سلام ونعمة
فى البداية احب اؤكد انى مش حابة انتقد الدين الاسلامى ولا عقيدة الاخوة المسلمين كل ما فى الموضوع هنا مجرد متابعة واستنتاج لاسلوب البشر ومنهجهم فى العيشة والعبادة .
مجرد تساؤولات واستفسارات احنا ليه كبشر بنخاف اكتر مبنحترم مبنجيش غير بالتهديد والتخويف
انا طبعا ضد ده تماما وعمرى مقتنعت لحظه بان الترهيب والتخويف ممكن يكون اسلوب عقيدة او
ينفع يكون دى الطريقة اللى ربنا بيعامل بيها عباده او يصح من الاساس انه يكون موجود نصوص فى كتاب سماوى بتنص على القتل والتعذيب والنار والدود اللى بياكل فى هياكل الجسامين ، جو رعب ..
وبشعر انى بشاهد فيلم رعب قديم ومبتذل وده ملوش علاقة ابدا بايمانى الكامل بالحساب الاخير ووجودنا فى الفردوس بعد الحساب والمحاسبة عن كل افعالنا اثناء حياتنا على الارض .
الموضوع وباختصار يا اخوتى انى بلاحظ اخواتنا المسلمين ملتزمين جدا جدا بمواعيد صلاتهم !!
بمجرد ميسمعوا الادان تلاقى اغلبية المسلمين سواء رجال او سيدات يستعدوا لاداء صلاتهم طبعا انا عارفة كويس انه مش لازم لانهم واقفين بيصلوا يبقا فعلا دول اشخاص كلهم روع وتقوى وايمان ممكن جدا يكون القلب فى وادى والعقل فى وادى تانى خالص وبشوف كمان ممكن يكون حرامى وبيسرق فى الميزان يسمع الادان يجرى يدخل الجامع لاداء الصلاة او مختلس ومرتشى مبيفوتوش ميعاد الصلاة
مش هتكلم على الناس وتصرفاتهم وقلوبهم جواها ايه اكتر ما انا عاوزة اتكلم علينا احنا ، احنا ليه مش كده ؟؟
مش كده بمعنى .. اننا افعالنا تكون مش كويسة ونحترم ميعاد الصلاة لالا بقصد ليه معندناش نقطة احترام ميعاد القداس
ليه معندناش نقطة احترام ميعاد الصلاة ؟؟ حتى لو كانت صلاة باكر الصبح بدرى ،
طيب ماهو المسلمين بيصحوا الفجر يصلوا وفى منهم كمان اللى بيصحا وينزل من بيته يروح الجامع يصلى ويرجع يكمل نومه
بصراحة يا جماعة انا متغاظه جدا ومدايقة جدا وزعلانه مننا جدا جدا لان احنا ربنا مديلنا كتاب سماوى روحانى ربنا وهبلنا محبة وحياة ابدية احنا مفديين بدم المسيح ومع ذلك مش مقدرين دا خالص ، ومش عاوزه نضحك على نفسنا ونقول لا فى مننا اللى بيروح القداس بانتظام وبنصلى من الاجبية بانتظام اه فى لكن الاغلبية مننا مبيصليش وان صلى مبيكونش من الاجبية ومبيقراش فى الانجيل وان قرا كل ما بيفضا ومبيصوموش وان صاموا بيكون مش انقطاعى يعنى من الاخر بيضحك على نفسه وفاكر انه بيضحك على ربنا
فى ناس كتير جدا مننا كده لدرجة انه فى ناس ممكن تأعد بالشهر متدخلش الكنيسة ودا لانه القداس بيكون الصبح بدرى وسمعتها اكتر من مرة ابونا بينبه انه فى قداسات بتتعمل الضهر علشان
البهوات اللى مبيقدروش يصحوا بدرى طيب بالذمة دا اسمه كلام
يعنى هو كان لازم يكون عندنا عذاب القبر والدود اللى هياكل فينا وغيره وغيره من العذابات اللى بيخوفوا بيها الناس علشان احنا نحترم نفسنا ونقرب من ربنا ونقف نصلى
علفكرة حتى اولادنا انا لما بشوف الولاد المسلمين بلاقى العيال بيصوموا لحد المغرب ويصلوا فى الجامع وملتزمين انا عارفة وواثقة ان دا مش عن ايمان ومحبة فى الوقوف اودام ربنا ومش بفضل دا خالص اننا نوقف اودام ربنا خوفا من ربنا وليست محبة لكن اللى حاصل بيؤكد اننا لازم نخاف علشان ندى ربنا حقه
الناس دول علشان اتربوا وبيربوا ولادهم ان اللى مبيصليش بيدخل جهنم وبيحصل فيه كدا وكدا ...
فبيلتزموا بمواعيد الصلاة ، اما احنا فمعندناش الجو ده تيجى تقولى لبنتك او لابنك مثلا وحدس ولا حرج .. صوم يا حبيبى صيام ماما العدرا دول 15 يوم يا حبيبى حرام ماما العدرا تزعل منك يقولك ما انا بصوم اسبوع الالام
وبعدين هو انا يعنى لازم اصوم علشان ماما العدرا تحبنى وان صاموا بيكونوا متكدرين علشان حاسس انه لو مصمش مش هيحصله اى حاجه وربنا هيسامحه وهيروح يعترف ويتغفرله انه مصمش
والكبار كمان ماشيين على نفس المنهج ودا كله بيدل على حاجه واحدة وهى
ان البشر بيخافوا ولا يختشوش .
شاركونى بأرائكم شايفين كده فعلااللى بيحصل هو ان الانسان مخلوق جبان بيخاف من العذاب
خوفه وحرصه على حياته اكبر واهم من محبته لربنا ؟؟
التعديل الأخير:
