سفر ميخا - الأصحاح 2 | Hebrew Old Testament (Tanach)

  • 1. הוי חשׁבי־און ופעלי רע על־משׁכבותם באור הבקר יעשׂוה כי ישׁ־לאל ידם׃
  • 2. וחמדו שׂדות וגזלו ובתים ונשׂאו ועשׁקו גבר וביתו ואישׁ ונחלתו׃
  • 3. לכן כה אמר יהוה הנני חשׁב על־המשׁפחה הזאת רעה אשׁר לא־תמישׁו משׁם צוארתיכם ולא תלכו רומה כי עת רעה היא׃
  • 4. ביום ההוא ישׂא עליכם משׁל ונהה נהי נהיה אמר שׁדוד נשׁדנו חלק עמי ימיר איך ימישׁ לי לשׁובב שׂדינו יחלק׃
  • 5. לכן לא־יהיה לך משׁליך חבל בגורל בקהל יהוה׃
  • 6. אל־תטפו יטיפון לא־יטפו לאלה לא יסג כלמות׃
  • 7. האמור בית־יעקב הקצר רוח יהוה אם־אלה מעלליו הלוא דברי ייטיבו עם הישׁר הולך׃
  • 8. ואתמול עמי לאויב יקומם ממול שׂלמה אדר תפשׁטון מעברים בטח שׁובי מלחמה׃
  • 9. נשׁי עמי תגרשׁון מבית תענגיה מעל עלליה תקחו הדרי לעולם׃
  • 10. קומו ולכו כי לא־זאת המנוחה בעבור טמאה תחבל וחבל נמרץ׃
  • 11. לו־אישׁ הלך רוח ושׁקר כזב אטף לך ליין ולשׁכר והיה מטיף העם הזה׃
  • 12. אסף אאסף יעקב כלך קבץ אקבץ שׁארית ישׂראל יחד אשׂימנו כצאן בצרה כעדר בתוך הדברו תהימנה מאדם׃
  • 13. עלה הפרץ לפניהם פרצו ויעברו שׁער ויצאו בו ויעבר מלכם לפניהם ויהוה בראשׁם׃
أسفار الكتاب المقدس
أعلى