افضل واسوأ فيلم عربى واجنبى (نقد افلام)

[Desert Rose]

طيب من افضل الافلام اللى مقدرش انساها وهو فيلم رومانسى على كوميدى هو فيلم you have got mail لتوم هانكس وميج رايان انا بحب اداء ميج رايان لانو بسيط وطفولى وتلقائى
الفيلم بيجمع بين تناقضات الحب والكره لنفس الشخص فى نفس الوقت
احلى مشهد لما اتقابلت ميج ( اللى هى كاثرين كيلى فى الفيلم ( مع توم هانكس ( جو فوكس فى الفيلم ) فى مطعم وهى مكانتش تعرف ان هو ده الشخص اللى بتحبو وبتكلمو على الانترنت فابتدت تبهدل وتزعق فيه المشهد ده بيخلينى اعيط :new8:

 

[sha2awet 2alam]

مبدئيا انا مسطولة فوارد جدًا انسى و لو افتكرت حاجة ممكن ارجع تانى ..

العربى .. فيلم ألف مبروك بتاع حلمى كان عالى اوى اوى ... حسسنى اد ايه نظرتنا السطحية ممكن تأذى الناس .. يمكن من اكتر الافلام اللى خلتنى محكمش على حد من المظاهر و اللى بشوفه .

فيلم حب البنات برضه بحبه اوى ظريف و خفيف و فيه مقولة ان كل المشاكل تتعلق بالحب صح جدًا .. و مش شرط الحب العاطفى الحب الابوى حب المال حب الحياة الحب بمعناه الاعظم هو المشكلة الاساسية فى حياتنا كلنا .

انا اسفة بس فيلم الكباريه كمان معناه قوى جدًا و اسفة لو مناظره بتخدش الحياء بس اللى جواه حياة انسانية رهيبة ... اللى باع نفسه و اللى رفض و اللى عايش بشرف وسط كل الخطايا و اللى باعت بنتها و المدعى التدين و الجاهل و الغنى و كل التناقضات البشرية تقريبا اتجمعت فى فيلم واحد .

فيلم حين ميسرة برضه .. بيبين قسوة الحياة و القدر فى ابداع فنى رهيب .. ازاى الشهوة تنتج موت بحد .. اتولد طفل و اترمى فى الشارع و الطفل كبر و زنا و جاب طفل سلالة كاملة ناتجة من غلطة .. و كمان بيورينا طبقة من الناس كنت بشوفهم و عمرى ما تخيلت ابعادهم النفسية و الحياتية بصراحة

الهابط متعدش بقا .. مفيش اكتر منه فعلا

دول العربى ... هبقى ارجع تانى اقول الاجنبى باذن ربنا

 

[إيمليــآ]

,.

أممم
هبدأ بآلعربى


فيلم لسهـ شيفآهـ إمبآرح
" أوقآت فرآغ "
مع إنهـ بطولة مجموعة من آلشبآب آلجدآد
لكن فعلاً بيعرض صورة وآقعية جداً عن وضعنآ وتفكير شريحة كبيرهـ مننآ
عجبنى جداً مشهد آلنهآية وتعلقهم بين آلسمآ وآلأرض مع كلمآت أغنية آلمبدع .. آلأبنودى
" بنلف فى دوآير "

&

فيلم
" ألف مبروكـ "

آلفيلم دآ عبقرى
مع إن فكرة آلحلم آلمتكرر فكرة أجنبية أصلاً
لكن نقطة " آلإنسآن آلمنغلق على ذآتهـ ومش بيفكر يبص مرهـ من منظور غيرهـ ويتفهم تصرفآتهم "
عجبتنى جداً ..



.،​

 

[Twin]

فيلم افريكانو
انا بعتبره من افضل الأفلام العاطفية على الطلاق (على مستوى الافلام المصرية)
منى ذكى _كالعادة_مبدعة !
احمد السقا ادائه كان عالى (مع ان تمثيله فى الادوار العاطفية تعبان) لكن يبدو وكأن منى ذكى علت ادائه
المشهد اللى بينط فيه من الشلال وهو بيقول بحبك كان مؤثر جدا , لدرجة انى فضلت كذا مرة (اقشعر) لما اتفرج على المشهد ده (ودى حالة نادرة بالنسبة لى)
مشهد غيرة منى ذكى وازاى واقفة قدام المرايا بتقيس طقمة وفساتين وبتفكرتظهر قمة انوثتها لأنه اتهمها انه مسترجلة , وفى الآخر تقرر تعاند وتبقى على طبيعتها كان ممتع جدا , جسدت الإنوثة بكل ملامحها
الفيلم ممتع جدا بكل تفاصيله على المستوى العاطفى , الأكشن كان محبوك برضو , لكن الاداء العاطفى كان هو ميزة الفيلم

والأجمل في الفيلم ... انه أتصور عندنا هنا :smile01​

 

[the shepherd]

the fight club
اعتقد المعظم عارف الفيلم بس للي مش عارفة , الفيلم اكثر من رائع و مختلف .
عندما تكره نفسك , عندما تكره ضعفك و عجزك , الي اين ستهرب ؟؟ هل ستقاتل من اجل نفسك ام ستستعين بمن يقاتل من اجلك ؟
فيلم بجد من الافلام العميقة الهادفة جداً ​

 

[sha2awet 2alam]

الاجنبى بقا

brave heart
كان اول فيلم اجنبى يأثر فيا كدة و اول مرة اعيط قدام فيلم .. الغزل الرقيق فى حبيبته فى اول الفيلم و مشهد خوفه عليه و هو بيهربها من أيد الراجل اللى عايز يغتصبها حسيت يعنى ايه حد يحب حد بجد .. و اما مراته اتدبحت قصاده و هو واقف و نظرته ليها تقطع القلب فعلا .. ميل جيبسون مالهوش حل فعلا .. ثورته على الطغاة و انتقامه لدم زوجته و نظرة ارتياحه بعد ما اخد بتارها .. و فى اخر الفيلم تعذيبه و هو بيطلب الحرية فكرنى بفكرة الخلاص و قوة عزيمته هزتنى اوى اوى

باختصار أول مرة اعرف معنى راجل يحب بجد كانت فى الفيلم دة .

city of angels

الفيلم بيحكى قصة حب ملاك لانسانة ... و ان الملايكة من حقهم اختيار السقوط فيبقو بشر زينا .. عشقه ليها و متابعته و محاولته انه يساعدها فى اى حاجة و يخفف عنها ألمها بعد ما مريض مات منها فى أوضة الجراحة و هو نفسه يقولها انه مش ذنبك .. و بعدين مشهد و هو بيتمنى يكون عندنا حاسة اللمس زينا و حاسة الشم عشان يلمسها و يشمها و يحسها و مش قادر حسستنى ان حواسنا نعمة كبيرة اوى .. و قراره بالسقوط من اجلها عشان يعيش معاها و يضحى بأبديته كملاك و يبقى انسان فانى عشان بيحب انسانة اعظم تضحية على وجه الارض و ان كانت خيالية بس بتحسس اد ايه الحب عظيم و يستاهل التضحية .. و فى اخر الفيلم موتها و زعله الرهيب و بكاه عليها كان قاتل كنت بعيط معاه .. و اخر مشهد اما قال انه مش ندمان انه سقط من اجلها و لو ليوم واحد بس حسها فيه .. الفيلم كله مالهوش حل
نيكولاس كيدج كان اكتر من عبقرى حسيته ملاك بجد و حسيت بحبه و حسيت بفرحه بكونه انسان وصلى كل المشاعر بروعة

و فيلم you `ve got mail هما اتكلمو عنه و من اروع الافلام اللى شوفتها برضه

فيه سلسلة افلام twilight انا تابعتها و كانت حلوة اوى و ان كانت لا ترتقى لمستوى الافلام التانية بس احلى سلسلة افلام شوفتها بصراحة .. ازاى واحدة بتحب اتنين فى نفس الوقت و مع ذلك الافضلية لواحد و ازاى واحد فيهم قابل انه يكون التانى و مبيبعدش ... بالرغم انه عارف انه بتحب غيره .. انتاجه كان رائع و التصوير و االاماكن اللى اتصور فيها خلابة بجد يمكن الشغل كله كان فى التصوير و الخدع و الاماكن اكتر من انه فى الاداء نفسه

لو افتكرت حاجة تانية هاجى اقولها

 

[إيمليــآ]

,.

فيلم " Cast away "

فى نظرى هو أروع أدوآر توم هآنكس

بيحكى قصة رجل نآجح وعملى بمقآييس آلعصر
أتعرض لحآدث طيآرهـ فوجد نفسهـ وحيد فى جزيرهـ نآئية وسط آلبحر
وإزآى قضى آلفترهـ دى بشكل بدآئى وفطرى لدرجة إنهـ فقد زيفهـ ورؤيتهـ آلمسطحة للحيآهـ
وبرجوعهـ للوآقع بعد 4 سنين لقى نفسهـ غريب عن عآلم أكثر غربة
ويحن لدمية بسيطة صنعهآ فى آلجزيرهـ .. كآنت هى رفيقة وحدتهـ
لإنهـ وجدهآ آلأكثر حقيقة وتفهماً مقآرنة مع آلعآلم آلبشرى ..!



