بصوا هو موضوع غريب جدا بس في نفس الوقت مهم جدا
انا لاحظت وجوده في المنتدي
وفي بنات بتخلي بالها في التعامل مع العضو ده
وفي بنات تانية بتتعامل بطبيعتها من غير ما تفهم العضو ده كويس وبتكون النتيجة مش حلوة
ممكن البنت تتعلق بالعضو ده بشكل او بآخر حتي لو اتعلقت بيه لمجرد الكلام كأخ او صديق
في عضو تلاقيه كلامه جميل جدا ومعسول
وتلاقيه مهتم بيكي اكتر من اي عضوة تانية
ويانهاري بقي لو كنتي متضايقة تحسي انه هيولع في روحه علشانك
ويحب يتكلم معاكي علي طول وتلاقيه بيقولك علي اسرار تخصه ( مع العلم ممكن تكون غلط وده الارجح بس لمجرد انه يحسسك بالامان )
وكمان تلاقيه بيحذرك من اعضاء تانيين في المنتدي وتقريبا هيكون كلهم اولاد ( نصيحة مني مش تاخدي كل الكلام ثقة وفي نفس الوقت مش تهملي كل الكلام لان ممكن يكون صح وممكن يكون غلط )
ومرة واحدة تلاقيه بدأ يسحب نفسه ومش عايز يتكلم معاكي تاني
ده طبعا راجع لاسباب كتيرة ممكن يكون لانه لقي عضوة تانية جديدة عايز يقربها منه وانتي خلاص وقتك انتهي
اخر نصيحة مني للبنات لو سمحتوا احتفظوا بخصوصياتكم لنفسكم واللي اقصده بالخصوصية مش شرط الاسرار لا كمان بياناتك الشخصية والصور والكلام بالمايك علي الخاص
انا بكتب الموضوع ده وبصراحة مش عارفة ايه مصيره ممكن يكون الحذف وممكن يكون النقل وممكن يفضل زي ما هو بس اللي اعرفه ان كان عندي رسالة وحبيت اوصلها لكل بنت لان كلهم اخواتي
ربنا يرحمنا ويحافظ علي كل بناته
اسفة للأطالة
