انا ممكن اشارك معاكم ؟؟
هحكى كام حاجة كدا .. هو انا شايف هنا ناس محترمين بتتكلم بعقل و اتزان .
بس شايف ان ولا حد منهم تطرق الى الشده مع الابناء .. طيب نحكى شويه بقى
انا كشاب عديت الخمسين :smile01 ...... قصدى التلاتين ..
اتربيت بالضرب .. العنف .. شد الشعر .. جروح احيانا و كدمات .. متعملش متروحش متصاحبش .. هتعمل النهارده كذا و كذا و متناقشنيش ..
دا غير ان المعاملة كانت قاسية على كل اللى فى البيت كمان .. بس انا ليا وضع خاص مع الديكتاتور ..
الديكتاتور كان عليه الامر و انا التنفيذ .. طبعا لا انكر ان كان فيه لحظات قليلة كنت بحس فيها بالحب .. احيانا يعنى ..
العنف و الضرب و العناد .. كانوا هما اول صفات اتعرف عليها فى مرحلة التربية ..
كنت بشوف ناس اصدقاء ليا يعنى فى نفس السن .. ايزى و بهباهاتهم ايزى و اخر دلع يعنى و عيال رايقة و زى الفل
يعنى كنت بحقد شويه و سعات اتغاظ .. بس كنت برجع البيت الاقى شويه حنية من الام .. يخليكى ليا يا مامى
اكيد كان العنف اسلوب قاسى فى التربية + اهتزاز كبير للثقة فى النفس .. وصل الى حد كل ما امر من ادام المراية اشوف نفسى و اكلمها .. او اختلس النظر ليها كدا .. + عنف حتى مع اخواتى البنات ..
طيب عنف مع الاولاد ماشى يا دكتاتور .. انما كمان مع البنات ؟؟ و مع الام ؟؟ كان ناقص الجيران :gun:
اذكر مرة كنت لابس و متشيك ( على فكرة الديكتاتور كان شيك و مشيكنى .. الحق يقال ) .. كان تانى اسبوع فى اجازة اخر السنة اعدادية ... جه بص بصه على اوضتى و قالى متنزلش بالجاكيت دا .. البس الاسود التانى !!!
بس انا عايز انزل بدا .. عاجبنى
خلاص مفيش نزول الا بالجاكيت الاسود
و فاكر انى يوميها نزلت بالجاكيت الاسود ... يمكن هو مهتم اوى بالمظهر بس ميعرفش ان قلبى من جوا ناحيته هو اللى كان اسود
يعنى اقصد ان العنف الزيادة و الاهانة المتكررة و الغطرسة و الغرور .. فى معاملة المراهقات و المراهقين .. تعتبر مشكلة اضافية تضاف لمشاكل المراهقين انفسهم ..
فيعنى اللى بيربى ابنائه على الشده و العنف و الكلام دا .. ابنه او بنته هوصل بيهم الحال الى .. الانطلاق بلا قيود او خطوط ..
تعالى اتفرجى عليا بعد ما الدكتاتور مات .. تصدقى مزعلتش غير بعديها بزمن كبير ..
انطلاق بقى و فجر و عملت كل حاجة نفسى فيها سواء صح او غلط .. و الصراحة و الحق يقال .. الدكتاتور كان متريش و ساب ثروة عمالين نفرتك فيها
حتى اخواتى البنات اديت لهم كل حريتهم .. سيبتهم يعملوا كل اللى هما عايزينه .. يمكن الكبيرة شويه ضايعة زى - معرفش هى فين دلوقتى - :smile02
بس الصغيرة عشان مشافتش كتير من الدكتاتور .. فهى على نياتها و ببص لها بحس براحة .. دا غير و غير و غير ...
الخلاصة .. اذا كان ولى الامر - مش بحب الكلمة دى - دكتاتور و كلامه يتسمع فى كل كبيرة و صغيرة .. يعيش هو بقا مع نفسه و يخلص على اللى حواليه
و اهو نموذج اهو ... فى سنة 2013 فى يوم 14 يونيو .. انا اتحدث عن الديكتاتور ولا اذكر من محاسنه الا القليل ...
الحل الوحيد اننا نتعامل مع الشباب بدماغهم مش بدماغ عايشة فى زمن تانى .. من منكم ايها الافاضل لم تأتى عليه لحظة تمنى فيها ان يعود بيه الزمن الى حيث اللامسئولية و الايام التى تسبق الارتباط ليكون سيد نفسه .. ليعود الى الخير ..
انا هفترض انى خلفت .. و دا مستحيل يحصل لاسباب طبية .. بس يا ريت تكون بنت .. و جت فى يوم و قالتلى انا يا بابا ماشيه مع واحد .. ياااه .. مهو الطبيعى انها لازم تمشى مع واحد .. بأمانة انا هفرح كتير .. لأن انا شايف ان الاطفال او المراهقين اللى فى دماغهم الحاجات دى من و هما صغيرين .. فهما اذكياء جدا و سابقين سنهم .. شباب دايما هتلاقيه بيجدد و مجنون - دى كلمة حلوة مش وحشة - فعلا نحن فى حاجة الى شباب مجنون يعرف امتى يضحك و امتى يبقى جد
على فكرة انا على يقين ان اولاد حضراتكم كلكم شباب سابقة سنها .. لأنها .. شباب بتجرب و بتسأل و مش بتتكسف .. اديلهم مساحة وقت اللزوم .. سيبوهم ينطلقوا و صدقونى .. واثق بردو انهم مهما طال الزمن بيهم هيعملوا كل حاجة كانوا عايزين يعملوها .. سواء صح او غلط .. دوركم هو فرز الصح من الغلط و التأثير عليهم عشان يتفادوا الغلط .. غيرهم اتمنع من حاجات كتير و افتكر اهله انهم كدا هيطلعوه مسئول و شخص سوى ... و طلع مريض نفسيا و عضويا
تحياتى