.،​

 

[Twin]

الأسبوع ال فات في الويك أند أنا أتفرجت ع الفيلم ده سينما "Mad Buddies"
فيلم في إطار كوميدي وهو طبعاً فيلم جنوب أفريقي لليون شوستير

وممكن تقرا عن الفيلم هنا ​

 

[the shepherd]

هو انا كان عندي تعقيب صغير علي طريقة مشاركتنا كلنا

لما بتيجي تقري نقد فيلم بيكونوا موضحين في بداية هل يحتوي spoiler و لا لا
و معناها هل النقد و تعليق العضو بيحرق قصة الفيلم و لا بيتكلم علي مجرد مستوي الممثلين
و المشاعر و الاداء و قصة عامة لا تمت للتفاصيل و الاحداث و الحبكة الدرامية بصلة .
لان بببساطة في ناس " زيي انا " لو عرفت قصة الفيلم او حد حرقلي اي نقطة مهمة فيه مبقدش اتفرج عليه ,
بفقد اهتمامي و رغبتي في اني اشوف حاجة انا عارف احداثها بغض النظر هو يستاهل المشاهدة ولا لا .
و انا مش بقو اننا منحرقش او نتكلم عن مضمون الافلام ,
لا طبعاً من حقك تعلق علي الفيلم باي طريقة تعجبك سواء ب " سبويلر " او من غير .
بس يا ريت في البداية نوضح هل نقدنا يحتوي علي اي معلومات هتحرق الفيلم و لا لا
علشان لو انا مش حابب احرقه بكل بساطة هقرء اسم الفيلم و هكتفي بكدة
و احاول اشوف من مصدر تاني يستاهل ان اشوفه و لا لا من دون ما احرق احداثه لو قريت تعليق العضو .

دة مجرد رايي شخصي مش اكتر ​

 

[Critic]

فيلم anger management

اتفرجت على الفيلم ده بتاع 3-4 مرات من روعته
دايما بقدر الأفلام اللى فيها بُعد نفسى
الفيلم بيناقش (فى اطار كوميدى) مشاكل عديدة زى "عدم الثقة بالنفس - استصغرار النفس - كبت الغضب- الحدود - تأثير جراح الطفولة على الحاضر -....)
وازاى ده بيأثر سلباً على علاقاتك الاجتماعية والعاطفية
هتنسجم وهتضحك من قلبك وهتتغاظ منه وهتحب رومانسيته وهتطور فكرك , خليط حلو جدا نادرا ما بيجتمع فى فيلم واحد

 

[Desert Rose]

نكمل فى الاجنبى
فيلم Analyze that لروبرت دينيرو ( انا من عشاقو ) الفيلم كوميدى خفيف اداء دى نيرو فيه اكتر من رائع
فيلم Meet the parents لدى نيرو بردو الفيلم كوميدى جميل ورغم ان دى نيرو ميبانش انو ممثل كوميدى لكن ادائو كان hilarious

فيلم تانى هو صعب شوية بردو لدى نيرو الفيلم نفسى جدا اسمو Hide and Seek الفيلم نفسى وفيه غموض جميل

 

[Desert Rose]

فيلم بقى حبيت احطو لوحدو خالص لانو يستحق الفيلم اسمو crash الفيلم ده شوفتو يجى 100 مرة ومستعدة اشوفو تانى الفيلم بيتكلم عن العنصرية بشكل عام وان كل البشر عنصريين بطبيعتهم وان العنصرية دايرة بتلف علينا كلنا الفيلم الشخصيات اللى فيه متداخلة بشكل رهيب بحي ان الفيلم تحسو انو دايرة بتلف بحيث كل الشخصيات ليها علاقة ببعض وبتأثر فى بعض
الفيلم معمول بعبقرية شديدة
المشهد ال epic اللى فيه اللى مستعدة اشوفو 100 مرة لما الظابط الابيض بينقذ السيدة سمراء اللون فى حادث عربية اتعرضت ليه وهو نفس الظابط اللى كان اضطهدها قبل كده واتحرش بيها لانها سمراء اللون
المشهد قمة فى الانسانية والتعقيد لما هى اتعرفت عليه انو هو اللى اتحرش بيها قبل كده وفى نفس الوقت مش قدمها حل تانى غير ان هو اللى ينقذها وهو بردو عرفها ورغم انو شخص عنصرى الا ان الانسان اللى جواه خلاه ينسى عنصريتو وينقذها

 

[the shepherd]

District 9
هو فيلم خيالي . بس فعلاً الخيال من نوع اخر , خيال مختلف عما تعودنا عليه من تلك النوعية من الافلام
فالسؤال الذي يطرح نفسه : متي تظهر حقيقة الانسان ؟ في عمق ضعفة ام في قمة قوتة ؟
بجد فيلم اكثر من عميق , قصة مشهورة بس بتعرض بطريقة مختلفة . الانسان هو الاقوي تلك المرة , اقوي من الغرباء ,
فكيف يعامل الانسان ضيوفه الاضعف و اللذين في حاجة ؟ كيف يتعامل الانسان مع كل ما هو مختلف عنه ؟
بجد فيلم يستحق المشاهدة​

 

[إيمليــآ]

,.

