش المصرى يحارب حروب ملوش دعوة بيها فى الجزائر ده كان علشان خاطر مصر ؟ ولا علشان عجبته فكرة انه يكون زعيم مش بس لمصر انما للمنطقة كلها
عبد الناصر جه بعد ثورة المفروض انها كانت ثورة تصحيح على الاوضاع الغلط فى المملكة المصرية
القائد نجاحة لا يقاس بالناس اللى حبسها والناس اللى اممها ولا حتى بالناس اللى سابها حرة تتكلم
انما يقاس بالحلم الوطنى اللى جابه وخلى الشعب كله يلتف حوالين حلم وطنى لبناء وطن ناجح
زى الصين مثلا كان عندهم حلم وطنى national dream ان الصين ديه تكون واحدة من اكبر القوى الاقتصادية فى العالم
الشعب صينى اخد الفكرة وحبها وده اللى خلاه يقبل بأقل الاجور حتى لو كان فقير مستعد يستحمل علشان زارعين فيه حلم للوطن كله
عبد الناصر كان عنده حلم وطنى لمصر ؟ايه هو ؟ تأميم الاقطاع ؟ هو كده تتحل المشاكل ؟ بالعكس تأميم الاغنياء بغض النظر عن انه اصلا ميصحش ومينفعش ده زود كسل الشعب وخلى الشخصية المصرية شخصية معتمدة على انه لما ميلاقيش ياكل مستنى الزعيم عبد الناصر يجبله حته ارض من هنا ولا من هنا علشان ياخد منها فلوس
وكتير من الفلاحين اللى اخدوا الاراضى من الاقطاع ضيعوها لان مش الحل ان ادى الشخص حاجة هو مش عارف يتصرف فيها الحل انى اعلمه ازاى يطلع انجازات من اللاشئ مش اعلمه الاعتمادية والسلبية
مصطفى كمال اتاتورك كان ديكتاتور وقعد فى حكم تركيا 15 سنة لكن اخطائه يمكن غفرانها لانه فى المقابل كان عنده حلم وطنى من اجل وطنه تركيا حطله خطة وخلى الشعب يحلم وينفذ معاه وعلم الشعب ازاى ينفذ الحلم التركى ده
ده غير ان عبد لناصر اثر سلبيا على الشخصية المصرية , كسر الشخصية المصرية بالنظام المخابراتى التجسسى اللى عمله فبقا هم المصرى انه يعيش وميدخلش المعتقلات ويمشى جنب الحيط احسن ما يودوه ورا الشمس ولا انتو نسيتو المعتقلات وصلاح نصر و التعذيب فى المعتقلات؟ لو نسيتو اتفرجو على فيلم احنا بتوع الاتوبيس ولا الكرنك وانتو تعرفو كان بيحصل ايه فى الشعب
شعب بيحصل فيه كده وشخصيته مكسورة بالشكل ده تفتكروا ممكن يعمل دولة حديثة وينهض بيها ؟
بالنسبة بقا لموقف عبد الناصر من قداسة البابا كيرلس ففعلا أفة حاراتنا النسيان فعلا
عبد الناصر مكانش بيطيق قداسة البابا كيرلس اصلا
ولما حصلت القصة الشهيرة اللى طوب الارض من المسيحيين عارفها ان البابا كان بيطلب كتييييير يقابل عبد الناصر وهو كان بيرفض ولما اتوسطله واحد من المعارف راح قابل عبد الناصر وعبد الناصر شبه طرده وقاله مالهم الاقباط ؟ عايزين ايه ؟ انتو هتصدعونى ؟ راح البابا مشى وزعل جدا وقاله ربنا يسامحك
اللى خلى عبد الناصر كويس لما بنته تعبت وقداسة البابا كيرلس راح صلى ليها وقامت وخفت
يعنى لولا تدخل ربنا بالمعجزة ديه مكانتش حاجة هتتغير
وتأميمه للمسيحين وبهدلتهم معروفة ده فيه مسيحيين نعرفهم بقوا شحاتين بعد التأميم ,
وتأميمه للاسرة العلوية ليس الا دليل على احقاده الطبقية ضد الاسرة العلوية وانه ياخد املاكهم بهذا الشكل بغض النظر انهم مسلمين ولا مسيحيين
مكنتوش بتسمعوا فى عهده عن احداث طائفية ؟ هتسمعوا فين يعنى ؟؟ على ايه ؟ على البوتاجاز ؟
ما الاعلام اعلامه والصحافة صحافته , حد يقدر ينزل خبر مش عاجبه ؟ يعنى كان فيه حرية صحافة مثلا لا سمح الله ؟
هو انتو دلوقتى بتعرفو الاخبار المستخبية علشان حكام العالم عايزنكوا تعرفو ؟ حتى العالم الديمقراطى عايزك تعرف ؟ ابدااا , امريكا مثلا كانت عايزاك تعرف التعذيب اللى كان بيحصل فى معتقلات ابوغريب وجوانتانمو ؟ لا طبعا
اتعرفت ازاى ؟ تسريب صور وايميلات
يبقا احنا بقينا بنعرف لان المعرفة دلوقتى مبقتش حكر على الدولة ولا الحكومة المعرفة بقت فى ايد المواطن العادى
حصلت حادثة بصورها بموبايلى وانشرى ياصحافة وانترنت
عبد الناصر ابتدا مسلسل السقوط , لو كان بيحب البلد بجد كان عمل فيها حلم ومشروع قومى , اى حاجة , مشروع فى التعليم فى البحث العلمى فى الصناعة فى الزراعة اى حاجة اى حلم اى فكرة
لكن مفيش خالص لان كل اللى ان شاغله ازاى يثبت زعامته وبس
طبعا الناس كانت بتحبه وبتموت فيه لانه كاريزما لا يمكن انكارها ولانه فاهم شخصية المصريين كويس اوى عرف ازاى يدخلهم من المشاعر والخطب الرنانة اللى كلها كلام كبير دون اى محتوى فكرى او خطة حقيقية
علشان كده الناس مثلا متعلقتش بالسادات اوى لانه معرفش يعمل زى عبد الناصر كان بيحاول يخاطب الناس خطاب عقلى
واحنا المصريين رغم ذكائنا الحاد الا اننا بنحب الكلام العاطفى ونصدقه حتى بدون وجود اى دليل عليه
