عيال كئيبة ..!!

[sha2awet 2alam]

انتو هتجبولى وعكه صحيه و و هتجننونى خلااااص
اكتب الكلمه زى ما بنتقها تقولوا ليى إيه دى " شئاوه"مش بتتكتب كدا لاذم تكتبيها كدا "شقاوه"! مع إن لما بنقولها مش بنقولها بالقاف--

بعد الشر يا قمر .. انشالله العيال الوحشة و انتى لأة ... تقولى شقاوة تقولى شئاوة .. اللى يعجبك اقولك انتى قولى حرف ال ش بس و انا هفهم انه عليا :blush2:

فكرتينى بموقف حصل فى الثانوية العامة .. مبدئيًا بدون تريقة انا كنت طالبة ملتزمة جدًا و بيتضرب بيا المثل فى الهدوء و الصمت ( و للعلم ولازالت مبتكلمش كتير ) و نظرًا لانى كنت الاولى على المدرسة فكان ليا معاملة خاصة انا و فريقى ( فريق اوائل الطلبة ) كل يوم نروح على المدرسة براحتنا بعد الطابور ندخل على الفصل نقول اننا جينا بس و نطلع على المكتبة نقضى اليوم هناك :t33: .. و يجيلنا من كل مادة مدرس أول فيها ..يقعد معانا ربع ساعة بالظبط يدينا تمارين و اسئلة و خلاص كدة باقى اليوم نذاكر ماشى نحل واجبات الدروس نعمل اى حاجة .. ذات يوم قاعدين فى امانة الله فى المكتبة و انا قاعدة اقرا لصلاح جاهين و واحدة قاعدة تسمع أغانى و 2 قاعدين يرغو و 2 بيذاكرو .. دخلت مدرسة فريق الخطابة .. ست منفووووووووووووخة معاها فريق ضايع أصلا ميعرفوش الفرق بين الالف و كوز الدرة و بتطلب مننا نسيب المكتبة عشان هتعمل اجتماع لفريقها .. فانا قولتلها ان دة مكاننا و مالناش مكان تانى نقعد فيه بعد ما بصتلى بصة مش تمام وافقت اننا نقعد على جنب ( على اعتبار انها المكتبة اللى ورثهالها دادى ) و بدأت بجدية رهيبة تقول " انهاردة يا جماعة عايزين نناقش قضية من القواضى المهمة " انا ابتسمت بهدوء بس الفضيحة اللى جنبى ضحكت .. طبعًا اتطردنا عشان بنضحك و بنشتت تركيزها المعدوم بالفطرة .. و انا طالعة من الباب قفلته و بعدين فتحته تانى قولتلها " على فكرة حضرتك جمع قضية قضايا مش قواضى عشان منتفضحش بس " ... الفريقين ماتو من الضحك عليها و من يومها لاخر ما خلصت ثانوية عامة المدرسة دى تشوفنى تبقى عايزة تولع فيا :t33:

 

[عبود عبده عبود]

انتو هتجبولى وعكه صحيه و و هتجننونى خلااااص
قولت اكتب" إبره" بالقاف علشان متقولوش لا مش بتتكتب كدا--
من النهرده هرجع زى زمان و اكتب "اقول=ائول"
بس خلاص

خبيب القلب بتاع الأنا أنتا أكتبتوا اللى نِفسك فيه ..
إيخنا اللى موس بنعرف أئرا خبيبى
دة أنا بادور على مشاركتك علشان أقراها مخصوص ..
صلحتى حزام العربية ؟؟؟:t33:

 

[عبود عبده عبود]

انا كنت طالبة ملتزمة جدًا و بيتضرب بيا المثل فى الهدوء و الصمت :t33:

نعمممممممممممممم ؟؟؟؟؟؟؟؟؟؟؟؟؟؟؟؟؟؟؟؟
هدوء ..و أية ؟؟؟؟؟؟؟؟؟؟؟؟؟؟
إحياة النبى " صحيح " ياشيخة تكتبيها تانى كدة علشان مش واخد بالى
تقصدى فعلاً ( الصمت ) ؟؟؟
الصمت بتاعنا دة يعنى المُتعارف عليه ؟:2:

