في ذكراك يابابا السابعه
غمضت عيوني وبقيت سامعه
سامعه صوت ضحكتك وانت جاي
سامعاك بتقولي اعمليلي الشاي
وسمعتك وانت بتقولي متخليهوش مسكر
عشان انتي عارفه ابوكي عنده السكر
وسمعت صوتك بيندهلي
سامعاك بتقولي علي مهلي
سمعتك وانت بتقولي ياننوسة
تعالي علي خد بابا وهاتي بوسة
وسمعتك وانت بتقولي متزعليش
وطول مانا عايش ماتعيطيش
وفضلت مغمضة عيوني بس مابقتش سامعه .. المرادي بقيت شايفه ..!
شوفتك وانت بتتوجع من التعب بأنين
وشوفت ماما بتديلك حقن الأنسولين
وكمان شوفتك وانت في المستشفي تعبان
وولادك من الحزن عليك مش شايلهم مكان
شوفت نظرة خوف في عنيك
خايف علينا من بعديك
وضمتنا ولمتنا كلنا حواليك
وبرضو شوفتك اما خرجت من المستشفي ورجعت البيت
واليوم دا كانت صحتك بسم الصليب زي الحديد
وكلنا كنا فرحانين وبنقول يارب في عمره زيد
وفاجئة واحنا قاعدين مبسوطين
قولتلنا هقوم انام تغفيله
قاعدنا ساعتها مقبوضين
بس مكناش نتوقع انها هتكون النومة الاخيرة !!
وروحت يابابا وكل شئ معاك راح
راح احن اب في غمضة عين
راح اللي عايشنا اجمل سنين
راح الحضن الحنين
راح اللي ياما تعب ولا كان بيبين
راح اللي كان بيمسح دموع العين
راح وبقينا منه محرومين
راح وفضل مكانه الأنين
راح يارب وانت لينا معين
..
وحشتني اووي يابابا
