سفر زكريا - الأصحاح 3 | Hebrew Old Testament (Tanach)

  • 1. ויראני את־יהושׁע הכהן הגדול עמד לפני מלאך יהוה והשׂטן עמד על־ימינו לשׂטנו׃
  • 2. ויאמר יהוה אל־השׂטן יגער יהוה בך השׂטן ויגער יהוה בך הבחר בירושׁלם הלוא זה אוד מצל מאשׁ׃
  • 3. ויהושׁע היה לבשׁ בגדים צואים ועמד לפני המלאך׃
  • 4. ויען ויאמר אל־העמדים לפניו לאמר הסירו הבגדים הצאים מעליו ויאמר אליו ראה העברתי מעליך עונך והלבשׁ אתך מחלצות׃
  • 5. ואמר ישׂימו צניף טהור על־ראשׁו וישׂימו הצניף הטהור על־ראשׁו וילבשׁהו בגדים ומלאך יהוה עמד׃
  • 6. ויעד מלאך יהוה ביהושׁע לאמר׃
  • 7. כה־אמר יהוה צבאות אם־בדרכי תלך ואם את־משׁמרתי תשׁמר וגם־אתה תדין את־ביתי וגם תשׁמר את־חצרי ונתתי לך מהלכים בין העמדים האלה׃
  • 8. שׁמע־נא יהושׁע הכהן הגדול אתה ורעיך הישׁבים לפניך כי־אנשׁי מופת המה כי־הנני מביא את־עבדי צמח׃
  • 9. כי הנה האבן אשׁר נתתי לפני יהושׁע על־אבן אחת שׁבעה עינים הנני מפתח פתחה נאם יהוה צבאות ומשׁתי את־עון הארץ־ההיא ביום אחד׃
  • 10. ביום ההוא נאם יהוה צבאות תקראו אישׁ לרעהו אל־תחת גפן ואל־תחת תאנה׃
أسفار الكتاب المقدس
أعلى