 

[sha2awet 2alam]

نعمممممممممممممم ؟؟؟؟؟؟؟؟؟؟؟؟؟؟؟؟؟؟؟؟
هدوء ..و أية ؟؟؟؟؟؟؟؟؟؟؟؟؟؟
إحياة النبى " صحيح " ياشيخة تكتبيها تانى كدة علشان مش واخد بالى
تقصدى فعلاً ( الصمت ) ؟؟؟
الصمت بتاعنا دة يعنى المُتعارف عليه ؟:2:

نعم الله عليك

ايوة الصمت بتاعنا دة اللى هو مسمعش نفسك :spor22:.. مقصدش حضرتك طبعًا انا بوضح الكلمة مش اكتر :beee:

 

[عبود عبده عبود]

نعم الله عليك

ايوة الصمت بتاعنا دة اللى هو مسمعش نفسك :spor22:.. مقصدش حضرتك طبعًا انا بوضح الكلمة مش اكتر :beee:

وبينضرب بيكى المثل كمان ؟؟؟:t33:
دة المثل ياعينى أتهرى ضرب لدرجة أنه فلسع منك :t33:

 

[sha2awet 2alam]

وبينضرب بيكى المثل كمان ؟؟؟:t33:
دة المثل ياعينى أتهرى ضرب لدرجة أنه فلسع منك :t33:

طب ماتكسب فيا ثواب و تجرى وراه يمكن تلحقهولى :t33:

 

[بايبل333]

مش عارف لية مش لاقى حاجة فى حياتى اكتبها يمكن لسة صغير سن ولا اى .؟
لو افتكرت هرجعلكم

 

[tamav maria]

طب ماتكسب فيا ثواب و تجرى وراه يمكن تلحقهولى :t33:

ههههههههههههههههههه

 

[حبو اعدائكم]

خبيب القلب بتاع الأنا أنتا أكتبتوا اللى نِفسك فيه ..
إيخنا اللى موس بنعرف أئرا خبيبى
دة أنا بادور على مشاركتك علشان أقراها مخصوص ..
صلحتى حزام العربية ؟؟؟:t33:

ههههههههههه ماشى
لا مصلحتوش :hlp:
بس حاولت احل الموضوع مؤقت-- بقيت اشبكه فى هدومى بمشبك غسيل ههههههههههههههه:dntknw: علشان ميقعدش يدايق رقبتى .

 

[tamav maria]

ههههههههههه ماشى
لا مصلحتوش :hlp:
بس حاولت احل الموضوع مؤقت-- بقيت اشبكه فى هدومى بمشبك غسيل ههههههههههههههه:dntknw: علشان ميقعدش يدايق رقبتى .

ههههههههههههههههه
هو حزام العربيه بيخنقك انتي كمان
صدقيني فكرتك عجبتني
لما اجرب زيك
لحسن دا انا بيني وبين حزام العربيه تاااااااااااااار يابوي هههههههههه
مره البوليس شافني حطاه تحت ذراعي وانا بسوق
وقفني واداني غرامه 180 دولار وحذف 3 نقط من رخصتي هههههههههههههه

 

[oesi no]

