اخيرا لاقيت حاجة ارد عليها
عبد الناصر مريض ومهووس بالسلطة ... اوكى اتفقنا
تقدرى تقوليلى دة كان ضرره ايه على الشعب
السلطة يحميها المال وسلطة عبد الناصر كان بيحميها حب الشعب له
رغم كل الحروب والمشاكل
عبد الناصر عمل ايه للبلد دى
دخلنا فى حروب بعضها مالهاش لازمة وبعضها كانت مفروضه علينا
أمم قناة السويس اللى عايشين من فلوسها حتى الان
بنا السد العالى اللى جايبلنا الكهربا حتى الان
عمل التلفزيون المصرى اللى مش عارفين ننضفه حتى الان :t33:
عمل كورنيش النيل اللى الناس النهاردة رايحه جايه عليه بالورد والفل
عمل قوانين الاصلاح الزراعى اللى حسس الفقير اللى كان بيستعبدوه الناس بفلوسهم انه ممكن يكون حاجة
عمل مجانية التعليم اللى اغلب الشعب اتعلم بسببها ومازالت مستمرة
عمل ستاد القاهرة اللى الحراميه بيوضبوه بس بمليارات فى الوقت الحالى
عمل معرض الكتاب نشاط ثقافى مستمر حتى الان
عمل بحيرة ناصر اكبر بحيرة صناعيه فى العالم
عمل برج القاهرة
عمل اتفاقيه الجلاء البريطانى من مصر وبالاتفاقية دى مبقاش فيه جندى انجليزى واحد على ارض مصر
عمل جريدة الجمهورية
دى بعض اعمال جمال عبد الناصر اللى احنا لحد اللحظه اللى بكتب فيها المشاركة دى عايشين من خيره
الراجل عبد الناصر حب السلطة والزعامه وحب الشعب
والكاتدرائيه الكبيرة اللى بنروحها دى ارضها كانت هديه من عبد الناصر
اللى لو كان وحش او كان بيكره البابا مكنش اداله هدية كبيرة اوى كدة وسمح ببناء الكاتدرائيه فى مكان صعب
مكنش فيه بين الناس لا حجاب ولا نقاب ومكنش فيه اضطهاد لانك متقدرش تميز بين المسلم والمسيحى وتقدرى تشوفى ده فى حفلات ام كلثوم
كل الناس بشعرها وكل الناس شبه بعض
لو كان عبد الناصر كاره للاقباط مكنتش والدتى نزلت من بيتها لغايه بيته تقوله متمشيش يا جمال البلد محتاجاك بعد النكسه وبعد ان قرر التنحى
دة مش كلام اعلام عبد الناصر ده كلام والدتى اللى عاشت ايام عبد الناصر
مكنتش البلد كلها خرجت تودع الزعيم جمال عبد الناصر ومنهم عيلتى كلها واللى اكيد هما مسيحيين
تقدرى تقولى عملنا ايه بحريه الصحافة والاعلام اللى موجودين دلوقتى ده بفرض عدم وجودهم فى ايام جمال
الشعب جعان وتعبان وقارفان وكاره حياته ويتمنى الموت النهاردة قبل بكرة
والفتن شغاله الله ينور
والتحريض شغال زى الفل
واحنا مضطهدين وبرضه زى الفل
يرحم جمال عبد الناصر
