أخبار إنتخابات الرئاسة المصريه 2012 أول بأول

[SALVATION]

تويتس لنوارة نجم من تويتر عن الاقباط والانتخابات الرئاسية:

عشان نختصر موضوع المسيحيين وما نلتش فيه كتير.. اي حد حيقول للمسيحيين حابني لكم كنايس حينتخبوه، هم عايزين كنيسة يصلوا فيها من غير ما يتحرقوا.

الموضوع بالنسبة للمسيحيين لا فارق معاهم شريعة من عدمه ولا فارق معاهم اي بتنجان.. عايزين كنيسة يرشقوا فيها من غير ما حد ينكد عليهم.

وميدو قاعد يقولي لا وبرضه فيه مناصب واقسام لا يرأسوها والكلام ده.. اذكر اي مظاهرة عملها المسيحيين لاي سبب تاني غير انهم عايزين يصلوا.

اي مرشح طرح مشروع لتعديل قوانين بناء الكنائس وترميمها هم راشقين معاه.. الناس بترضى بقليلها وكل اللي يهمهم في الحياة انهم يصلوا سيبوهم يصلوا.

سيبوهم يصلوا.. ده طلب مش صعب.. سيبوهم يصلوا.. سيبوهم يصلوا سيبوهم يصلوا.. سيبوهم يصلوا.. سيبوهم يصلوا.. مش عايزين منكم حاجة تانية.

عندهم مشاكل كتير تانية وقرف في حياتهم.. وفعلا حكاية الكنايس اللي بتتحرق عليهم دي.. بصراحة اوفر.

يعني تنكد على البني ادم عيشته وكمان مش مخليه يعرف يشتكي لربنا هههههههههه طب يروح فين طيب؟

انا عمري ما شفتهم عاملين مظاهرة عشان مافيش مسيحي بيرأس قسم النسا والولادة مثلا.. كل مظاهراتهم عشان عايزين يصلوا.. هم طالبين معجزة؟

اه يعني فكرني كده امتى جامع اتحرق ولا انفجر على اللي بيصلوا فيه؟ هو ده مطلب صعب ان الناس تصلي من غير ما تولع؟

وبجد فعلا والله.. مش عارفة افهم عقلية بعض الناس اللي اول ما يشوف كنيسة يركبه ستين شيطان.. واحد بيصلي انت متضايق ليه؟

هو مالوش دعوة على فكرة باستعراضك ل "الاسلام الصحيح". هو مش مسلم اصلا ومش معني بالموضوع، هو عايز يصلي من غير ما يولع.. بعد اذنك يعني.

وياريت لو فيها سئالة مالكش دعوة بنسوانه.. الحريم ماليين الدنيا، ما ضاقتش على حريمه.. اذا سمحت يعني.

اصل بقالكوا فترة عمالين تقطموهم عشان حينتخبوا موسى وشفيق.. طب يعني هم لقوا حد يقولهم حاسيبكم تصلوا وما انتخبوهوش؟

مدام ماحدش فتح موضوع بناء الكنائس وترميمها هو شايف انه يختار نظام امني يحميه من الولعة وهو بيصلي مدام مافيش نظام حقوقي يكفل له حق الصلاة.

يعني هم ولع عليهم كنايس ولا هم بيبتلوا؟ ولا كانت فوتوشوب؟ البني ادم لما يولع عليه الكنيسة بدل المرة اربعة وخمسة المفروض ما يخافش ازاي؟

دلوقت هو شغله الشاغل ازاي يصلي من غير ما يولع.. وبيدور على حد يديله فرصة يصلي من غير ما يولع ولا حد يفضل يجري ورا حريمه في الشوارع.

انا لحد دلوقت ما سمعتش ولا مرشح بيتكلم عن معالجته لبناء وترميم وحماية دور العبادة.. كله عمال ينافق في الاسلاميين حتى العلمانيين.

هم عارفين كويس ان موسى شفيق حيقدموا نموذج قمعي.. بس هم حاطين امل انه يبقى نظام امني بحيث ما يموتوش منفجرين

هم عارفين كويس ان موسى وشفيق حيقدموا نموذج قمعي.. بس هم حاطين امل انه يبقى نظام امني بحيث ما يموتوش منفجرين.

كل الناس باستهم وحطتهم جنب الحيط.. وهم متعاملين وراضيين بقليلهم.. بس ممكن يعيشوا؟ ولا الظرف مش سامح؟ نفهم بس عشان نبلغهم.

ما تقعدوش بقى تقطموهم وتاكلوا وشهم وتقولوا لهم: اغلب المسيحيين فلول.. فلول فلول بس ما يولعوش.

ما تقوليش بقى مبارك هو اللي فجر القديسين عشان انا واحد مسيحي قالي: ايام مبارك كان احسن عشان كان بيولع لنا كنيسة كل سنة، دلوقت كل شهر.

يعني قلب امه ما عندوش مانع يديك كنيسة تولع فيها.. بس مش كل شوية.. هو مستعد تعمل له جدول زمني وتحدد له عايز كنيسة تولع فيها كل قد ايه.

