رد على: موضوع مهم رجاء دخول الأخوة المسلمين والمسيحيين أيضاً
الاخ او الاخت موني
اولا الموضوع هام فعلا كما ذكرت ولكن دعني اولا اسالك بعض الاسئلة :::_
انت تتحدث عن حال المسيحيين في مصر ولا فى البلاد العربية ولا العالم؟؟
هل يا اخي كان تعليمك في الكنيسة ولا فى المنزل ولا في المدرسة ؟؟؟
هل اللي كانو معاك في الفصل مسيحيين فقط ولا كلهم مسلمين ولا فيهم مسلمين وفيهم مسيحيين ؟؟
هل كانوا ياكلون اكلك او يخفون ما معك باسم الاسلام ويقولوا لك انك مسيحي ويطردوك من الفصل ؟؟؟
هل اتممت تعليمك بالجامعة ؟؟؟
هل كان الدكتور او المشرف على المادة (( المسلم )) يقول لك انك لا تستطيع ان تتعلم لانك مسيحي وان التعليم للمسيحيين فقط ..
هل كل الزملاء المسلمين كانو بيقوموا من جنبك لما تقعد معاهم علشان انت مسيحي .
هل نجحت في مادة وبعدين سقطوك علشان انت مسيحي او اخر كل سنة بيرفضوا يدولك شهادات علشان انت مسيحي ؟؟؟؟ .
وبعدين عايز اعرف انت ساكن فين ؟؟؟
يعني مثلا انا ساكن في مكان زى عين شمس وعزبة النخل ... واخويا ساكن في شبرا وعمرنا ما طردنا واحد مسيحي من جنبنا وقلناله اسكن بعيد عننا ... ولما بنشوف حد مسيحي عمر ما حد فينا حدفه بالطوب !!!
هل في مرة وانت نايم هجم عليك مسلم وسرق منك حاجة او ضربك علشان انت مسيحي ...
هل رفضتم في مرة ان اى مسلم يسكن عمارتكم الي عليها صليب من اول المدخل وعلى كل شقة ...
هل في الشغل كنت قاعد على كرسي وجه واحد مسلم قالك قوم من على الكرسي وزعقلك وقالك انت مسيحي ...
يا اخي اتقي الله واعطي كل زي حق حقه
المرادي انا سألت بعض اسئلة والمرة الجاية ممكن نتناقش حول اسباب الصراعات سواء فى الصعيد او الدلتا
تحياتي ودعائي لكم بالهداية
الأخ العزيز سياج:
أشكرك لإهتمامك ولردك.
أنا أخوك موني من سكان منطقة قريبة منك.
أنا بتكلم في موضوعي عن إنعكاس أي أزمة بين الغرب والإسلام على مسيحيي الشرق.
ولكن بما إنك سألت الأسئلة ديه أحب أقولك:
في أيام المدرسة كنا بنتعامل معاملة خاصة لأننا مسيحيين زي مثلا الخروج من الفصل في حصة الدين وده مش مشكلة لكن لو مدرس الدين المسيحي مش موجود كنا بنجبر على حضور حصة الدين الإسلامي.
مرة من المرات كان مدرس الدين الإسلامي مش عارف إن المسيحيين موجودين في الفصل لأنه كان مدرس جديد وأهان المسيحيين إهانة بالغة ووصف الكتاب المقدس والعقيدة المسيحية بالبطلان.
مرة أخرى تم استبعادي من مسابقة أوائل الطلبة لأني مسيحي ومش حافظ قرآن كويس.
أصلا تدريس القرآن ضمن مادة اللغة العربية ده في حد ذاته إنتهاك لحرية الطلبة المسيحيين.
وعموما مش عايز أحكيلك كل المواقف اللي حصلت معايا على مدار حياتي لأن الموضوع مش موضوع شخصي الموضوع لو قريته من أوله هتعرف إني بتكلم بشكل عام عن إنعكاس أي أزمة زي أزمة الرسوم المسيئة لنبي الإسلام على حياتنا هنا في مصر.
شكرا لمتابعتك ودعوتك بالهداية