يوميات ميت

[عبود عبده عبود]

:closedeye رؤية ساخرة لواقع سعيد :closedeye​

الليلة الأولى​

النوم لذييييذذ أوى فى عيونى ...
إتفزعت على صوت حّمِّارى وأيد بتدق على وش رجلى بغشومية :
- أصحى يا آبا عشان تاكل " لوقمة "​

فتحت عينى على الصوت الحّمِّارى وبصيت حوالين منى
أوضة ضيقة والنفس مكتوم وريحة معفنة لا تُطاق ...
وطبلية عليها فول وطعمية وبطاطس وسلاطة وطحينة وطرشى وعيش كتير ..​

= أية دة أنا فين ؟
* أنت هنا ....
- قوم بقى علشان تاكل ...الأكل بيحب اللّمة ​

أتعدلت فى قعدتى ولسة النوم واخدنى ...
دعكت فى عينى وأنا بابحلق فى الخِلّق اللى أدام منى
وشوش أعرفها ...بس شفتها فين فين ...
فين يا " عب الرحيم " فين ؟
الله ؟؟!!!​

= أومال فين " سوسن " ؟
- " سوسن " مين ولا مؤاخذة ؟!! ​

* تقصد الولية اللى صدعت دماغ دين أبونا صويت دى ؟
+ لأ مش دى ...اللى كانت بتصوت دى أومه ..​

ألتفت الى مصدر الصوت فإذا به ...
= أية دة أبويا ؟!!!
+ ايوة زفت أبوك برضه أتجوزت "سوسن " يا بن الكئيبة ؟​

= بس أنت ميت يا آبا من عشر سنين ؟!!!​

أرتجت الغرفة من القهقهة ....ولكن جاء صوت آمر من ركن الغرفة
/ وطى صوتك أنت وهو صحيتوا الأحياء ..
= جدى ؟!!! ...الله ؟؟!!! ...أنا فين ياجدعان ؟؟!!!!​

/ أنت فى التُربة يا عب الرحيم
= تُربة ؟؟!!!! يعنى أنا مووت ؟​

+ أومال جاى زيارة بروح أمك ...أيوة مووت
= ودة حصل أمتى ؟​

/ هما جابوك ع الضهرية ...يعنى إما النهاردة الصبح أو أمبارح بالليل
* يكونش جه فى حادثة ؟​

+ وهتفرق فى أية ؟ أهو متلقح وسطينا وخلاص
- طاب ياللا قرب ع الأكل ...مد أيدك ماتتكسفش انت فى وسط عيلتك ​

= مش أنت خال أبويا اللى مات فى مظاهرات 1919 ؟​

وأجتمعت شلة الأموات حوالين الطبلية ...وهات يا أكل
بصراحة كنت جعان أوى ...شكلى ما كلتش حاجة من أمبارح ...​

يُتبع ​

 

[عبود عبده عبود]

الحساب​

أنتهينا م الأكل وتمام التمام ...
مش عارف ان كان دة فطار والا غدا والا عشا
ما علينا ....هتفرق فى اية يعنى ؟​

وبعديها دار بينا طقم الشاى
تذكرت حاجة مهمة أوى ...
فسألت اللى جنب منى بصوت هامس خفيض​

= والحساب ؟
- مافيش حساب ...الشاى والسكر هنا ببلاش​

= لأ مقصدتش... فين ناكر ونكير ؟
- لامؤاخذة مافيش حد هنا بالأسم دة ..!!
= متأكد ؟!​

- أنا مدفون أهوه داخل على ميت سنة .. مافيش ميت هنا بالأسم دة
* ولا أنا حتى سمعت بالأسم دة فى التُرب اللى حوالينا !!​

= طب فيه هنا تعابين ؟
- جرى أية يا اخينا ...التعابين هتيجى هنا تهبب أية ؟
* هتقرصنا نموت يعنى ؟ ...ما أحنا متنيلين خلقة​