هو في كده؟ واحد راضي بان كنيسته تولع بس كل سنة بلاش كل شهر؟ ما تحترموا نفسكوا بقى.

هم عارفين ان شفيق وموسى امتداد لمبارك، ومن ثم حيولعوا لهم في كنيسة كل سنة.. مش كل شهر.. في كده ياخواتي؟ انتوا ماعندكوش رحمة؟

بعدين هم مش عايزين حد يفتح معاهم موضوع نسوانهم ده.. وخايفين حد ييجي يمسك البلد يقولهم هاتوا حريمكم يلزمونا وكده.

الرحمة بقى وكفاية تقطيم وتبكيت.. قولوا لهم حتسيبوهم يصلوا ازاي من غير ما يولعوا وهم راشقين معاكوا في اي حاجة.. مش تقطيم على طول كده.

هم مالهمش دعوة برضه بتحليلاتكم السياسية دي بتاعة مبارك وامريكا والبتنجان المقلي.. هم عايزين يصلوا من غير ما يولعوا وتسيبوا حريمهم في حالهم.

بعد اذنكوا يعني قولوا لهم ازاي ممكن يصلوا من غير ما يولعوا تاني وازاي ممكن تسيبوا حريمهم في حالهم وهم عينيهم ليكوا والله.. بس الرحمة شوية.

على فكرة والله العظيم والله العظيم والله العظيم المسيحيين مش عايزين حاجة غير يتسابوا في حالهم.. والله العظيم كمان مرة.

ما اعرفش مدى صحة كلامكوا في ان اغلب المسيحيين حيرشحوا شفيق، اللي انا شايفاه انهم مش مجمعين على مرشح بس معيار اختيارهم انهم ما يولعوش.

ثم ان شفيق الوحيد اللي استعبرهم.. وعن نفسهم مش فارق معاهم موضوع الاستعبار وشركاء الوطن والهري ده، هم عايزين ما يولعوش ومالكوش دعوة بنسوانهم.

المسيحيات شبه المسلمات.. الفرق بس انها مش محجبة، حتاخدها وتحرق قلب امها عليها وتموت ابوها وتلبسها الحجاب حتبقى شبه المسلمة فممكن تسيبوهم؟

الملف المسكوت عنه اللي راعبهم.. البنات القصر اللي بيتاخدوا وتنزل فيديوهاتهم: الله اكبر اسلام كرستين، وهي 15 سنة..ها؟ نفتح تاني ولا كفاية كده.

الله.. واحد اتحرق عليه الكنيسة بدل مرة خمس مرات في خمس شهور، وكل ما ييجي ذكره يبقى مرتبط بحريمه: هاتوا حريمكوا.. ما يبقاش خايف ليه؟

وهم بيتلككوا عشان اي حد يطمنهم.. ده في اي مظاهرة ولا اعتصام لما بيلاقوا مسلم بيبقى ناقص يتحزموا ويرقصوا.. قولوا لهم كلمة حلوة. واوعى تقول بسبوسة يا ظريف.

الله.. "بلاش نبش في الحاجات دي يا نوارة" حاضر.. بلاش نبش وانتوا بطلوا تزايدوا عليهم وتقولوا لهم يا فلول.

ماهو ساكت وما بيفتحش الموضوع ورايح ينتخب حد اذا ما كانش حيعمل له دولة حقوقية يبقى يعمل له دولة امنية.. يا تطمنه يا تسيبه في حاله.

والمرة دي بالذات المسيحيين مش مجمعين على حد.. فيه منهم حيصوت لحمدين وخالد وفيه منهم حيصوت لشفيق وموسى وفيه حيصوت لابو الفتوح حتى.

انما ازاي بقى؟ ازاي؟ لازم امشي ادور على المسيحي اللي حينتخب شفيق عشان ازايد على امه.

انا شخصيا ما قابلتش ولا مسيحي حينتخب موسى او شفيق، اللي اعرفهم كلهم لحد دلوقت يا خالد يا حمدين يا مقاطع.. فكفاية مزايدة بقى.

والكنيسة مش قايلة لهم المرة دي ينتخبوا مين فعلا.. وهم بطلوا يسمعوا كلام كنيسة من ساعة ماسبيرو.. فالرحمة شوية شوفوا لكوا حد تاني تتسلوا عليه.

