حصلت معايا حكايه تاني محرجه اكتر من الاولي
في مره نزلت انا وزوجي علشان نشتري جهاز تليفزيون وبعدين لما دخلنا المعرض كبير جدا ومليان اجهزه اشكال والوان المهم روحنا في قسم التليفزيونات وبعدين الموظف المسؤل عن القسم ده قابلنا بالتحيا والكلام البكش ده كله
المهم كل مانمشي يمشي ورانا نروح القسم ده نلاقيه ورانا نسيبه ونروح قسم تاني برده ورانا
ومصصم انه يشرح لنا مزايا كل جهاز وانا من طبعي ما احبش اي حد يقف فوق دماغي ولا يشرح لي خصائص الحاجه اللي انا عاوزه اشتريها لاني انا رايحه وعارفه ها اشتري ايه
وبعدين بصراحه زهقت منه قوي والموظف ده كان شكل الهنود او الباكستانين حاجه زي كده يعني
وبعدين انا اتغظت قوي منه لانه مش عاوز يسبنا ويمشي
رحت قولت لجوزي بصوت عالي شويه هو ده مش عاوز يسبنا ويمشي هو ها يفضل واقف فوق دماعنا كده انا مش عارفه اخد حريتي واتفرج براحتي
بعد كده ما فيش دقيقه والموظف ده سابنا ومشي
ولما قررنا ها نشتري روحنا علي الخزنه عشان نخلص الشراء ونتفق علي الدليفري
بصيت لقيت الموظف ده تاني جاي جري ووقف معانا علي الخزنه - وبعدين قولت لجوزي زعبولا القله رجع تااااني اهو - بصيت لاقيته ضحك بصوت عالي وقالي بس حلوه زعبله القله
دي ههههههههههههه وبعدين قلت له انت مصري قالي أه انا من سوهاج ههههههههههههههههه
انا بقي رحت اصفريكا واحمريكا واخضريكا وكل الالوان ظهرت علي وشي
وبعدين هو فهمني انه لازم يعمل كده عشان ياخد عمولته من البيع
يعني اي زبون يدخل المعرض وهو اقنعه يشتري اي حاجه ياخد عمولته
جوزي قالي حرام عليكي كنتي عماله تطفشي فيه وكان ها يخسر عمولته