سفر أخبار الأيام الثاني - الأصحاح 17 | Hebrew Old Testament (Tanach)

  • 1. וימלך יהושׁפט בנו תחתיו ויתחזק על־ישׂראל׃
  • 2. ויתן־חיל בכל־ערי יהודה הבצרות ויתן נציבים בארץ יהודה ובערי אפרים אשׁר לכד אסא אביו׃
  • 3. ויהי יהוה עם־יהושׁפט כי הלך בדרכי דויד אביו הראשׁנים ולא דרשׁ לבעלים׃
  • 4. כי לאלהי אביו דרשׁ ובמצותיו הלך ולא כמעשׂה ישׂראל׃
  • 5. ויכן יהוה את־הממלכה בידו ויתנו כל־יהודה מנחה ליהושׁפט ויהי־לו עשׁר־וכבוד לרב׃
  • 6. ויגבה לבו בדרכי יהוה ועוד הסיר את־הבמות ואת־האשׁרים מיהודה׃
  • 7. ובשׁנת שׁלושׁ למלכו שׁלח לשׂריו לבן־חיל ולעבדיה ולזכריה ולנתנאל ולמיכיהו ללמד בערי יהודה׃
  • 8. ועמהם הלוים שׁמעיהו ונתניהו וזבדיהו ועשׂהאל ושׁמרימות ויהונתן ואדניהו וטוביהו וטוב אדוניה הלוים ועמהם אלישׁמע ויהורם הכהנים׃
  • 9. וילמדו ביהודה ועמהם ספר תורת יהוה ויסבו בכל־ערי יהודה וילמדו בעם׃
  • 10. ויהי פחד יהוה על כל־ממלכות הארצות אשׁר סביבות יהודה ולא נלחמו עם־יהושׁפט׃
  • 11. ומן־פלשׁתים מביאים ליהושׁפט מנחה וכסף משׂא גם הערביאים מביאים לו צאן אילים שׁבעת אלפים ושׁבע מאות ותישׁים שׁבעת אלפים ושׁבע מאות׃
  • 12. ויהי יהושׁפט הלך וגדל עד־למעלה ויבן ביהודה בירניות וערי מסכנות׃
  • 13. ומלאכה רבה היה לו בערי יהודה ואנשׁי מלחמה גבורי חיל בירושׁלם׃
  • 14. ואלה פקדתם לבית אבותיהם ליהודה שׂרי אלפים עדנה השׂר ועמו גבורי חיל שׁלשׁ מאות אלף׃
  • 15. ועל־ידו יהוחנן השׂר ועמו מאתים ושׁמונים אלף׃
  • 16. ועל־ידו עמסיה בן־זכרי המתנדב ליהוה ועמו מאתים אלף גבור חיל׃
  • 17. ומן־בנימן גבור חיל אלידע ועמו נשׁקי־קשׁת ומגן מאתים אלף׃
  • 18. ועל־ידו יהוזבד ועמו מאה־ושׁמונים אלף חלוצי צבא׃
  • 19. אלה המשׁרתים את־המלך מלבד אשׁר־נתן המלך בערי המבצר בכל־יהודה׃
أسفار الكتاب المقدس
أعلى