طيب انا هرد علي حاجات معينة دلوقتي وممكن ارجع اكمل بعدين...بس انا عايزة أقول علي حاجة....الموضوع مش مباراة بيني وبينك ولا عمره كان مباراة بيني وبين اَي حد....ومش بحاول أني اكسب النقاش....انا فعلا شايفة انك عندك مشكلة في طريقة تعاملك مع الدين ورؤيتك لله...وكلامك بيوضحلي مش هنا بس ولكن في مواضيع تانية انك كمان عندك فهم مغلوط للمسيحية ككل...وانا بردو مش ببشرك بالمسيحية....عارف لو كنت قولت انك ملحد ولا لا ديني كانت هتبقا اهون من انك تاخد اجزاء من الدين وترمي الباقي علشان تريح دماغك....من رآيي انك عملت كده زي النعام ودفنت رأسك في التراب ......المهم
1-واضح انه فكرتي موصلتش عن تلاميذ المسيح....هحاول أوضحها اكتر....تخيل دلوقتي انه جه نبي وقال انه من عند ربنا ومجموعه آمنت بيه وكانت معاه وحواليه وسمعته وشافته وكل حاجة ومجموعات تانيه بعدهم اتعلمو من الناس ديه اللي كانت قريبة منه وأمنو بيه....قوم ايه...مجموعة منهم سواء من الجيل الاول او التاني او التالت قرروا انهم يتقولو أقوال علي النبي ده مقلهاش لمصلحة شخصية زي ما انت قولت....فده يخليني أشك ان الناس ديه كانت شايفة ان رسالته مش حقيقية وعلشان كده هما كانو معاه من البداية فقط للمصلحة...اقصد عارفين حقيقته يعني وبيستفيدو منه ومن تصديق الغلابة وخلاص...يعني ده يخليني أشك في النبي ده أصلا
وده يخليني اسآل سؤال انت لا تتبع سنة الرسول؟ ومجاوبتش بردو علي الآية اللي جبتهالك نعمل فيها ايه وهي بتقول انك لازم تطيع الله والرسول وأولي الامر
يعني عندك 3 لازم تطيعهم 1- الله وديه واضحة والمفروض انك تطيعه من خلال كلامه في القرآن كما تؤمن 2- الرسول وديه بقا انا مش عارفه بما انك رافض كتب التراث والاحاديث بتنفذ الآية ديه ازاي وتطيع الرسول؟ ومتقوليش انك بتطيع القرآن يبقا انت كده بتطيع الرسول...لان الآية بتتكلم عن 3 لازم تطيعهم الله لوحدة والرسول لوحده وأولي الامر كمان
2- انا مليش دعوة بالفطرة علي فكرة كتير من اللادينيين لازالو يؤمنو بوجود اله لأنهم كانو في يوم من الأيام مؤمنين بدين معين والانتقال من الايمان لعدم الايمان باله صعب جدا وعلشان كده ساعات بيفضلو في المنطقة الوسطية ديه اللي هي لا يُؤْمِن بدين ولكن يُؤْمِن بوجود اله للكون لكن في النهاية هو ميعرفش مين هو الاله ولا ايه طبيعته ....زي إيمان الشياطين ومفتكرش انك عايز إيمانك يكون زي إيمان الشياطين ....وإلا معني كده ان في نظرك اللادينيين والشياطين كده تمام وماشيين علي حق وبالفطرة ومش ناقصهم حاجة طالما هما مؤمنين بوجود اله للكون بس ميعرفوش هو مين ولا ايه طبيعته؟ كده خلاص بقا متدعيش حد للإسلام لما تقابل واحد لا ديني مفيش داعي تدعيه للإسلام طالما انه كده إيمانه كامل باله الكون ومش ناقصه حاجة...هتقولي لا هدعيه لديني علشان هو الحق... هقولك زي ما قال المسيح...وما هو الحق؟ ايه الزياده اللي هتقدمهاله في تعريف من هو الاله...هتقوله هو الاله الواحد الوحيد خالق الكون هيقولك شكرًا ما انا عارف او هيقولك زي ما قال محمد صبحي في المسرحية شكرًا روح لمامتك ههههههه اوعي تزعل انا بهزر
وبعدين فيه مشكلة كبيرة في الاله ده اللي مش عايز يعرف نفسه...ليه؟ امال نؤمن بيه ازاي ونتعرف عليه شخصيا ازاي من غير ما نعرف طبيعته ايه؟ ده من ابسط حقوقنا يعني ان نعرف مين هو اللي خلقنا وطبيعته...وزي ما قولتلك البعد الشخصي للمعرفة مش موجود عندك نهائي وديه حاجة انت مردتش عليها لأنك عارف انها حقيقية ....انت متعرفهوش شخصيا لانه بخل عليك انه يقولك هو مين وايه هي طبيعته وده جزء تاني من المعرفة مهم جدا جدا