كلمات ساخره بس بتروى واقع فعلا
​

 

[grges monir]

انا روحت اللجنة قولت اشوف هانتخب النهاردة ولا بكرة على حسب الزحمة
فلتها زحمة جدا لدرجة انى مش لاقيت حد غيرى فى المدرسة
انا قلت لغوا الانتخابات ولااية هههههههه
الملاحظة بقى
انهم بيوقفوك برة يشوفوا اسمك فى الكشوف فى المدرسة دى ولالا عشان تدخل
وبعد متدخل بتدخل اللجنة وتمضى فى كشف جوة اللجنة وتاخد بطاقة الترشيح وتنتخب
الفكرة بقى ان الكشف اللى على الباب نفس الكشف اللى جوة ؟؟؟؟؟؟؟؟؟؟؟
فاسمك كدة موجود مرتين مرة من غير امضى ومرة بامضى يبقى فى اية بقى ؟؟؟؟؟؟؟؟؟؟

 

[ميرنا]

انا برضو روحت واستغربت لقيت فضى رهيب كان فى مجلس الشعب اكتر من كدا

 

[grges monir]

انا برضو روحت واستغربت لقيت فضى رهيب كان فى مجلش الشعب اكتر من كدا

انتى نفس لجنتى ولااية ههههههه

 

[ميرنا]

انتى نفس لجنتى ولااية ههههههه

تفتكر :dntknw:

 

[grges monir]

تفتكر :dntknw:

مش عارف
انا كنت مدرسة القومية وانتى ؟؟
مكن تكون القومية بس بينها وبينى اكتر من 500 كيلو ههههه
المهم انتخبتى مين
انا ولا د خالتى فى لقاهرة انتخبوا حمدين
واحنا انتخبنا شفيق بصراحة اتحاد رائع مش كدة ههههه

 

[ميرنا]

مش عارف
انا كنت مدرسة القومية وانتى ؟؟
مكن تكون القومية بس بينها وبينى اكتر من 500 كيلو ههههه

انت ادرى :beee:

 

[grges monir]

انت ادرى :beee:

انت تايهة ولا اية
محسسانى انك مش عارفة رايحة منين وجاية منين هههه

 

[سمعان الاخميمى]

أنا كنت لوحدى فى اللجنة ملقيتش غير الموظفين والقاضى لدرجة إنى فكرت أقعد معاهم شوية بدل الكساد اللى هما فيه بس ده كان 9 صباحا.

 

[grges monir]

أنا كنت لوحدى فى اللجنة ملقيتش غير الموظفين والقاضى لدرجة إنى فكرت أقعد معاهم شوية بدل الكساد اللى هما فيه بس ده كان 9 صباحا.

هى الانتخابات مكنتش النهاردة ولااية
تقريبا الانتخابات عند عياد بس والباقى اجازة ههههههههه

 

[ميرنا]

انت تايهة ولا اية
محسسانى انك مش عارفة رايحة منين وجاية منين هههه

يعم وانا اش عرفنى كام كيلو يووة :ranting:

 

[ميرنا]

أنا كنت لوحدى فى اللجنة ملقيتش غير الموظفين والقاضى لدرجة إنى فكرت أقعد معاهم شوية بدل الكساد اللى هما فيه بس ده كان 9 صباحا.

انا روحت فى معاد رخم روحت الساعه 3 ونص :yahoo:

 

[grges monir]

انا روحت فى معاد رخم روحت الساعه 3 ونص :yahoo:

هههه زيى برضة
هى دى صدفة ولا بتغشى منى ههههه

 

[ميرنا]

هههه زيى برضة
هى دى صدفة ولا بتغشى منى ههههه

ايوة بغش ع اساس انى كلمتك وعرفت انتا نازل امتى :new2:

 

[Dona Nabil]

أكدت المستشارة نورهان طه، رئيسة اللجنة الانتخابية، رقم 27 بمدرسة الخنساء بمنطقة عين شمس، أنها منعت عدداً من الناخبات المنتقبات من الإدلاء بأصواتهن داخل اللجنة، وذلك بعد رفضهن الكشف عن وجوههن.

 

[Dona Nabil]

الأنبا باخوميوس يدلى بصوته ويؤكد:الأقباط لهم حرية اختيار الرئيس
أدلى الأنبا باخوميوس القائمقام البطريركى بصوته صباح اليوم بمقر لجنته الانتخابية بمدرسة "الإعدادية بفلاقة" بمدنية دمنهور بالبحيرة قبل توجهه إلى القاهرة عقب التصويت من أجل متابعة شؤون الكنيسة

 

[Dona Nabil]

الصحة: ارتفاع حالات الإصابة فى الانتخابات الرئاسية إلى 13 حالة

 

[grges monir]

ايوة بغش ع اساس انى كلمتك وعرفت انتا نازل امتى :new2:

اكيد
اصلى انا شخصية عامة هنا فى المنتدى وعندى فى محافظتى ههههه

 

[grges monir]

الصحة: ارتفاع حالات الإصابة فى الانتخابات الرئاسية إلى 13 حالة

نشكر اللة ملقتيش حد اتخانق معاة هههههه

 

[!! Coptic Lion !!]

وردنا الان من مراسلنا كوبتك ليون
ان السيد كوبتك ليون يقف مع عامه الشعب في احدي الطوابير الانتخابيه
واكيد سيادته اصراره علي الالتزام بالدور
كما صرح بان الناس سواسيه كاسنان الفلايه

كما نري للان رجال الاعلام الاجانب ممثلين في موزيعه موزه اخر حاجه ترصد حركه سير العمليه الانتخابيه
هذا وسنوافيكم بكل ما هو جديد