سر كأبتى وضغطى العالى اغلب الاوقات ابتدت من وانا صغير ومن قبل ولادتى
من يوم ميلادى اللى اتاخر 3 ايام بسبب ان خالتى تعبانه وماما مرضيتش تولدنى واختها الوحيدة تعبانه
لغاية ما كنت هموت فى بطنها ( كانت تبقى مصلحة والله )
مرورا بتريقة الدكتور على ازاى الطفل ده ايده ورجليه طوال اوى كدة
ومرورا كمان بان ماما كانت مستنيه البنت فلما جيه تالت ولد قالتلهم خدوه مش عاوزه ده شكله عامل كدة ليه ؟؟
طبعا الحاجات دى اتحكتلى هههههههه
لكن بدايه ما افتكره كانت المعامله السيئة من اخواتى ليا والتريقة اغلب الوقت على وعلى طريقة تعبيرى وحركاتى وحبى للكورة وقعدتى قدام التلفزيون ولعب الاتارى الكتير
لغاية تانيه اعدادى ووفاة والدى ابتدى الزن مع تانيه ثانوى هو انت مش هتشتغل بقى يعنى حاول تشتغل احنا بقالنا سنين شغالين وانت مش اشتغلت ولما موصلتش لهندسة بعد تالته ثانوى اكتمل عقد الاكتئاب
لا انا حابب اللى هدرسه ولا حابب نظرة اهلى ليا انك معملتش حاجة مفيدة زيك زى افشل واحد فى العيله مع انك اتصرف عليك كتير فى ظروف مش كويسه وكمان كنت بترفض تشتغل وانت فى الاجازة بحجة ان الاجازة كلها شهرين
لغايه الجامعه والحب الاول وصدمه خطوبة الحبيبة تليها صدمة اعادة السنة لاول مرة فى حياتى قياسا باللى حصل معايا فى البيت من تريقة من الكبير والصغير والقريب والغريب وانا كعادتى التزمت الصمت علشان معملش صدام مع حد
وبعد ما خلصت الجامعه انتظرت تخليص ورق الجيش علشان ابتدى ادور على شغل
فقعدت حوالى 7 8 شهور مستنى وسط سيل من الضغط والهرى والنكت وبقى البيت بالنسبه ليا مصدر نكد لا يوصف كنت انزل الشغل 3 ايام وامشي
يومين وامشي
كنت فى قمة خنقتى لانى مش حابب اللى بشتغله ده
لغايه ما اخدت شهادة الاعفا من الجيش بعد معاناه مع الحكومة ولف ودوران كتير جدا ورا الورق والغلط فى الاسم وانى متاخر سنه وبلاوى كتير اوى هذكرهالكم فى مشاركات تانيه
بعد ما مسكت الورقة فى ايدى كان بالصدفة معاد لانترفيو ليا فى نفس اليوم
ويومها اشتغلت فى معرض باسم شركة كمحاسب اسما مرمطون فعلا
ولكن مع خنقتى وتعبى من الشغل كنت مقرر انى هكمل فى الشغل دة مهما كانت الظروف علشان ارضى انسان عزيز جدا على قلبى
تقبلت تريقة كتير جدا من كل الناس فى الشغل على جهلى بالشغل وعلى انى مش عارف اتعامل مع الناس بالشكل اللائق
لغايه ما اتعلمت وبقيت يعتمد على وبقى ضغط الشغل على اكتر من كل زملائى وعمرى ما اعترضت ولا قولت اه لانى مش عاوز ارجع البيت وانا سايب شغلى علشان اسمع منهم الكلام اللى عشت فى عذاب بسببه مدة كبيرة
لغاية لحظه معينه كان فاض الكيل بي ورفضت اكمل فى شغلى وقولت ادور على شغل غيره
وها انا فى قلب المعاناة من 9 اشهر ومحصلتش على شغل حتى الان
ورجعت تانى اسمع كلام تعنيف وكلام جارح وكلام يرفع الضغط بسبب انى مش شغال حتى لو مطلبتش من حد جنيه اعيش بيه
طبعا انا متاثر دايما بحاجات كتير فى كل تعاملاتى
اول حاجة محبش حد يغلط فى او يتريق لانى بتذكر كل تريقة حصلتلى فى حياتى وبتعصب جا وبنفجر فيه
تانى حاجة انى محبش حد يقولى انت لازم تعمل كذا انا قاهر لكل القوانين البشرية منها والدينية احيانا -اكره كل القوانين والاعراف والعادات والتقاليد -
ثالث حاجة مش كتير بحب اتكلم فلما اتكلم مبحبش حد يقاطعنى ودة كتير بيحصل - اغلب الوقت - فبطلت اتكلم مع اغلب الناس
مش بقدر احكى حاجة عارف ان اسلوبى مش مشوق ولكن من حقى اكمل حكاية فى ذهنى علشان اشرح موقف ليا
وعلشان كدة انا موجود على النت وعلى المنتدى
لان محدش هنا هيقاطعنى وانا بكتب مشاركتى
كانت تلك فضفضة عن ومضات من حياة كلها نكد
نبذة عامه يعنى
ممكن بعد كدة اكلمكم على كل نكد على حد
نكد الطفولة
نكد المدرسة
نكد الحب
نكد الجامعة
نكد الشغل
نكد البيت
وعلشان كدة احنا عيال كئيبة ..!!


