النصايح الهلامية !

[Critic]

فيه مشكلة علاقاتية اخدت بالى منها وحبيت اشارككم
لما مثلا بتكون مضايق بسبب ظروف او مشكلة او ضعف بتمر بيه
و تيجى تفضفض لحد قريب منك , وتبقى مخنوق مثلا فتلاقيه يقولك "متتخنقش افرح وزأطط" !
او تبقى خايف فيقولك "متخافش اتشجع" او "ثق فى ربنا" او "ثق فى نفسك" !
او تبقى مخنوق بسبب وضع غير محتمل ويقولك "اصبر" "كل تأخيرة وفيها خيرة" !
او تحضر وعظة تلاقى الواعظ بيتكلم عن مشكلة ما ويجى يقول الحل "التجديد , او نعمة الخلاص بالمسيح !!"
او يتكلم عن الفتور وينصح الفاترين "ابعدوا عن الفتور وارجعوا" !

حد اخد باله ان فيه علامة استفهام وحاجة ناقصة !
ايوة يعنى انا هدوس على زرار يعنى فهبعد عن الفتور او زرار فمش هخاف و هتشجع واصبر !
ايه مدى اللى استفدته من واحد بينصحنى انى "اتشجع" او "اصبر" او "اقوى روحياتى" وانا فى وضع زى ده , ايه الاضافة اللى اخدتها بالكمتين دول تخلينى اتحط على الطريق اللى انا اصلا معرفوش !
الشخص ده منفصل ذهنيا عن اللى انا بحكى فيه ولا حاسس بمعناتى اساسا ,ده زى ما يكون واحد بيكلمنى من قمة جبل وانا تحت فى اسفل القاع
وما هو لو كان معايا فى القاع وبيمر بنفس الألم مكنتش هسمع منه الكلام النظرى ده !
هو بيعتقد انه كدة بيخفف عنى , بس فى الحقيقة الكلام وقعه بارد وقاسى وكان افضل لو مقالش حاجة خالص !
ابقى فى قمة غضبى او جرحى من ظروف قهرية ويجى واحد ينسف كل ده ويقولى "ليه خايف متخافش" " ليه زعلان متزعلش" , الله عليك يعنى هو الموضوع بالبساطة وانا يعنى غاوى نكد ووجع قلب !!


اتمنى اسمع رأيكم

 

[marcelino]

انا لما بكون فى ظرف صعب وحد قالى حاجه زى كدة ببقى كأنى مسمعتش حاجه

مش بمزاجى .. بس الكلام مالهوش اى قيمه او معنى وانت فى مشكله او احساس نفسي سئ

كلام بيتقال وخلاص مش بيأثر ولا سلب ولا ايجاب


بس بردو واحد انت بتحكيله مشكله منتظر يعمل ايه غير انه يواسيك بكلمتين ؟
​

 

[Critic]

بس بردو واحد انت بتحكيله مشكله منتظر يعمل ايه غير انه يواسيك بكلمتين ؟

يواسينى بكلمتين يستفزونى ؟!
يعنى ابقى فى وضع بالنسبة لى لا يحتمل مثلا والاقيه كل شوية يقولى "الصبر حلو اصبر" يا عم الحج انا على اخرى فى وضعى انت زى ما تكون بتقول لسجين السجن حلو استحمل متوقع منه انك كدة بتطيب خاطره !
منتظر منه تفهم مش يزود عليا
يقولى اه وضعك منيل بجد انا حاسس بيك
دى وقعها عليا حلو اهو على الأقل حد حاسس بيا
مثلا يعنى

 

[Desert Rose]

احنا عندنا عادة وهى الاستهانة بمشاعر الناس والاستخفاف بيها واللى بينصحك علشان انت مش عارف الطريق هو اساسا بدو مش عارفه وعلشان كده بيدى نصايح فى الهوا لاتودى ولاتجيب
بس ساعات كتيرة بتبقا نيته كويسة بس مش عارف يعمل ايه وهو كده فاكر انه بيخف عنك فعلا وميعرفش انه كبته لمشاعرك والاستخفاف بيها ده بيضايقك اكتر

انا كتير اقولهم فى البيت لما تشوفونى متعصبة سيبونى اخد فرصتى فى العصبية وانا ههدا محدش يجى يقولى الموضوع مش مستاهل يمكن انتو شايفينه كده لكن ليا انا هو ضرب على عصبى
ولو سبتونى اعبر عن عصبيتى ههدا بعد شوية

