وهيجي يوم ..

[اثناسيوس الرسول]

وهيجي يوم ..

بقلم: دكتور/ ياسر يوسف غبريال

وهيجي يوم
ننسى الخوف
ونستهجى من جديد الحروف..
نمسك قلم ..
نشطب كلمة الم ..
ونرسم حنطة على مرمى الشوف ..
هيجي يوم ..

وهيجي يوم ..
بريحة شهيد ..
مولود الفجر من صرخته ..
والحق العتيد ..
بلون الدم ..
وبياض جبهته ..
هيجي يوم ..

وهيجي يوم
يغسل المطر الوشوش..
ويمحى كل الرتوش ..
ويهب ريح
بقوة يزيح
عن القلوب
غبار البعد ..
هيجي يوم ..

وهيجي يوم
مزروع بالدموع ..
وجلدات يسوع ..
وصوت الحق
اللي اندلع بين الضلوع
وانفرد
جناحات وقلوع ..
وضوء شموع ..
وحضن كبير
يضم الجموع ..
هيجي يوم ..

وهيجي يوم
مولود من أحزاننا ..
وليل أيامنا ..
وألمنا ..
وإيماننا .. اللى صار
جذوة نار..
وياجليات يا جبار ..
داود مستني نهار
يهزمك بأيديه الصغار ..
هيجي يوم ..


و هيجي يوم
مسكون بالمحبة الأولى
واحساس الصدق ..
اللي كان في البدء
دفا وضل ..
واللي ضل
لابد يرجع يوم ..
هيجي يوم ..

و هيجي يوم ..
وليه ما يجيش؟؟
طول ما الحق في القلوب بيعيش
وهيعيش..
ويهزم لسان غاش ..
يهدم ولا يبنيش..
دا الحق زى البرق ..
ما ينحنيش ..
هيجي يوم

و هيجي يوم ..
يرتاح فيه الرب..
يكون يوبيل للشعب ..
و نصالح نفسنا
قبل ما نصالح بعض ..
ويحس البشر بنبض البشر ..
والحجارة اللي مكان القلب
تتبدل ثمر ..
هيجي يوم ..


الرب معكم ويبارك تعب محبتكم
صلوا لاجلى

 

[ميرنا]

رد على: وهيجي يوم ..

امتى يجى اليوم ده ؟​

 

[فادية]

رد على: وهيجي يوم ..

الله على الكلمات الجميله
شكرا عزيزي استيفانوس على النقله الحلوة
ربنا يبارك حياتك​

 

[sparrow]

رد على: وهيجي يوم ..

جميل
شكرا ليك