​

 

[حبو اعدائكم]

نبذة عامه يعنى
ممكن بعد كدة اكلمكم على كل نكد على حد
نكد الطفولة
نكد المدرسة
نكد الحب
نكد الجامعة
نكد الشغل
نكد البيت
وعلشان كدة احنا عيال كئيبة ..!!

حلوه الفضفضه-- بتريح صدقنى---
و اكيد هتلاقى وسط النكد ده كله اكيد لازم هتلاقى شىء حلو فى النص--
بس المشكله إننا مش بنشوف الحلو-- بنشوف الوحش بس---
و اكيد الكل بيحبك و اكيد إنت غالى عليهم فوق ما تتصور--
و صدقنى ده بيبقى سوء فهم فى التعامل-- يعنى ميقصدوش يزعلوك--
و صدقنى لو مكانوش بيحبوك مكانوش قعدوا يحكولك إنت اتئخرت قد إيه فى بطن ماما علشان اختها---
بس عايزا اقول لك حاجه--- يعنى إنت كنت مئنتخ فى بطن ماما و فرحان و مش عايز تنزل ههههههههههههههههههه اصل لو كنت عايز تنزل هى مكنتش هتقدر تمنعك-- لإن القرار مش قرارها -- غير لو البيبى مئنتخ--
يعنى إنت دماغ يا سيدى قاعد صلطان زمانك فى بطن ماما و مش عايز تنزل للدنيا دى هههههههههه
كمل و طلع الى جواك-- انا مش بقطعك على فكره-- انا بقول لك انا متبعاك

 

[بايبل333]

افتكرت شىء هام جداً وهو أول صدمة فى حياتى أتولدت عادى فى اسرة بسيطة يؤمنون بالمسيح فقط ولا يقشعرون دخلت المدرسة اتعرفت انى بذاكر كويس بتعلم كويس بنجح بنسبة 85 % فى جميع المراحل وجاءت اللحظة التى دخلت فيها الثانوية العامة هنا الصدمة تعرفت على شلة قذرة نهائى لم تعلمنى غير مشاهدة الافلام فقط لا مخدارات ولا يحزنون فى اول سنة "اولى سنة " رسبت فى مادتين الانجليزى والرياضات ونجحت فى الباقى لم اكن اعرف أنها لمسة الهية لكى ابتعد ولكن عقلى غاب ولم يكون فى الوعى نهائى دخلت المرحلة الاولى البتعدت عن الكنيسة والكنيسة ابتعدت عنى والمنزل منذ ادخل من المدرسة اذهب الى المذاكرة اكمنى باخد فلوس مش بجيب فلوس كنت حابب المواد ولكن المواد لم تحبنى وجاءت اللحظة الفارقة رسبت فى جميع المواد ما عدا مادة وكانت ليلة يعلم بيها ربنا والدى ضربنى بسيخ حديد حوالى 8لينة فى جميع ارجاء جسمى وقال لى هتكمل وقلت له لا لن اكمل سوف احول الورق الى دبلوم فقال لا سوف تكمل فكانت رغبتى اوقى فقال فليكن ما تريد فذهب احول الورق وما ادراكم من تحويل الورق زبالة الزبالة اللى موجودة فى مصر روح هناك وتعال هنا واختم لغاية لم انفجرت دخلت الدبلوم نجحت وحصلت على شهادة الدبلوم فلم تكون كافية فبعد ذلك بسنة قلت ساحول الى الثانوية واكمل دون ان يعرف احد فى المنزل بهذا الامر وها السنة دى اكمل فى فى العمل
وسارجع من الاول الى الثانوية دون ان يعرف بعد ماكانت البلد كلها كانت تعلم بذلك كانت صدمات عنيفة ومن شدة الصدمة لا حابب اتكلم وبعد ما خلصت الدبلوم دخلت على التجنيد كنت بعمل الورق فقلت لوالدى سوف اخرج من التجنيد فقالى لا ميكونش مصاحب المشير ومعرفش فقلت مصاحب الهى يتبع للتكملة