 

[R.O.R.O]

طيب يا جماعة فى حاجة ما انا لما ابقى مضايق مش هقبل اى كلمة تتقالى

مثلا لو حد قال اهدى متتعصبيش مش مستهلة وكلام من دا انا معاكم انى
مش هطلع من المود بالكلام ده لكن كمان ملومش الشخص اللى بحكيله انه
بيواسينى بكلمتين هو بالنسباله بيخفف من عليا لكن اوقات كتير بيفرق معانا وجود اشخاص معينة وبكلامهم لينا بنطلع واحدة واحدة من المود
فى كل الحالات انا مش هعرف اسيطر على اللى جوايا هياخد وقته وينتهى
لانى ساعتها ببقى قافلة ودنى عن اى كلام اسمعه وده بيبقى غصب عنى
حتى لو حد قعد معايا يكلمنى عن ربنا شوية لانه معتقد انه كدا بيطلعنى من المود برده مش بطلع منه انا من رايى ان العيب فينا مش فى الناس اللى بتواسينا فى المواقف الصعبة ابسط شىء لما ابقى مضايق ان هلاقى حد بيقولى متتضايقش سيبها على ربنا
ميرسى لموضوعك الجميل واسفة على الاطالة
​

 

[Desert Rose]

لا يارورو العيب مش فى انه بيواسيكى وان نيته كويسة وطيبة انه يخفف عنك
لكن العيب انه بيحاول يكبت مشاعرك زى ماتتعصبيش مش مستاهله متعيطيش مش مستاهله متخافيش مش مستاهله
طيب ديه اعملها ازاى وانا شايفاها مستاهله ؟
عارفه الافضل يقول ايه ؟ اه عيطى هى مستاهله ولازم نشوفلها حل مع بعض
اه اتعصبى وبعد شوية هتهدى ديه بالنسبالى افضل بكتير من مش مستاهله

 

[R.O.R.O]

لا يارورو العيب مش فى انه بيواسيكى وان نيته كويسة وطيبة انه يخفف عنك
لكن العيب انه بيحاول يكبت مشاعرك زى ماتتعصبيش مش مستاهله متعيطيش مش مستاهله متخافيش مش مستاهله
طيب ديه اعملها ازاى وانا شايفاها مستاهله ؟
عارفه الافضل يقول ايه ؟ اه عيطى هى مستاهله ولازم نشوفلها حل مع بعض
اه اتعصبى وبعد شوية هتهدى ديه بالنسبالى افضل بكتير من مش مستاهله

يا انجل ما هو بالنسبة له انه كدا بيخرجك لان ده الطبيعى انه يقوله زى مثلا فى حالة الوفا بيبقى الانسان حزين جدا ومع ذلك الناس بتواسيه بانها تقوله متعيطش كفاية كدا مع ان كلامهما ملوش تاثير عليه فى حالة الحزن الشديدة اللى هو فيها
لكن ده الطبيعى انه يتقال
مش معقول هيقوله عيط وصوت علشان ترتاح
​

 

[Critic]

لكن ده الطبيعى انه يتقال

لا مش طبيعى ان ده يتقال !
ده اللى "اتعودنا نقوله" والسلام
لكن مفكرناش فى تأثيره على اللى قدامنا !
انا اللى بيقولى متتعصبش وانا متعصب بيعصبنى اكتر , بغض النظر عن نيته
هتقوليلى ايه المطلوب منه ؟ , ميقولش حاجة ! يستقبل عصبيتى ويتمصها لحد ما اهدى , بس كدة
وسعيد جدا بتبادل الاراء

 

[Desert Rose]

يا انجل ما هو بالنسبة له انه كدا بيخرجك لان ده الطبيعى انه يقوله زى مثلا فى حالة الوفا بيبقى الانسان حزين جدا ومع ذلك الناس بتواسيه بانها تقوله متعيطش كفاية كدا مع ان كلامهما ملوش تاثير عليه فى حالة الحزن الشديدة اللى هو فيها
لكن ده الطبيعى انه يتقال
مش معقول هيقوله عيط وصوت علشان ترتاح
​

ايوة يارورو يقولى عيطى وصوتى علشان ارتاح لما بخرج مشاعرى كما هى من غير ماحد يوقفنى هرتاح بعد شوية
لكن لو كبتها هنفجر حتى لو ما انفجرتش دلوقتى هنفجر بعدين
وده اللى بيخليكى تشوفى ناس تتعصب وتنفجر على اتفه الاسباب هما مش مجانين لكنهم مكبوتين

 

[عبود عبده عبود]

لما بنكون متضايقين ونفضفض لشخص ما ...فهذا يعنى ثلاثة أشياء :
إما أنه بيده الحل – أو بيده النصيحة – أو لا يملك الا التعزية بكلمات
لأن الرابعة ستكون ...وأنا مالى ؟ - هو انا ناقصك ؟ - أعملك أية يعنى ؟
أو يسمع ويمصمص بشفافيه ويطبط على كتفك وأنت مش طايق حد يلمسك أصلاً ...
أو يسمع وينفض ويبص لك فى بلاهة كأنه بينظر من خلالك مش ليك
فهل هذه الكلمات أكثر أحباطاً من كلمات التعزية نفسها والفارغة من أى مضمون ؟
وأحيانا تكون الفضفضة دى مصيبة على صاحبها ....مثلاً
لو أشتكيت من صاحبك انه عمل وسوى وقال وعاد وووو ...
وبعد أن هدأت الأمور بينكما ورجعتوا زى السمن ع العسل
هتسمع ..مش دة اللى مش كنت طايقه ...مش دة اللى كنت بتشتم فيه أولة أمبارح ...مش دة اللى ...ومش دة الـ ....
فيجب الأحتراس فى الفضفضة والآحتراس فيمن نفضفض له
حتى ولو كان أقرب الأقربين ....للأسف

 

[R.O.R.O]

عموما الاختلاف فى الراى لا يفسد للود قضية ههههههههههه
​

 

[Critic]

عبود كلامك فيه حاجات متفق معاك فيها
بس برضو الانسان بيجى عليه وقت بيكون فى حاجة انه يخرج اللى جواه لأى حد والا هيكتئب والانفجار بطرق غير صحية وارد ومتوقع , دى رغبة كل انسان مولود بيها

 

[white.angel]

لحد فتره قريبه ... كنت ماشيه مع كل البشر بمبدأ .. "السيد الخبير" .. اى حد يشتكيلى او يحكيلى ... احلله نفسياً ... واديله روشته نصايح وحلول ... 30:

لكن اتعلمت من عدة افراد دخلوا مؤخراً حياتى .. انى ادور اللى قدامى غرضه ايه من انه يحكيلى .. :t31:

فى ناس بتحكى لانها محتاجه النصيحه فعلاً ... يبقى انصحهم:smil16:

فى ناس تحكى لانها محتاجه تشعر ان فى حد شاعر بيها .. يبقى اكتفى بأنى اتلامس معاه عاطفياً :smi411: ودة النسباله احلى من مليون نصيحه ..

وطبعاً الاب هنرى نووين علمنا اننا منحكيش الامنا للى بيحكيلنا الامه لان دة مش بيقلل الضغط عليه انما بيزوده ...:smil8:

عندك حق يا كريتيك ... وفن التعامل مع الاخر رحله طويله طول ماحنا ماشيين فيها هنتعلم
​

 

[عبود عبده عبود]

عبود كلامك فيه حاجات متفق معاك فيها
بس برضو الانسان بيجى عليه وقت بيكون فى حاجة انه يخرج اللى جواه لأى حد والا هيكتئب والانفجار بطرق غير صحية وارد ومتوقع , دى رغبة كل انسان مولود بيها

الآحتراس لس معناه اننا نبطل نفضفض
بالعكس دة شئ صحى
لكن مش عايزين نظلم معانا اللى بيسمعنا لأنه اوقات كثيرة ليس فى يديه أية حلول يقدمها
كما قد تكون خبرته الحياتية غير كافية لمعالجة وضعنا الثائر
أنا متفق معك ..بل أؤيدك
خرج اللى جواك ..فضفض ..زعق ..جعر ...ولو تقدر تبكى كمان ابكى ..

