أيام عبد الناصر ( كلمة للأجيال )

[عبود عبده عبود]

قالوا أيام ما ترجعها يارب
أيام ...
وقلنا قبلهم يارب أرجعها
قلنا وراهم يارب ما تسمعها
وقلنا لية يا عبد الناصر
سيبتنا ؟
ولية يابكرة تبخل علينا
براجل زى بن عم حسين ؟​

****************​

أيام عبد الناصر
ولما كُنا بنحارب
كـان الدولار بتلاتين !!
والدراهم والريالات
م الوكسة مختفين
دلوقتى أصبحنا
من ضمن الموكوسين
يقولوا لنا الحل فى الأسلام
و هو عبد الناصر
ما كانش من المسلمين ؟!​

****************​

قالوا وكسنا فى النكسة
أنتكسنا
فى خمسة يونيو سبعة وستين
قالوا أتهزمنا وجرينا
سيبنا سينا
قلنا مش ناسيين
بس راسنا فضلت لفوق
أيامها
وألا مش فاكرين ؟!
ما انحنيا ولا بوسنا
راس طويل العمر أو دقنه
ولا النفاق عرف لسانا
لناس حافيين​

****************​

عمره ما كان لابس درع واقى
ولا م الرصاص خاف
ولا ربى دقنه أو عمل درويش​

عربيتة مكشوفة وسط الناس
هامة ما تطاطى
الا لمصره وشعبها
لكن للعدو الراس
ماتطاطيش​

ولا عمره ف يوم
لحس كلامه
أو نطق بحشيش ​

أو ف خطابه بيتفتف
ولا عند مُرشد أنحنى له جبين ​

****************​

ولا مد أيده يسرقها
ولا مد يشحت لها
ولا معونة من ماما
راح يطلب لها ​

يا بلدى راجل من حبه فيكى
نّستيه نفسه وعياله
واللى يشوفكوا مع بعض
يفتكركوا يا مصر ​

جوز عاشقين !!​

****************
مش ناصرى الهوى
عمرى أنا
ولا كنت هكون​

بس سيرته لما تتفتح
يستمعها الكون
وعدوه لما يفتكر
تندعك له جفون​

يلتفت حوالين منه
يسأل الرايحين على مصر
مين اللى راح يحكمها وألا مين محكوم ؟​

خايف ليصحى يلقى مصر
ف يوم​

ماسكها راجل أسمه ​

جمال
عبد الناصر
بن عم حسين ​

 

[sha2awet 2alam]

رائعة يا عبود فعلا

الله يرحمه آخر الرجال المحترمين

 

[عبود عبده عبود]

رائعة يا عبود فعلا

الله يرحمه آخر الرجال المحترمين

طيب فين ؟:t33:
مرسيه ياشقاوة ...نازل له واحدة تانية
بس آخد نفسى الأول