رسالة الى كل اب وكل آم والى مجتمعنا المتدين بطبعه

[لمسة يسوع]

رسالة الى كل اب وكل آم والى مجتمعنا المتدين بطبعه
من فضلك كفاية انشغال عن ولادكم
كفاية اهمال فى تربيتهم
كفاية انغماس فى امور قد تؤدى الى هلاك ابنائكم ودمار اسرتكم
كل يوم بيت بينهار وابناء بتغيب عنهم التربية والاخلاق وبينحرفوا وجرائم يقشعر لها الابدان
من فضلكم بلاش مبررات زى الحياه غالية فلازم نشتغل كتير علشان نوفر امكانيات لاولادنا
بلاش كثرة الخدمات فى الكنائس الخادم او الخادمة للاسف وبقول للاسف مشغول بأكثر من خدمة والنتيجة انشغال بالخدمة والبيت والابناء بينهاروا. صدقونى ليس بكثرة الخدمات ولا بكثرة تواجدك بالكنيسة ممكن تكون خدمة واحدة مؤثرة وناجحة - التوازن الروحى والاجتماعى مطلوب جدا
السوشيال ميديا اللى بقيت ادمان مدمر هذا العصر اصبحنا مشغولين بها لاكثر مما تتخيلوا
الاسرة بالكامل على مواقع البعد الاجتماعى واقصد مسمى البعد وليس التواصل كله قاعد فى الخيال الافتراضى وعايشين مغيبين عن الواقع وبنوجد لانفسنا واقع غير حقيقى نفيق منه على كوابيس
ناس كتير ضاعت وتكبرت وانتفخت وانهارت واتسرقت واضمحلت بسبب الميديا
بلاش علاقات واصدقاء كتير
كفاية انشغال من فضلكم
بيتك اهم من اى شئ واهم من الخدمة نفسها
ايه فايدة الخدمة وبيتك واولادك تائهين وضائعين
بيتك هو الكنيسة الاولى
ايه فايدة الشغل والفلوس والمستقبل الاخلاقى بينهار ومعدل الجريمة بيعلى
ايه فايدة العلاقات والاصدقاء الكثيرين والفجوة بين الازواج والابناء بتكبر كل يوم
الميديا مش هتدخلك السما ومش هاتبنى بيتك ومش هاتديك الاتضاع الروحانية
انهى كلامى الى رجال الدين فى كل مكان
من فضلكم حببوا الناس فى ربنا وكفاية عثرة للناس
كفاية كلام وتصريحات عن عورة المرأة وعن فحولة الرجل
المجتمع بيتحول من مجتمع انسانى الى مجتمع شهوانى حيوانى. اعتذر عن هذا التعبير
قدسوا الانسان الذى خلقه الله وكفاية تعريته وتشريحه ووصفه بكلمات مخجلة
ازرعوا فى ابنائكم ان الرجل والمرأة والولد والبنت متشابهان ومتساويان فى كل شئ ولكن ادوارهم مختلفة
كفاية ارجوكم
قيم المجتمع بتنهار وسنندم جميعنا لاننا جميعنا فى مركب واحد نحيا مع بعضنا البعض
وليرحمنا الله عما فعلناه ونفعله فى اسرنا ومجتمعنا
وللحديث بقيا

#ابونا_ايلاريون_جرجس
#fr_elarion_girgis