 

[the shepherd]

انا مش هتطرق للنقاط الي اثرها الاعضاء بس حابب اشير لنقطة مختلفة

سعا بحس ان سبب المشكلة الحقيقية هو " الردود المحفوظة "
بمعني ان اول لما الاخر بيبتدي يفضفض انا بنفصل ذهنياً تماماً عنه و عن كلامه و ببقي بحضر في الرد في دماغي
يعن يا دوب هو قال راس الموضوع " انا متضايق من ...... " و قبل ما يقول اي تفاصيل نكون احنا خلاص جهزنا الرد الي هنقوله في الاخر
و مستنين اي فرصة يقف فيها علشان نروح داخلين عليه بالرد المتين " دة لو عندنا ذوق "
و لو معندناش ذوق بعد اول دقيقة هنقطعه و نقوله الرد الجاهز قبل ما يروح من دماغنا
بجد سعات بحس اننا لو مفكرناش في ردود و وجهنا طاقتنا للاستماع بجد للاخر و محاولة التلامس معاه و مع مشكلته
نقطة التعامل معاه و هو محتاج اية هتبقي اسهل بكتير و اريح لكل الاطراف

و بصيغة تانية ممكن اقول ان مشكلتنا اننا بنلغي تميز و تفرد الاخرين
و بنفكر ان " النصيحة " الي اثمرت مع حد لازم تثمر مع الجميع
و بالتالي بقي عندنا رد جاهز لاي مشكلة و هو دة بصراحة الي بيخلق المشاكل​

 

[sha2awet 2alam]

بص انا معاك فى موضوع النصايح الهلامية زى بتاعت ( امسك فى ربنا ) او قوم صلى او غيرها من الردود الى هى مكررة و محدش بيبقى مستحمل يسمعها .. زى برضه اما تشتكى انك متضايق من حد فتلاقى اللى قدامك نزلك بكل آيات الكتاب المقدس عن المحبة طب ما انا حافظها بس متضايق .. حاجة بتقفل اوى من اللى قدامنا

بس انا نفسى بتحط فى المأزق دة .. اما حد يحكيلى حاجة صعبة .. مش بلاقى كلام اقوله غير كلمة معلش .. أو كلمة هانت .. عارفة كلمتين مكررين بطريقة تتعب بس مفيش اوبشن تانى غير الصمت و لان الصمت ممكن يتفهم انى مش مركزة او مش سامعة أصلا فبقول كدة من باب انى معاكى و سمعاكى ..

و لو اللى بكلمهم قريبيين منى و قاعدين قدام بعض بكتفى انى ببصلهم و اسكت و هما بيبقو فاهمين انى معاهم و حاسة بيهم ..

بس فيه عندى تعقيب صغير .. اوقات ناس بتقول النصايح دى عن جهل بتاثيرها السلبى و بتكون نيتهم مش النصح أد ماهى التخفيف عننا بس فمش ينفع نظلمهم .. ممكن تبقى قلة خبرة منهم فى المعاملة مش اكتر فحرام اننا نحكم عليهم بانهم واخدين دور الواعظين .

حلو موضوعك يا كوكو

 

[+sano+]

شكلك شايل منى اوى يا ابو كريتك
الدنيا تتلخص فى كلمتين ياريت نبعد عن النصايح الا لو الشخص ده طلب منى النصيحه
وابتدى اتلامس معاه عاطفبا واشاركه مشاعره على شرط ابقى حاسس بيه فعلاااا مش اى كلام يعنى
ولو معررفش اسكت احسن بدل مبوظ الدنيا
موضوع جميل يا كريتك كالعاده ​

 

[lo siento_mucho]

طب لو هو مش عنده حل و مش عارف يقولك إيه ف مشكلتك و ف عز حزنك
ساعات بنحتاج نسمع كلام يواسيني أو يهدي شوية من حزننا
أو أصلا بنبقى عايزين نفضفض لأن ده بيساعدنا نرتاح شوية
و كتر خيرو أصلا إنو سمعنا ..
و كمان قالنا كلام يواسي..لأن في غيره مش لاقيينه حتى يسمعنا
!!!!!!!!!

 

[lo siento_mucho]

sha2awet 2alam :
بس فيه عندى تعقيب صغير .. اوقات ناس بتقول النصايح دى عن جهل بتاثيرها السلبى و بتكون نيتهم مش النصح أد ماهى التخفيف عننا بس فمش ينفع نظلمهم .. ممكن تبقى قلة خبرة منهم فى المعاملة مش اكتر فحرام اننا نحكم عليهم بانهم واخدين دور الواعظين .

والله كتر خيرهم انهم سمعونا اصلا

 

[Critic]

بصوا يا جماعة صوابعك مش زى بعضها
يعنى اللى بيفرح او بيتعزى من النصايح او الردود دى خير وبركة محدش قاله يشتكى !
فيه ناس مش بتتحمل ده , وانا واحد منهم
عدم التفهم لما بتكون فى حاجة لتفهم ده ألم اضافى , ومحدش وهو متألم هيرحب بألم فوق ألمه