اختر حرف : ا - ب - ت - ث - ج - ح - خ - د - ذ - ر - ز - س - ش - ص - ض - ط - ظ - ع - غ - ف - ق - ك - ل - م - ن - ه - و - ي -

كلمات ترنيمة في جو المذود الهادي

1- فى جو المزود الهادى     فى ليل بيت لحم وسكونه

على الأعشاب نام الفادى     قماط من البرد بيصونه

ونور من طلعته بادى     وسر المجد فى عيونه

2- صحيح التبن والعيدان     كانت ناشفه على جلده

وريحة مزود الحيوان     كانت بتحاوطه فى مهده

لكن من حبه للإنسان     تحملها وترك مجده

3- يسوع اللى السما كرسيه     رضى بولادته فى مزود

ونام والحيوانات جواليه     وهو السيد الأمجد

كاسِ الكون بالورود يكسيه     قماط من خفَّته يبرد

4- خرافه اللى الهلاك نابهم     وجِه بحنوه يفديهم

فى وشه سدوا أبوابهم     كأنه من أعاديهم

جاهم وملايكته سابهم     وملقاش بيت فى واديهم

5- ودول لو عرفوا إيه قدره     كانوا أدّوا الخضوع وافى

وكان فرش الغنى وقصره     عشان تشريفه مش كافى

وكانوا قمطوا خصره     بأتواب من حرير صافى

6- ما عرفوش إنه لما يزور     مكان يصبح سما تانية

ولو كان ضلمه يملاه نور     وتخلد هيئته الفانية

وحزنه يبدله بسرور     مفيش من نوعه فى الدنيا

7- سابوك فى المزود المعزول     يارب المجد يا ربى

لكن باب قلبى مش مقفول     تعال حل فى قلبى

ساعتها الشر منه يزول     ويكمل للجميع حبى