انا مكنتش متوقعه غير النتيجة ديه ، عارفين يعني ايه يقولو انه مش خطها؟ يعني كل المنظومة بتاعت الثانويه العامة اتهدت ، وده هما مش ممكن يسمحو بيه أبدا
لان ده معناه ان هيطلع مليون حالة زي مريم واللي ليه حق واللي ملوش ومش بس السنه ديه ده كل سنه ، كان لازم تطلع النتيجة كده علشان حتي اللي يفكر انه يشتكي يبقا عارف انه مش هياخد حاجة وميوجعش دماغهم ويلخبطلهم النظام
البنت ديه بتقولو انها كدابه ، لو هي كدابه يبقا حاجة من الاتنين
1- انها مخططه لده كله ( مش عارفه ايه العقليه الاجراميه ديه كلها) وقصدت تجيب صفر علشان تاخد الدرجات النهائية في الاخر ، وانا مش عارفه حمار مين اللي صورلها انها ممكن قضيتها تعمل الضجة ديه كلها وأنها أكيد في الاخر هتاخد الدرجات النهائية وتدخل طب زي ما هي عايزه ؟ يعني وهي داخله اللجنه ومقررة انها تجيب صفر ومتجاوبش ازاي عرفت ان قضيتها هتعمل الضجة ديه كلها وأنها في النهاية هتكسبها وتجيب الدرجات اللي هي عايزاها من غير ماتتعب؟ ده حتي هي من أسرة بسيطة وآخر غلب يعني لا مسنوده ولا بنت حد كبير في البلد
ده كانت ذاكرت اسهل من كل الفيلم ده
وبعدين دخلت وقَعَدت تكتب اي كلام في الورقه يعني بخطها ، وبعد كده طلبت تحقيق وطب شرعي واستكتاب بدل المرة 100 مرة وهي عارفه انه خطها اللي في الورقه؟ ده ايه الجبروت والغباء ده؟ يعني لا خدت درجات وكمان فضحت نفسها وشوشرت علي نفسها وعلي عائلتها ؟
2- انها زي ما انتو قولتو مريضة وديه انا حاجة مقدرش ولا يمكن اسمح لنفسي اني اقولها عن اي حد الا لو فيه تقرير طبيب وحالة مثبته
إنتي مستغربا انها مدخلتش الامتحان السنة اللي فاتت ، وانا مش شايفه ان ديه مشكله ، عندنا ناس في عيلتنا عملو نفس الحاجة لما لقو نفسهم مش مستعدين قسمو السنه زي ما هي عملت عادي موت الأب مش حاجة سهله في البيت
وبعدين لو هي مش شاطرة فعلا ازاي أصحابها ومدرسينها بيشهدو ليها وأنها كانت متفوقة ، لو كان ابوها بيغششها زي بنت عمك ازاي أصحابها كانو عارفين عنها انها متفرقة هما وأساتذتها ماهو أكيد مجابوش الرأي ده من نتايج امتحانات اخر السنة بس ، أكيد بيشوفوها ويتكلمو معاها واكيد بتروح المدرسه وبتجاوب وبتتفاعل في الفصل مع المدرسين
كان لازم هتطلع النتيجة كده ، واه احنا مش بنصدق مؤسسات الدوله ، علشان مفيش إمارة زي ما بيقولو ، البلد عمرها ما ادتنا الدافع اننا نصدقها او نصدق مؤسساتها وبالأخص في قضايا كبيرة زي كده هتجر ناس كتير وتقلب نظام الثانويه العامة كله لازم يكون فيه كبش فدا لازم
وبالنسبه لأجابتها في البرنامج انا مشوفتهاش ومعرفش الاسئله اللي جاوبت عليها بس إنتي متخيله واحدة ليها 3 شهور مذاكرتش هتفتكر حاجة؟ وبالأخص في الظروف بتاعتها والشد العصبي اللي هي فيه؟ وكمان قدام الكاميرات وفجأة ؟
ده علي اساس ان النظام التعليم في مصر بيقوم علي الفهم والتجربة فالواحد مش ممكن ينسي اللي أتعلَّمه حتي لو عدا عليه كذا شهر؟ احنا هنضحك علي بعض؟ ما كله حفظ حفظ حفظ ده الطلبة بيخرجو من الامتحان تاني يوم بيبقو ناسيين كل حاجة
صدقيني انا لو في موقفها ده واتسألت قدام الكاميرات كده كنت نسيت اسمي أساسا
