واجب عزاء و طلب صلّآه لارينى ...

[+ماريا+]

ربنا يعزيكم ايرينى

 

[Bent el Massih]

ربنا يعزيكم حبيبتي ويصبركم
مع المسيح ذاك افضل​

 

[soso a]

البقية في حياتك
ربنا يعزيكم جميعاً ويصبركم على فراقه
ويجعلها اخر الاحزان ..

 

[اني بل]

سلام ايريني وحشتينا
ربنا يقويكي ويعطيكي الصبر
وسلام لماريا وبنت المسيح وسوسو وحشتونا
احنا هنا كلنا ايريني بنحبك حبيبتي وربنا يعزيكي

 

[BITAR]

راحه ابديه من رب السماء للاب المنتقل
وعزاء وصبرا للاخت ايرينى
ولكل الاسره وكل محبيها


​

 

[+إيرينى+]

شكرا لكم جميعا على تعازيكم الخالصة

أشكركم من كل قلبى

ح أبقى أعمل موضوع عن ذكرياتى مع بابا و مرض السرطان (المرحلة الرابعة)

ربنا يدبر الوقت


ملحوظة كدة على جنب

يبدو إن العزاء خلانا نشوف أعضاء كتير مش بتدخل المنتدى



​

 

[خادم البتول]

ملحوظة كدة على جنب ​

يبدو إن العزاء خلانا نشوف أعضاء كتير مش بتدخل المنتدى ​

لا يا إيريني ده بس عشان الناس بتحبك وليكي وضع خاص في قلوب الجميع.. ده طبعا رغم كل "مشاكساتك" .. لكن حتى مشاكساتك بالعكس أصبحت جزء من عطرك المميز اللي الناس بتفتقده! أما عن نفسي فأنا باضرب المثل دايما بيكي وبموضوعك المميز في التاريخ! حد يصدق إن إيريني خبيرة الفسيخ والزبادي المنزلي كانت في يوم من الأيام "مؤرخة" ومؤرخة كبيرة كمان؟

باضرب المثل باقول إن المنتدى ده إذا كان لسه فيه لحد النهارده أي نفس أو أثر للحياة، فده مش عشان لسه فيه أي "نشاط".. أو لسه دايما فيه حتى في أحلك الأيام على الأقل اتنين تلاته بيكتبوا.. أبـدا.. كذب. الموقع ده ما زال يتنفس فقط عشان موضوعات زي موضوعك التاريخي ده، عشان كل الجهد الرهيب المخلص الرائع وبالتالي فيضان الطاقة الجميلة اللي زرعها ناس زيك من زمان في المكان، عشان البركة الحقيقية الكبيرة من قلوب وعقول أجيال رائعة كتير سبقتنا وما زالت حتى اليوم حية ونابضة رغم كل شيء! هو ده تحديدا سر البقاء والحياة!

فيا صديقتي الجميلة: قلوبنا قلوب الناس كلها عارفة الحقيقة دي حتى لو كانت فاتت ظاهريا على عقولنا.. أو يبدو إن مفيش حد واخد باله.. أو يبدو إن التاريخ بيتنسي! أبدا. بالعكس هو ده مبتدأ المحبة وسر الظهور والحضور والمشاركة خاصة في ظرف زي ده، لأجل شخصية رائعة من أجمل شحصيات الماضي والحاضر! ربنا يعزيكم ودائما في انتظار موضوعاتك المميزة.


​

 

[حبو اعدائكم]

فعلا يا ايرو عندك حق ...
و زى ما قال خادم لان الكل بيحبك و يحب روحك المميزة و مناغشاتك ..
فى انتظار الموضوع
ربنا يبارك فى وقتك و حياتك

 

[+إيرينى+]

لا يا إيريني ده بس عشان الناس بتحبك وليكي وضع خاص في قلوب الجميع.. ده طبعا رغم كل "مشاكساتك" .. لكن حتى مشاكساتك بالعكس أصبحت جزء من عطرك المميز اللي الناس بتفتقده! أما عن نفسي فأنا باضرب المثل دايما بيكي وبموضوعك المميز في التاريخ! حد يصدق إن إيريني خبيرة الفسيخ والزبادي المنزلي كانت في يوم من الأيام "مؤرخة" ومؤرخة كبيرة كمان؟

باضرب المثل باقول إن المنتدى ده إذا كان لسه فيه لحد النهارده أي نفس أو أثر للحياة، فده مش عشان لسه فيه أي "نشاط".. أو لسه دايما فيه حتى في أحلك الأيام على الأقل اتنين تلاته بيكتبوا.. أبـدا.. كذب. الموقع ده ما زال يتنفس فقط عشان موضوعات زي موضوعك التاريخي ده، عشان كل الجهد الرهيب المخلص الرائع وبالتالي فيضان الطاقة الجميلة اللي زرعها ناس زيك من زمان في المكان، عشان البركة الحقيقية الكبيرة من قلوب وعقول أجيال رائعة كتير سبقتنا وما زالت حتى اليوم حية ونابضة رغم كل شيء! هو ده تحديدا سر البقاء والحياة!

فيا صديقتي الجميلة: قلوبنا قلوب الناس كلها عارفة الحقيقة دي حتى لو كانت فاتت ظاهريا على عقولنا.. أو يبدو إن مفيش حد واخد باله.. أو يبدو إن التاريخ بيتنسي! أبدا. بالعكس هو ده مبتدأ المحبة وسر الظهور والحضور والمشاركة خاصة في ظرف زي ده، لأجل شخصية رائعة من أجمل شحصيات الماضي والحاضر! ربنا يعزيكم ودائما في انتظار موضوعاتك المميزة.


​

أولا : شكرا على الاطراء

ثانيا : أنا كمان بنحب كل أعضاء المنتدى

لكن ح أقولك على حاجة (معلش يعنى)

أنا عشان أشاكس : لازم ألاقى الل يناكف فيا _ ينكشنى كدة

زى عبود مثلا

تقريبا كدة هو الوحيد الل كان بيناكف فيا

انت بتناكفنى ؟؟

أنا دلوقتى أعمل موضوعى و أكلم نفسى يعنى ؟؟

ها ؟؟

ألاقى روحى باصة لروحى ؟

ما ينفعش

يرجع عبود _ ح أعمل الموضوع و أكمل باقى المواضيع الل وقفت (إن شاء الرب و عشنا)

غير كدة ح يبقى صعب أوى أوى أكلم روحى

أنا مش فاهمة إزاى عبود دا يترفد كدة يعنى

ما فيش حد فينا إحتاجه ف حاجة قانونية إلا و ساعدنا يعنى الصراحة

حتى الل غتتوا عليه

شىء غريب فعلا

:thnk0001:


​

 

[خادم البتول]

أنا عشان أشاكس : لازم ألاقى الل يناكف فيا _ ينكشنى كدة​

زى عبود مثلا​

تقريبا كدة هو الوحيد الل كان بيناكف في​

انت بتناكفنى ؟؟​

.

لا أنا مش بناكفك.. دي لعبة عبود.. هو اللي بيعرف "يتعامل" مع النوع ده.

بالإضافة لكده أنا لا أحب المناكفة عموما. (إنما طبعا لو حبيتي أنا ممكن أناكفك واناكف اللي.... لا مؤاخذة)

أنا دلوقتى أعمل موضوعى و أكلم نفسى يعنى ؟؟​

ها ؟؟​

ألاقى روحى باصة لروحى ؟​

ما ينفعش​

يرجع عبود _ ح أعمل الموضوع و أكمل باقى المواضيع الل وقفت (إن شاء الرب و عشنا)​

غير كدة ح يبقى صعب أوى أوى أكلم روحى​

.

الحقيقة هو ده بالظبط نفس تفكيري وفعلا تعجبت لما قلتي إنك جاية بموضوع جديد.. تساءلت إزاي ممكن تكتبي إذا كان خط الوسط "صانع الألعاب" الأهم بالنسبة لك (وأحد أشهر صانعي الألعاب عموما بالمنتدى) غير موجود؟

أنا مش فاهمة إزاى عبود دا يترفد كدة يعنى​

ما فيش حد فينا إحتاجه ف حاجة قانونية إلا و ساعدنا يعنى الصراحة​

حتى الل غتتوا عليه​

شىء غريب فعلا​

:thnk0001:​

للأسف المنطق ده من الأساس مغلوط.. عملتي زي هيلانه لما بردو فتحت نفس الموضوع وبردو قالت إن عبود "ساعد الجميع وجمايله كانت على الجميع"! أهكذا حقا يا أخوتي تُدار الأمور في قريتكم؟ يعني هل لو عبود ده أو أي عضو عموما ـ بناء على كلامك ـ لم يقدم أي مساعدة قانونية لأي شخص: هل ده يبرر فصل العضو هكذا فجأة، هكذا بدون إبداء أي أسباب، هكذا، سامحوني، بدون إبداء حتى أي احترام لكل الأعضاء دي اللي سألت وما زالت تسأل عنه وتسأل ـ على الأقل ـ عن سبب فصله؟

على أي حال اعفيني يا أستاذة إيريني أنا بالذات رجاء من هذا الحوار لأنني شخصيا لم أعد أتكلم في "السياسة" بل حتى أعتبر نفسي مجرد ضيف عليكم، أحضر بإرشاد الرب فقط لزيارتكم أو لأداء "مأموريات" خاصة وسريعة. ختاما أؤكد أن الجميع في النهاية هم بالطبع في قلوبنا دائما ونحبهم، حتى أعداءنا ولاعنينا والذين يسيئون إلينا، كما أصلي مخلصا أن يساعدكم الرب جميعا ـ إدارة وأعضاء ـ وأن يعطيكم "الحكمة" لإدراك الخطأ عندما يكون هناك حقا أي خطأ، "الشجاعة" على الاعتراف به، و"القدرة" على إصلاحه!



​

 

[حبو اعدائكم]

الحقيقه انا كمان حزينه جدا جدا
و كتير أعضاء الحقيقه الى كانوا منورين المنتدى بلقيهم مش عايزين يدخلوا تانى و ملهمش نفس يشاركوا لغياب عبود...رغم وجودهم على النت ...
مش عارفا أقول ايه .....
فرصه بئا اشكر عبود هنا لانه هو أصلا الى بلغنى و طلب منى اعمل الموضوع دا و لو كان عليه كان هو الى عمله اول ما وصل له الخبر ....

