4 حاجات لازم تعملهم لو مديرتك واحدة ست (الجزء الأول)
ربما يعتبرك البعض محظوظا لو قلت لهم إن مديرتك واحدة ست، لأنهم سيعتبرونها أكثر رقة وجمالا وأنها لا تنفعل ولا ترخم ولا تعيش في الدور مثلما يفعل الرجال، وستجد نفسك تتلقى نظرات الحسد من كل أصحابك الموظفين الذين يعانون مع رؤسائهم الرجال، فهم يعتبرون أن مديرتك يمكن أن تأكل أنت بعقلها حلاوة بكلمتين حلوين ولا يعلمون أن المديرة الست أصعب ألف مرة من ألف راجل، ولذلك فعليك يا عزيزي أن تضع في اعتبارك 4 أشياء هامة في تعاملاتك معها.
امدحها ودقق في تفاصيلها
لا تجعلها تقوم بأي حركة أو تلبس أي لبس جديد إلا وتقوم أنت بامتداحها، وسرد أبيات الشعر في شياكتها واسلوبها الساحر والمقنع في الكلام، ولا تنسى التفاصيل البسيطة التي تبدو إليك "ملهاش لازمة" لأن لو أحد سبقك ولمح هذه التفاصيل واهتم بها، فسوف يأخذ مكانك على الفور.
فمثلا تلاقي المديرة داخلة عليك وعاملة في ضوافرها "فرنش" .. يا نهار مش أبيض .. هو انت أساسا متعرفش يعني إيه "فرنش" .. ياراجل بقى تبقى مدريتك واحدة ست وانت متعرفش الحاجات دي؟!!! عموما متقلقش، أنا هخدمك وأظبطك وأقولك إيه الفرنش ده، الفرنش يا سيدي إنها تكون عاملة ضوافرها بلون وأطراف الأظافر نفسها بلون تاني وعادة ما يكون أبيض، وياريت متعمليش فيها عاقل وناضج وملكش في الحاجات دي، لأنك لو منبهرتش بهذا الفرنش ربما تعتبرك هي جلنفا كبيرا.
خلاص يا سيدي بلاش موضوع الفرنش ده لو كنت بتنكسف قوي كدة، عموما ممكن لو شفتها عاملة أي حاجة جديدة وانت مكسوف تركز فيها، ممكن ساعتها تقولها فيكي حاجة متغيرة النهاردة، وهتلاقيها بتقولك مثلا "فعلا المانيكير بتاعي درجة 85 مش 83 زي كل يوم.. أنا بحييك على ملاحظتك يا تامر".
لا تنسى عيد ميلادها
بص بقى.. انسى الشغل وانسى مهام العمل كلها.. وانسى عملاء الشركة .. يا عم انسى نفسك خالص إنشالله تيجي الشركة وانت ناسي بنطلونك في البيت، فكل هذه الأشياء يمكن أن تغفرها لك مديرتك، أما الشيء الذي لا يغتفر هو أن تنسى عيد ميلادها.
وطبعا يا عزيزي عليك أن تتذكر اليوم والشهر فقط، ولا تسأل السؤال المصري الخنيق "كدة انتِ تميتي كام سنة؟".
لا تنسى انتقاد زميلاتك
مهما كانت مديرتك واثقة من نفسها فبالتأكيد هي امرأة وتحمل مشاعر غيرة أو غيظ من فتيات أخريات في مكان العمل، وعليك أن تلعب على هذه النقطة وتستغلها لصالحك .. آه هتبقى وصولي ومتسلق فيها إيه يعني.. وهنا عليك أن تنتقد زميلاتك وتبعد عنك أي شبهة تفاهم بينك وبينهن لأن التفاهم والتقارب ربما يغيظ مديرتك.
وعليك دائما أن تنتقد في أسلوب دي وملابس دي، وتأكد أن مديرتك لو قالتلك "عيب يا ماجد متقولش كدة" فهي بداخلها فرحانة ومظأططة وبتقول "الواد ده بيفهم".
امدح المرأة العاملة
لا تبدي اعجابك وانبهارك بجمال نانسي عجرم ولا إثارة نونا ولا سحر هيفاء ولا بالتفاهات دي خالص، بل ابرز دائما إعجابك بالمرأة العاملة الكادحة المثقفة العاقلة المشعارف إيه، فأنت بذلك ستعلو في نظرها كثيرا.
التعديل الأخير:
