سفر نشيد الأنشاد - الأصحاح 6 | Hebrew Old Testament (Tanach)

  • 1. אנה הלך דודך היפה בנשׁים אנה פנה דודך ונבקשׁנו עמך׃
  • 2. דודי ירד לגנו לערוגות הבשׂם לרעות בגנים וללקט שׁושׁנים׃
  • 3. אני לדודי ודודי לי הרעה בשׁושׁנים׃
  • 4. יפה את רעיתי כתרצה נאוה כירושׁלם אימה כנדגלות׃
  • 5. הסבי עיניך מנגדי שׁהם הרהיבני שׂערך כעדר העזים שׁגלשׁו מן־הגלעד׃
  • 6. שׁניך כעדר הרחלים שׁעלו מן־הרחצה שׁכלם מתאימות ושׁכלה אין בהם׃
  • 7. כפלח הרמון רקתך מבעד לצמתך׃
  • 8. שׁשׁים המה מלכות ושׁמנים פילגשׁים ועלמות אין מספר׃
  • 9. אחת היא יונתי תמתי אחת היא לאמה ברה היא ליולדתה ראוה בנות ויאשׁרוה מלכות ופילגשׁים ויהללוה׃
  • 10. מי־זאת הנשׁקפה כמו־שׁחר יפה כלבנה ברה כחמה אימה כנדגלות׃
  • 11. אל־גנת אגוז ירדתי לראות באבי הנחל לראות הפרחה הגפן הנצו הרמנים׃
  • 12. לא ידעתי נפשׁי שׂמתני מרכבות עמי־נדיב׃
  • 13. (7:1) שׁובי שׁובי השׁולמית שׁובי שׁובי ונחזה־בך מה־תחזו בשׁולמית כמחלת המחנים׃
أسفار الكتاب المقدس
أعلى