 

[+إيرينى+]

لا أنا مش بناكفك.. دي لعبة عبود.. هو اللي بيعرف "يتعامل" مع النوع ده.

بالإضافة لكده أنا لا أحب المناكفة عموما. (إنما طبعا لو حبيتي أنا ممكن أناكفك واناكف اللي.... لا مؤاخذة)

الحقيقة هو ده بالظبط نفس تفكيري وفعلا تعجبت لما قلتي إنك جاية بموضوع جديد.. تساءلت إزاي ممكن تكتبي إذا كان خط الوسط "صانع الألعاب" الأهم بالنسبة لك (وأحد أشهر صانعي الألعاب عموما بالمنتدى) غير موجود؟





للأسف المنطق ده من الأساس مغلوط.. عملتي زي هيلانه لما بردو فتحت نفس الموضوع وبردو قالت إن عبود "ساعد الجميع وجمايله كانت على الجميع"! أهكذا حقا يا أخوتي تُدار الأمور في قريتكم؟ يعني هل لو عبود ده أو أي عضو عموما ـ بناء على كلامك ـ لم يقدم أي مساعدة قانونية لأي شخص: هل ده يبرر فصل العضو هكذا فجأة، هكذا بدون إبداء أي أسباب، هكذا، سامحوني، بدون إبداء حتى أي احترام لكل الأعضاء دي اللي سألت وما زالت تسأل عنه وتسأل ـ على الأقل ـ عن سبب فصله؟

على أي حال اعفيني يا أستاذة إيريني أنا بالذات رجاء من هذا الحوار لأنني شخصيا لم أعد أتكلم في "السياسة" بل حتى أعتبر نفسي مجرد ضيف عليكم، أحضر بإرشاد الرب فقط لزيارتكم أو لأداء "مأموريات" خاصة وسريعة. ختاما أؤكد أن الجميع في النهاية هم بالطبع في قلوبنا دائما ونحبهم، حتى أعداءنا ولاعنينا والذين يسيئون إلينا، كما أصلي مخلصا أن يساعدكم الرب جميعا ـ إدارة وأعضاء ـ وأن يعطيكم "الحكمة" لإدراك الخطأ عندما يكون هناك حقا أي خطأ، "الشجاعة" على الاعتراف به، و"القدرة" على إصلاحه!



​

شوف :

إحنا ممكن نمسح موضوع إنه بيساعد الكل

لكن

بما إن رئيس مجلس إدارة النادى و العضو المنتدب شافوا إنهم يرفدوا صانع الألعاب الوحيد بالنادى و أقوى لاعب خط نص (بدون سبب)

يبقى مجلس ادارة النادى عايزين اللاعيبة تخسر الماتشات و بالتالى النادى يخسر و يتقفل النادى أو على الأقل يبقى النادى ميت

يبقى هو دا الهدف الحقيقى لرفده

و شكرا لمجلس اتحاد الكورة الل ما بيردش علينا

لكن أدينا عرفنا من مصادرنا الخاصة

​

 

[خادم البتول]

.
بما إن رئيس مجلس إدارة النادى و العضو المنتدب شافوا إنهم يرفدوا صانع الألعاب الوحيد بالنادى و أقوى لاعب خط نص (بدون سبب)​

يبقى مجلس ادارة النادى عايزين اللاعيبة تخسر الماتشات و بالتالى النادى يخسر و يتقفل النادى أو على الأقل يبقى النادى ميت​

يبقى هو دا الهدف الحقيقى لرفده​

و شكرا لمجلس اتحاد الكورة الل ما بيردش علينا​

لكن أدينا عرفنا من مصادرنا الخاصة​

طبعا لا تعليق، سوى فقط التأكيد على إن "التحليل" ده لم يصدر بالطبع إلا على سبيل المزاح لا أكثر. كمان التأكيد على إننا إذا سمحنا لنفسنا بنقد سلوك إداري معين فلابد يكون واضح ولابد نتذكر دائما إن هذا النقد قائم أولا على أساس المحبــة، دافعه الوحيد هو المحبة، ولا يهدف مخلصا إلا إلى الإصلاح والبنيان.

مع ذلك كلامك ممكن يكون صحيح أو "جاد" في نقطة واحدة: هي إن بعض الأخطاء قد تؤدي بالفعل ـ ولو على المدى البعيد ـ إلى شلّ المنتدي فعلا أو حتى قتله! لكنها تبقى "أخطاء"، غير مقصودة، وهو ده دور النقد الحقيقي المخلص: لفت النظر لهذه الأخطاء. أعتقد شخصيا إن هو ده تحديدا اللي انتي تقصديه. لكن طبعا بحكم المشاكسة اللي في طبعك وفي دمك قدّمتي الموضوع كما لو كان ده فعلا "القصد" و"الهدف" وسبب الفصل!