3- بتقول ان طبيعة الله تنقسم لجزئين وانا هتكلم عن الجزء التاني اللي هو بتقول محدش شافه .....يعني هو انت كنت شوفت الله أصلا؟ امال بتؤمن بيه ازاي؟ متقوليش من الطبيعة تبقي ربوبي او لا ديني ...انت بتؤمن بيه من خلال القرآن رغم انك مشوفتش ولا عشت ايّام الرسول ولا عشت ولا شوفت ايّام كتابة القرآن ولا شوفت الله أساسا ورغم كده بتؤمن بكلللللللل ده
4- طيب كويس اخيراً قولت الحقيقة وخرجنا من حكاية الفهم ومش الفهم لانها مكانتش موضوعنا أصلا
5- مفهومك للوحي والنص المقدس ده مش قاعدة كل الناس ملتزمة بيها ....مفهومك ده جبته من طبيعة إيمانك ودينك اللي بيقولك الوحي ده ازاي او بيجي ازاي...لكن احنا مش ملتزمين بيها ولا حد ملتزم بيها...اذا انت حاصر ربنا في طريقة معينة يتكلم بيها وهي نصوص تنزل علي حد وميتكلمش بطريقة تانيه يبقا ديه مشكلتك انت انك حاطط الله في قالب جامد ...وهو مش كده
6- هههههه مش صعبة علي فكرة انك تقولي أدور علي ايه....مش انت بتتكلم بمنتهي الثقه وبتقولي فيه وفيه...يعني أكيد شوفت....ما تقولي طيب ايه الفيديوهات اللي انت شوفتها علشان اتفرج....مش صعبة يعني ده لو كان فيه أساسا :w00t:
7- هههههه انا مش عارفه ايه الحب اللي نزل عليك لعبود لا وشغال محامي كمان ليه؟ من أمته؟ مش زمان كنتو ناقر ونقير؟ خير ؟ ولا علشان دلوقتي كلامه واتجاهه بقا جاي علي هواك يا يسور؟ :gy0000:
لا ما هو انت مش واخد بالك ....الكلام اللي نقلته هيلانه ده بتاع عبود زمان ....إنما عبود دلوقتي حاجة تانيه خالص...وبعدين انا لا هزعل من عبود ولا هفرح بيه....انت تفتكر يعني ان انا عايزاه يبقا مسيحي يعني؟ أبدا كل واحد حر في إيمانه....انا كل اعتراضي علي اُسلوب الكلام والتلميحات النص كم ديه علي المسيحيين والمسيحية...وعلي فكرة لو كان كلامه صحيح مكنتش اتكلمت....لكن فكرة أني اقلب المجني عليه جاني واتهمه اتهامات باطله اعتقد ده شئ مستفز وميتسكتش عليه.... يعني مينفعش واحد سايق بسرعة وسكران وخبط واحد ماشي علي الرصيف واجي أقول للضحية انت ايه اللي خلاك تمشي في الشارع أساسا؟ اما انك قليل الأدب صحيح ....ينفع؟
وبعدين we need a disclosure هو كتب موضوع طويل عريض زمان اسمه لما كنت مسلما ولا حاجة كده...الكلام ده من كذا سنة...احنا لحد دلوقتي منعرفش هو ايه....مش لازم يقول انه بقا مسيحي....مش لازم يبقا مسيحي خالص...بس نعرف...يقول هو ايه ....زي ما هو عارف اننا مسيحيين ومش بس كده عارف طوائفنا كمان أظن من حقنا نعرف هو ايه...انت مسلم أهو ....فيها حاجة ديه؟ بس كلنا عارفين احنا بنتعامل مع مين...هتقولي الايمان ده حاجة شخصية....فعلا حاجة شخصية جدا...ده لما نكون في منتدي كورة قدم....إنما أظن المنتدي واضح انه مسيحي تبشيري مش مفاجئة يعني....وبعدين هو اللي دخلنا في قصة إيمانه او رحلة إيمانه من البداية محدش سآله ....يبقا احنا محتاجين فعلا disclosure وخصوصا مع تلقيح الكلام اللي بيرميه في كل موضوع عن الايمان المسيحي والمسيحيين...ينفع اروح منتدي إسلامي ومقولهموش انا ايه إيماني وأفضل القح عليهم كلام في الرايحة والجايه وانا في منتدي إسلامي دعوي؟ ده حتي عيب ....شوية احترام للمكان اللي مستضيفني وطبيعته