/ يكونش قصدك ملايكة الحساب ؟
= أيوة أيوة .... فين بقى الثُعبان الأقرع ؟​

هههههههههههههههههههههههههههههههههههههه​

مش عارف اية اللى قولته خلاهم يضحكوا أوى كدة !!​

- آآآآآآآآآآآه تقصد عذاب القبر يعنى ؟
= أية ؟ ....مافيش ؟!!!​

+ يابن الكئيبة شايف حد مننا هنا بيتعذب ؟
* ولا حد بينضرب على قفاه ويغوص فى الأرض ؟
+ أو شفت حد حط السيخ المحمى فـــــــــــــــــ ...
- صرصور ودنك ولا مؤاخذة ؟​

/ الجدع لسة مُحدث موت يا رجالة فهموه بالراحة
* بُص يا آبا ...هنا عيشة زى اللى فوق بالظبط ما هى عيشة ...
/ بس الفرق أن العيشة اللى فوق مهببة
* ومتنيلة بستين نيلة​

+ تتجوز مَرّة تقرفك فى عيشتك ...
- أو مدير فى الشغل يطلع حباب عنيك
/ أو تعيا بعيا بطال تصرف اللى حوشته فى عمرك ع الدكاترة والأدوية​

+ هنا بقى مافيش الكلام دة
= والحساب ؟​

هههههههههههههههههههههههههههههههههههههه
- دة مُصمم يدفع !!!​

* يا آبا هنا مافيش غير.... أكل وشرب ونوم ورغى​

يُتبع​

 

[عبود عبده عبود]

الفُُسحة​

عرفت ان التُرب ماشية على نظام مايخرش المية ...
بس الكل سعيد ومبسوط ...!!!
ودة اللى مجننى ...!!!​

والتُربة هنا عبارة عن حوش كبير حوالين منه سور كالح اللون
ومتوزع فيه التُرب ...حوالى خمستاشر أو عشرين تُربة
وكل تُربة فيها أموات ياما ...​

الأكل بيجى لنا لغاااااااية عندنا ...بيتولى أقدم " ميت " أحضاره
منين ؟؟!!
معرفش .. ومسألتش ...
الشاى والدخان ما بيتقطعوش من عندنا ..!!!
حتى اللى كان ما بيدخنش فى الدنيا ...أصبح بيدخن هنا ...
عادى هيخاف على أية ؟
على صحته ؟ وألا على فلوسه ؟​

فُسحة الأموات بتبقى على فترتين تتخللهم فترة نوم القيلولة ...
تتفتح المقابر والكل يخرج للتريض ..!!!
اللى يلعب كورة ...واللى يلعب بينج بونج ...اللى يقرا الجورنال
اللى يقعد مّفنس فى الشمس عند ركنة السور ...​

لكن اللى لفت نظرى أن فيه أحياء ساكنين معانا فى حوش المقابر
بس هما مش شايفنا ولا حاسين بينا كمان
لكن أحنا شايفينهم ...وصعبانين علينا جداً ...
عيشة سودة بعيد عن السامعين​

علشان كدة أوعوا تصدقوا ان فيه عفاريت بتطلع للناس فى المقابر
دة شغل روايات رُعب وأمور سيما عبيطة
بالعكس ... دة لو بأيدينا نساعدهم كنا ساعدناهم​

أنا عن نفسى حبيت أساعد " الموزة " اللى خرجت تنشر الغسيل دى
مش علشان لا سمح الله الجلابية ملزوقة على جسمها بمية الغسيل أوم صابون
ولا حتى عشان الجلابية بحمالات وع اللحم ولا تسترشى ...لالالالالا​

حاشا لله ...كل ما فى الأمر أنها صعبت عليا من المجهود " الفظيع " اللى بتعمله
ياولداه تُحط طشت الغسيل تحت منها ع الأرض ..
و " توطى " تجيب حتة وتنشرها
" توطى " وتُنشر ... " توطى " وتُنشر ...​

وواخدة راحتها ع الآلآلآلآخررر
إكمنها لوحدها فى الحوش ولا فيه جنس مخلوق حوالين منها​

لكن قطع عليا رغبتى فى مساعدتها حضور خال أبويا​

- بتبحلق فى أية يا زميلى ؟
= الولية دى صعبانة عليا أوى
- مين ؟ ..." سوسو مشابك " ؟​

يُتبع​