على أي حال في النهاية كله زائل يا صديقتي الجميلة! خلال سنوات أو بالكتير عقود قليلة: لن يكون هناك لا عبود ولا حتى منتدى.. ولا روك ولا أمة.. ولا حبو ولا هيلانة.. ولا أنا ولا إنتي! خلينا بالتالي في "اللحظات" القليلة دي اللي بتجمعنا نختــار نحب بدل ما نشك، نسامح بدل ما نكره، نثق بدل ما نخاف، ونصلّح بدل ما نيأس. خلينا كمان نتذكر إن المحبة هي الإختيار الأصعب وليس العكس أبدا! كما قال أحد الكتاب في رواية شهيرة: «أسهل إنك تنسى نفسك في الكاس أو المخدّر من إنك تواجه الحياة وتتكيف معها.. أسهل إنك تسرق ما تحتاج من إنك تشتغل عشان تكسبه.. أسهل إنك تضرب طفل من إنك تربّيه.. يا إلهي، إن للحب تكلفته! الحب يحتاج جهدا وعملا!»

بالمثل: أسهل إننا نشك في نوايا الإدارة من إننا نثق فيها وحتى نرفعها هي نفسها لمستوى ثقتنا.. أسهل إننا ندينها من إننا نفكر ونبحث ونلتمس لها ألف عذر.. أسهل إننا نيأس أخيرا من إننا نفضل ننادي ونطلب ونسأل ونكتب لها.. ولكن أيضا في المقابل: أسهل إننا نحذف رسالة من إننا نناقشها.. أسهل إننا نغلق موضوع من إننا نكتب ونحذر ونحاول نصحح مساره بدلا من إعدامه.. أسهل إننا نفصل عضو ـ بغض النظر تماما عن السبب ـ من إننا نصححه لو كان مخطئ، نعالجه لو كان مريض، نعلّمه لو كان جاهل، وقبل كل شيء ـ كما علمنا إلهنا ـ نحبه حتى لو كان عدو! نسامحه إذا تعدّى ونصلي لأجله لو إننا في النهاية تماما عجزنا!

حقا «يا إلهي، إن للحب تكلفته! الحب يحتاج جهدا وعملا!»


​

 

[+إيرينى+]

طبعا لا تعليق، سوى فقط التأكيد على إن "التحليل" ده لم يصدر بالطبع إلا على سبيل المزاح لا أكثر. كمان التأكيد على إننا إذا سمحنا لنفسنا بنقد سلوك إداري معين فلابد يكون واضح ولابد نتذكر دائما إن هذا النقد قائم أولا على أساس المحبــة، دافعه الوحيد هو المحبة، ولا يهدف مخلصا إلا إلى الإصلاح والبنيان.

مع ذلك كلامك ممكن يكون صحيح أو "جاد" في نقطة واحدة: هي إن بعض الأخطاء قد تؤدي بالفعل ـ ولو على المدى البعيد ـ إلى شلّ المنتدي فعلا أو حتى قتله! لكنها تبقى "أخطاء"، غير مقصودة، وهو ده دور النقد الحقيقي المخلص: لفت النظر لهذه الأخطاء. أعتقد شخصيا إن هو ده تحديدا اللي انتي تقصديه. لكن طبعا بحكم المشاكسة اللي في طبعك وفي دمك قدّمتي الموضوع كما لو كان ده فعلا "القصد" و"الهدف" وسبب الفصل!


على أي حال في النهاية كله زائل يا صديقتي الجميلة! خلال سنوات أو بالكتير عقود قليلة: لن يكون هناك لا عبود ولا حتى منتدى.. ولا روك ولا أمة.. ولا حبو ولا هيلانة.. ولا أنا ولا إنتي! خلينا بالتالي في "اللحظات" القليلة دي اللي بتجمعنا نختــار نحب بدل ما نشك، نسامح بدل ما نكره، نثق بدل ما نخاف، ونصلّح بدل ما نيأس. خلينا كمان نتذكر إن المحبة هي الإختيار الأصعب وليس العكس أبدا! كما قال أحد الكتاب في رواية شهيرة: «أسهل إنك تنسى نفسك في الكاس أو المخدّر من إنك تواجه الحياة وتتكيف معها.. أسهل إنك تسرق ما تحتاج من إنك تشتغل عشان تكسبه.. أسهل إنك تضرب طفل من إنك تربّيه.. يا إلهي، إن للحب تكلفته! الحب يحتاج جهدا وعملا!»

بالمثل: أسهل إننا نشك في نوايا الإدارة من إننا نثق فيها وحتى نرفعها هي نفسها لمستوى ثقتنا.. أسهل إننا ندينها من إننا نفكر ونبحث ونلتمس لها ألف عذر.. أسهل إننا نيأس أخيرا من إننا نفضل ننادي ونطلب ونسأل ونكتب لها.. ولكن أيضا في المقابل: أسهل إننا نحذف رسالة من إننا نناقشها.. أسهل إننا نغلق موضوع من إننا نكتب ونحذر ونحاول نصحح مساره بدلا من إعدامه.. أسهل إننا نفصل عضو ـ بغض النظر تماما عن السبب ـ من إننا نصححه لو كان مخطئ، نعالجه لو كان مريض، نعلّمه لو كان جاهل، وقبل كل شيء ـ كما علمنا إلهنا ـ نحبه حتى لو كان عدو! نسامحه إذا تعدّى ونصلي لأجله لو إننا في النهاية تماما عجزنا!

حقا «يا إلهي، إن للحب تكلفته! الحب يحتاج جهدا وعملا!»


​

طب إيه رأيك لو قدمنا إلتماس لمجلس اتحاد الكورة :spor2:

نرجوه فيه بعودة اللاعب المذكور أعلاه

و نتعهد فى الإلتماس بأنه (فى حال عودته) لن يتكلم عن الكيكى :2:


إيه رأيك ؟؟

​

 

[خادم البتول]

أتفق طبعا مع هذا الرأي تماما. على ما أعتقد تم تقديم التماس بالفعل، أو حتى التماسات، ولكن ليكن.. التماس واتنين وعشرة ومائة. ومش بس التماس بعودة عبود، أيضا بالإفصاح عن أسباب فصله لمناقشتها أو على الأقل مراجعتها.. انتي ليه بتفترضي مقدما إن "الكيكي" هو السبب؟

اقترح أيضا الاتصال بالمشرفين، خاصة المعروفين بالنضج والموضوعية والأمانة زي أستاذنا الحبيب أيمن، أستاذنا الحبيب عبد يسوع المسيح، إلخ. أولا المشرف ده هو نفسه رأيه إيه في عبود عموما ومسألة فصله بوجه خاص.. ثانيا هل من الممكن يساعدنا في رفع التماسنا للإدارة؟

طيب ليه المشرفين، إذا كانوا ـ فيما يبدو ـ لاحول لهم ولا قوة، خاصة في ظل وجود القيصر وسطوته المعروفة، ناهيكي عن الإمبراطورة؟

الحقيقة فيه كذا مسألة في الموضوع ده يا إيريني عليزين ناخد بالنا منها. خلينا نعرضهم باختصار في نقط واضحة ومفصّلة:

* * *
​

المسألة الأولى:

مسألة إن الإدارة لا تفصح عن أسباب الفصل: أحيانا تفسير ده هو إن الإدارة ببساطة لا تستطيع الإفصاح. مثال: أنا قررت ـ لسبب أو لآخر ـ إني اقوم بـ"التصنت" على أختنا "حبو أعداءكم" ومراقبتها. اكتشفت بعد فترة إن المذكورة هي في الحقيقة شخصية "سلفية" اسمها الحقيقي "ثُمامة بنت عبد الرحمن"، عضوة نشطة في الدعوة السلفية وأحد مؤسسي "المرصد الإسلامي لمقاومة التنصير"! هنا أنا ـ كإدارة ـ لازم أفصل طبعا "الأخت"، ولكني أيضا لا أستطيع الإفصاح عن السبب! ليه؟ لأن "التصنت" من الأصل فعل لا أخلاقي ـ على الأقل من وجهة نظر "الشعب"!

طبعا المشكلة هنا إنه لا يمكن إثبات العكس أبدا، أو حتى مراجعة المعلومات دي مرة تانية، أو على الأقل توضيح إن "حبو" بالذات لا يمكن أبدا يكون اسمها "ثُمامة"!

وطبعا لا أقصد إن الإدارة عملت كده فعلا أو أي شيء شبه كده. ده فقط مثال لماذا لا تستطيع الإدرات عموما أو "السلطة" الإفصاح عن أسبابها أحيانا.


من هنا اقترحت الاستعانة بالمشرفين. مش لتكوين "جبهة ضغط" داخلي، ولكن فقط لأن هذا المشرف أو ذاك قد يكون أقرب للإدارة وتستطيع بالتالي الإفصاح له على انفراد. المشرف طبعا لن يفشي بعد كده "السر" للشعب، وإنما بس ح ينوب عن الشعب بالرد والمراجعة والمناقشة، أو ـ في أسوأ الأحوال ـ ح يرجع للشعب يأكد له حتمية القرار ووجاهة أسبابه تماما.

* * *
​

المسألة الثانية:

المسألة التانية تتعلق بالشعب نفسه. رغم إن أغلبية الأعضاء ـ فيما أعتقد ـ مع عبود، هناك أيضا أعضاء ضد عبود. بالعكس انتي وحبو واللي زيكم بيعتبروكم "شلة عبود"! الناس دي المعارضة ـ وهم من أجمل أعضاءنا ـ لابد يكونوا أيضا في اعتبارنا. زي ما انتي كده بتقولي «راجل جدع وخدوم» غيرك بردو بيقول «أناني وكهين وألعبان»! ولما انتي تقولي «بحري وبنحبوه» غيرك بيرد في سره «أحبوش.. قطيعة تقطعه وتقطع ايامه»!

هذا الانقسام داخل الشعب وهذا الاتهام بـ"الشللية" انتي نفسك للأسف بتأكديه مش بتنفيه. إنتي نفسك ربطتي موضوعاتك ودورك وكل عطائك للمنتدى بشخص واحد اسمه عبود! انتي نفسك بتقولي متقدريش تكتبي بدون عبود، اللي هو على حد تعبيرك "صانع الألعاب الوحيد"! انتي نفسك قفلتي الباب مقدما على نفسك.. وعلى شلتك! باختصار انتي نفسك ـ بدون قصد طبعا ـ أصبحتي عضو كبير ليس في المنتدى ولكن في شلة عبود!