" What Women Want "

فيلم لآيت كوميدى مميز لـ ميل جيبسون , هيلين هنت

بيدور حول فكرة إن آلمرأهـ بتبآن كآئن معقد جداً .. ومتطلبآتهآ صعبة
مع إن آلحقيقة إنهآ محتآجة بس إللى " يحآول يفهمهآ ويتفهمهآ "



.،​

 

[grges monir]

فية نجم امريكى افلامة رائعة وهو عبقرى
اشاهد افلامة بدون تردد لانى متاكد انها تحفة فنية
Denzel Washington

 

[Desert Rose]

جرجس دينزل واشنطون اموت فيه وفى ادائو

فيه فيلم تانى اسمو the devil wears Prada الفيلم فكرتو حلوة هو المفروض كوميدى بس الحاجة الحلوة اللى فيه هى ميريل ستريب وادائها المميز she was really devilish

 

[lo siento_mucho]

افضل افلام , او اعلى مستوى , او اكتر الأفلام اللى اتأثرت بيها

افريكانو ,سهر الليالى , تيمور وشفيقة , ظرف طارق,

​

فيلم ظرف طارئ...فيلم تحفة بحب دور أحمد حلمي في الرومانسية و مشهد لما بتعرف الحقيقة و مشهد لما بيتصل بالبرنامج مشاهد مؤثرة،،الراجل ده ممثل كبير

فلم أنت عمري فيلم جميل أوي بيعلمك تتمسك بحلمك ف لحظات قاسية جدا..زائد مشاعر الحب الصادقة سواء من الزوجة أو الإنسانة التانية

لكن الزوجة بتصعب..أكتر

و كمان فيلم عن العشق والهوى فيلم جميل و مختلف شوية....

في أفلام جميلة و جريئة لكن من كتر جرأتها مش بحب أشوفها و بصنفها أفلام دون المستوى

بالنسبة لي أفلام إلي مش تستحق المشاهدة و ندمت إني تابعتها.... هي أفلام

اللمبي ..من الأفلام الهابطة دون أي فائدة تطلع منها من الفيلم أفلام

اللمبي ..من الأفلام الهابطة دون أي فائدة تطلع منها من الفيلم

شفت فيلم مش فاكرة إسمو لكن كان جميل عن قصة حب لدرجة الجنون ...لدرجة إن البطل خلص على كل الناس حتى ما يقربو من إلي بيحبها لكن هنا بيصنف مريض طبعا وأنا بشوفه عاشق مجنون هههه

أفلا م هندي في كم فيلم أثر فيا لكن مش بصدقهم ههههههه
​

تحس إن المخرج بيبالغ أوي و بيضيع جمال الفيلم

موضوعك جميل ...شكراا ليك​

 

[grges monir]

جرجس دينزل واشنطون اموت فيه وفى ادائو

فيه فيلم تانى اسمو the devil wears Prada الفيلم فكرتو حلوة هو المفروض كوميدى بس الحاجة الحلوة اللى فيه هى ميريل ستريب وادائها المميز she was really devilish

اة انجل ادائة مميز جدا وافلامة دائما ذات عمق فكرى بالاضافة الى الاثارة

 

[grges monir]

الافلام العربية حاليا اكثر من 90% منها سطحية ومبتذلة
يوجد استثنئات لافلام احمد حلمى والسقا واحيانا كريم عبد العزيز يخرج علينا بفيلم ميلو دراما جيد مثل فيلم واحد من الناس وخارج عن القانون

 

[grges monir]

مشواخدين بالكوا من حاجة
كلة بيتكلم عن الافلام العربى بتاعت اليومين دول
انا شخصيا اشاهد افلام هذة الفترة مرة واحدة فقط بالكتير مرتين اما الافلام القديمة ( افلام الزمن الجميل) واعتقد الكثيرين يشاركونى الرأى اذا عرضت عشر مرات سوف نشاهدها لما فيها من اداء تمثيلى خرافى وقصة جميلة سواء كان الفيلم كوميدى او تراجيدى