يعني إيه تيجي النهارده ـ ومعاكي كل الناس الجميلة دي اللي حضرت تعزيكي في واحد من أكبر موضوعات العزاء بالمنتدى ـ توعدي بموضوع وبعدين تعتذري عنه لأن عبود مش موجود؟ أنا شخصيا عارف إنه صعب جدا عليكي تكتبي في غيابه، وقلت ده بالفعل. لكن انتي ازاي تجاوزتي كل الناس دي؟ وهو ليه أصلا لازم موضوعاتك تاخد دايما نفس الأسلوب والطريقة المعهودة مع عبود؟ وهو ليه حتى ما يكونش الموضوع في النهاية فعلا رِخم وماسخ وفاشل ومالوش أي لازمة، بس مع ذلك تكتبيه ولو تحية للناس دي، اللي أكيد فيهم على الأقل واحد مهتم فعلا يعرف اللي جرالك في محنتك الأخيرة؟ إيه اللي يمنع يعني؟

طبعا لا أدينك أبدا، مش ده أبدا هدفي. ولكن "الشللية" بالفعل مرض من أمراض هذا المكان. أعرف شخصيا بعض الناس تركوا المنتدى كله بسبب عبود وشلته. مش لأنها "شلة وِحشة" لا سمح الله، أبدا، ولكن لأنها شلة قوية لا يمكن مواجهتها، لا يمكن الحياة إلا في ظلها ومباركة أصحابها! شلة بلغت سطوتها إنها بالفعل قسمت المنتدى في النهاية قسمين: "قسم ديني" فيه شوية دروايش تقريبا لا يخرجوا أبدا منه، زي أيمن وحياة وخادم، بالإضافة طبعا لمجوعة الجزارين بتوع اللاهوت الدفاعي، و"قسم عام" تحت رئاسة عبود وصحبته!


علينا بالتالي ـ بالإضافة للالتماسات والاتصالات مع المشرفين ـ إعلان انتماءنا أولا وتجديده. على أعضاء هذه الشلة تحديدا ـ وانتي غالبا أبرزهم ـ العودة ليكونوا أعضاء أولا بالمنتدى وليس بشلة أي عضو بعينه. هنا الإدارة والناس كلها ممكن تبدأ تسمعنا أخيرا.. هنا يكون كلامنا وجهدنا ووقتنا والتماساتنا وطلباتنا بعودة عبود... كل ده يكون نابع من "انتماء" حقيقي للمكان أولا، يتوجه فعلا وبإخلاص لأجل "منتدى الكنيسة"، لأجل "جميع أعضاء منتدى الكنيسة"، ليس أبدا لأجل منتدى عبود.. أو أيمن أو خادم أو أي شخص بعينه.


طوّلنا أوي ولسه فيه على الأقل مسألتين! خلينا ناخد على الأقل مسألة واحدة كمان دلوقتي.. نبدأ بعون الله رسالة جديدة.


​

 

[خادم البتول]

المسألة الثالثة:

ما زلنا مع "انقسام" الشعب واختلافه حول المدعو عبود!

أستاذنا الحبيب وكاتبنا الأنيق الأستاذ طارق "ريديمبشن" اللي حارمنا دايما من طلته وحضوره.. أستاذنا الحبيب باول بلبل العراق الجميل وأحد محطات الطاقة الرئيسية بمنتدى الكنيسة.. قبل الجميع طبعا أستاذتنا الجميلة الدكتورة روز "ديزيرت روز" سفيرتنا في أمريكا: الأعضاء الرائعين دول هم فقط مجرد عينة بسيطة من الأعضاء اللي اختلفوا بالفعل مع الأستاذ عبود ـ على صفحات الجرائد ـ والنهارده بالتالي أعتقد إنهم في الفريق المعارض، ربما حتى المعارض بكل قوة، لعودته.

السؤال هو: بغض النظر تماما عن شخصية عبود، حتى بافتراض إن عبود بالفعل أخطأ وبالفعل أساء لكل الناس دي، هل هذا بحد ذاته يبرر "فصل" عبود؟ هل هذا بحد ذاته يبرر وقوف الناس دي كلها الآن ضد عودته؟

بعبارة أخرى: نحن جميعا أبناء ثقافة لا تعرف أبدا الاختلاف ولكن فقط تعرف "نفي" الآخر. إسكاته.. إزالته.. إبادته.. إعدامه! أخوتنا السلفيين، على سبيل المثال، يتمنوا وبيصلوا ربنا يبيــد جميع النصارى ولن يشعروا أبدا بالراحة إلا إذا تحقق ذلك.. أخوتنا الليبراليين، بدورهم، بيحلموا ببلاد خالية تماما من كل هؤلاء الرعاع الوهابيين اللي ضيّعونا وضيعوا حضارتنا الله يلعنهم.. حتى المسيحيين، أهل المحبة والتسامح، أصبح بعضهم على الأقل، مضطرا، يفكر بنفس الطريقة!

هنا المشكلة مش إن الوهابيين، مثلا، ضيّعوا فعلا حضارتنا وللا ده مجرد افتراء ومبالغة. هنا المشكلة إنهم موجودين بالفعل في حياتنا: هل فعلا الحل نطردهم، ننفيهم، نعدمهم، نقضي عليهم، وللا فيه حلول أخرى ـ حلول قد تكون بالعكس أفضل وأنبل وأجمل وأرقى، أكثر تأكيدا لإنسانيتنا وحتى لحضارتنا نفسها؟

* * *​

بالمثل: احنا مش محتاجين أبدا "نفصل" عبود لأنه شخص مثلا سيء ـ بافتراض إنه فعلا سيء! ليس الحل أبدا هو نفي الآخر أو طرده، خاصة في مجتمع مفتوح على الإنترنت يستطيع فيه أي إنسان أن يتجاهل رسائل أي إنسان آخر. هذه الممارسة بكاملها ليست إلا انعكاس لثقافة أكبر، ثقافة بدائية منحطة مريضة، ورثناها جميعا للأسف دون وعي والآن تحكمنا وتتحكم حتى بأفكارنا ومشاعرنا! هذه ثقافة قوامها ببساطة هو أن «الأخر: كافر» وهو أن «الكافر: تُقطع رأسه»!


نحتاج بالتالي إضافة لكل ما سبق ـ إضافة للالتماسات والاتصالات وتجديد الانتماءات ـ أن نزرع مع أخوتنا جميعا وأن ننشر فيما بيننا جميعا ثقافة أخرى جديدة، ثقافة مسيحية حقيقية، تقبل الآخر وتحتفي بالاختلاف معه. ياريت كل أخوتنا بالذات المعارضين يوصلهم كلامنا وحسب مشيئة ربنا أكبر عدد منهم يقراه. يعني في أسوأ الأحوال نعم، هو "شخص سيء جدا"، فرضا في أسوأ الأحوال، لكني مع ذلك أقبل طبعا حضوره ولا أنكر أبدا حقه في الوجود وفي الحياة! وإلا بنفس المنطق يبقا أنا كمان مهدد دائما بالنفي والطرد والإعدام في أي لحظة "أقع" فيها في أي مجتمع "آخر".. وهناك دائما مجتمع آخر!

لذلك احنا بنخاف.. تركنا المحبة فكانت عقوبتنا الخوف.. أعدمنا الآخر داخلنا وفي أول فرصة قدرنا أعدمناه أيضا خارجنا.. كانت النتيجة إن الخوف دخلنا وعشش فينا، ببساطة لأننا بدون ما نشعر حكمنا على نفسنا أيضا بنفس حكم الإعدام! أصبحت حياتنا كلها تهديد مستمر واحتمال مفتوح للإعدام في أي لحظة وأي مكان!

* * *​

أعتذر عن الإطالة ولكن هي دي تقريبا أهم المسائل اللي يجدر طرحها والالتفات ليها في هذا السياق. يمكن المسألة الأخيرة بالذات تاخد طبعا شوية وقت، لأن دي ثقافة بيتم زرعها ونموها تدريجيا. لكن في النهاية كل طريق يبدأ بخطوة، وعلينا أن نوقد ولو شمعة. الشمس دي ربنا بس اللي ممكن يبعتها، لكن احنا خلينا مبدئيا على الأقل نحلم بالنور!


أيضا أعتقد دي نهاية حوارنا الجميل يا ست إيريني.. يا غزال اسكندرية.. أشكرك في الختام وأشكر حضورك ووقتك.. أشكر أيضا كل أحباءنا اللي يمكن يكونوا متابعين. تمنياتي أن يعود منتداكم أجمل مما كان، بمحبة ووعي وثقافة أجمل مما كانت، حتى بعبود جديد أجمل مما كان وإدارة جديدة أجمل مما كانت، مع عاطر تحياتي وعلى المحبة دائما نلتقي.



​

 

[+إيرينى+]

أتفق طبعا مع هذا الرأي تماما. على ما أعتقد تم تقديم التماس بالفعل، أو حتى التماسات، ولكن ليكن.. التماس واتنين وعشرة ومائة. ومش بس التماس بعودة عبود، أيضا بالإفصاح عن أسباب فصله لمناقشتها أو على الأقل مراجعتها.. انتي ليه بتفترضي مقدما إن "الكيكي" هو السبب؟

اقترح أيضا الاتصال بالمشرفين، خاصة المعروفين بالنضج والموضوعية والأمانة زي أستاذنا الحبيب أيمن، أستاذنا الحبيب عبد يسوع المسيح، إلخ. أولا المشرف ده هو نفسه رأيه إيه في عبود عموما ومسألة فصله بوجه خاص.. ثانيا هل من الممكن يساعدنا في رفع التماسنا للإدارة؟

طيب ليه المشرفين، إذا كانوا ـ فيما يبدو ـ لاحول لهم ولا قوة، خاصة في ظل وجود القيصر وسطوته المعروفة، ناهيكي عن الإمبراطورة؟


​

قيصر مين دا الل عنده سطوة ؟ :smil13:

دا أنا بأحسب الامبراطورة رفدته

ال سطوة ال :2:

و بعدين الكيكى ديه رقصة يتقال عليها هى مش هو :w00t:

أيمن بيكتب آيات سفر الأمثال على الفيس

باين عليه رفد نفسه من اتحاد الكورة

:blush2:

عبد يسوع المسيح مش بيرد على الأسئلة و الأجوبة المسيحية

الل هو مشرف عليها

باين عليه رفد نفسه روخر

:08:

​

 

[+إيرينى+]

المسألة الأولى:

مسألة إن الإدارة لا تفصح عن أسباب الفصل: أحيانا تفسير ده هو إن الإدارة ببساطة لا تستطيع الإفصاح. مثال: أنا قررت ـ لسبب أو لآخر ـ إني اقوم بـ"التصنت" على أختنا "حبو أعداءكم" ومراقبتها. اكتشفت بعد فترة إن المذكورة هي في الحقيقة شخصية "سلفية" اسمها الحقيقي "ثُمامة بنت عبد الرحمن"، عضوة نشطة في الدعوة السلفية وأحد مؤسسي "المرصد الإسلامي لمقاومة التنصير"! هنا أنا ـ كإدارة ـ لازم أفصل طبعا "الأخت"، ولكني أيضا لا أستطيع الإفصاح عن السبب! ليه؟ لأن "التصنت" من الأصل فعل لا أخلاقي ـ على الأقل من وجهة نظر "الشعب"!

طبعا المشكلة هنا إنه لا يمكن إثبات العكس أبدا، أو حتى مراجعة المعلومات دي مرة تانية، أو على الأقل توضيح إن "حبو" بالذات لا يمكن أبدا يكون اسمها "ثُمامة"!

وطبعا لا أقصد إن الإدارة عملت كده فعلا أو أي شيء شبه كده. ده فقط مثال لماذا لا تستطيع الإدرات عموما أو "السلطة" الإفصاح عن أسبابها أحيانا.


من هنا اقترحت الاستعانة بالمشرفين. مش لتكوين "جبهة ضغط" داخلي، ولكن فقط لأن هذا المشرف أو ذاك قد يكون أقرب للإدارة وتستطيع بالتالي الإفصاح له على انفراد. المشرف طبعا لن يفشي بعد كده "السر" للشعب، وإنما بس ح ينوب عن الشعب بالرد والمراجعة والمناقشة، أو ـ في أسوأ الأحوال ـ ح يرجع للشعب يأكد له حتمية القرار ووجاهة أسبابه تماما.


​

لا تستطيع الافصاح ؟!

هار اسوح :cry2:

المسألة ديه ف حد ذاتها مصيبة سودة

ليه ؟؟

يعنى يا راجل تعرف ان حبو اسمها الحقيقى "ثُمامة بنت عبد الرحمن" :w00t:

و انها عضوة نشطة في الدعوة السلفية وأحد مؤسسي "المرصد الإسلامي لمقاومة التنصير"


يعنى تعتبر مصدر خطر على باقى الأعضاء

و ما تديش كلاكس تحذير لباقى الأعضاء من هذه العضوة ؟؟! بدعوى إنك عرفت بأسلوب غير أخلاقى ؟؟!!! :t9:

طب إدينا كلاكس يا أخى ( بيب بيب) ( تات تات) ( أعوعا أعوعا)

يا أخى إلحقنا قبل ما تيجى بنت عبد الرحمن تقلعنا ملط و تنفخنا :w00t:

الحالة ديه ما ينفعش تكون سر _ لا يا خويا إفشى السر الخطير الفظيع

لو الادارة فعلا كدة _ تبقى ما يهمهاش باقى الأعضاء

و فى الحالة ديه : دا إحنا ما نطلبش رجوع بنت عبد الرحمن

لا دا إحنا نرفد نفسنا من المنتدى بلا عودة

مش عشان حبو من مؤسسى المرصد نووووووووووو

عشان الادارة خالفت قوانين المنتدى و التى لا تمنع أحد أى كان إنتماؤه من المشاركة ف المنتدى
_____________

إيه الل يمنع إن مؤسسى المرصد الإسلامي لمقاومة التنصير يبقوا أعضاء معانا ؟؟

ما يبقوا يا أخى

اللا ؟!

حاجة غريييييييييييييبة :t9:

​

 

[+إيرينى+]

ح ارجع لك بعد شوية لمناقشة باقى المسائل

ح أنزل أقف ف طابور العيش :love34:

​

 

[عبد يسوع المسيح]

يا باشمهندسة حتى موضوع التعزية قلبتيه مظاهرة
استاذى خادم البتول اشكر محبتك وانا فعلا بحاول اوصل لسبب فى موضوع عبود ولو عرفت حاجة ينفع تتقال مش هاخبى ..
انا متواجد يا باشمهندسة اغلب الوقت مارفدتش نفسى ولا حاجة ومش معنى ان فى مواضيع مش بارد عليها اكون مش موجود حتى لو فى القسم بتاعى لان ممكن يكون حد تانى دخل رد رد وافى او مش عارف مثلا رد السؤال ومستنى حد تانى يرد او اجابتى ممكن تكون معثرة لحد وتفتح باب للجدل القسم فى غنى عنه ويكون فى غيرى يرد بحكمة اكتر ..