 

[بايبل333]

وجاءت اللحظة فقالوا حد عندة حاجة فى جسمة فقلت له نظرى ضعيف ولكن حقيقى نظرى ممتاز وقلت اريد اكشف هل اصلح ام لا فقال تعال يوم الاحد فذهبت باكراً ودخلت فى الطابور كان الطبيب النقيب فى الكشف الطبى عندما يكشف لشخص يقول يا تجلس هنا يا تطلع برة وما ادراكم معنى اطلع بمعنى انت هتلبس وجاء عندى وكشف على فقال افتح عنييك فرفعت الرموش فقال عيناك ضعيفة ارجع الى الطابور ههههههه لسة كان قلبى مرعوب حبتينن
فجاء الدور قالى طيب اقعد قعدت ولم يجد حد امامة فقالى انا زهقت منك تعال افتح عنييك فكتبلى غير لائق فقالى اجلس فرحت كانت الساعة 8 الصبح تخيلوا من 8 الصبح قاعد الى 8 مساء قاعد لغاية لم كنت خلاص هاموت فى نقطة هامة كان فى دكتور قبل هذا قالى عندك اى قلت له النظر فقالى كشفت على عينيك قلت له لا عندك نظارة قلت له اة وكان قصدى على نظارة ابى اسلوب استهبال بقى وقعد يسالنى نظرك ضعيف وخلافة اقول له لا
قالى خلاص الطبيب هيعالجك يا بايبل والكارثة قالوالى تعال بكرة استلم الشهادة الساعة 12 الظهر ونصف قلت مش مشكلة نهائى وجلسنا انا وزملائى وجاء العسكرى قالنا خبر مصيبة ان العميد بيختار عشرة يدخلوا الجيش ركبى سابت وقلبى وقع والادهى كل واحد عندة فتوى بيقولها وكاننى جالس فى مجلس الفتاوى وجاءت اللحظة التى تم اعلان الاسماء والحمد لله طلعت وانا اسير فى الشارع ارنم واسبح وكانوا بينظروا الى الناس بتريقة
وعزمت السنة اللى فاتت انى اقدم الورق على الثانوية فلم انجح لان كانت المصاريف تبلغ حوالى 400 جنية فلم تكون معاى فقلت السنة القادمة باذن الله هجمعهم وادخل وفى الاخر كله للخير والشهر داة هقدم الورق
صلوا من اجلى وانتهت الحدوتة
باى باى

 

[بايبل333]

نسيت حاجة هامة جداً الدكتور اللى قالى انت غير لائق رايت فية صورة المسيح
لاننى ضاعت منى سنتين وكانة بيقول خذ سنتين دون تعب لاننى مازلت احبك
ولن اتركك يا ابنى نهائى لن انساك ابى الحبيب

 

[عبود عبده عبود]

كانت تلك فضفضة عن ومضات من حياة كلها نكد

نبذة عامه يعنى
ممكن بعد كدة اكلمكم على كل نكد على حد
نكد الطفولة
نكد المدرسة
نكد الحب
نكد الجامعة
نكد الشغل
نكد البيت
وعلشان كدة احنا عيال كئيبة ..!!​

لألأ ...كئيبة أية يابنى
ولا كئيبة ولا حاجة ...أنا فقط جالى أنهيار ..مش أكتر :closedeye
بس هقولك على حاجة ؟
بالرغم من أنك كدة يعنى ...الا أنى باحب ادخل مواضيعك وباحب اقرا مشاركاتك لما تدخل مواضيعى
ونعلق سوا ونرغى مع بعض ..
ولو كنت كئيب فعلاً ...كنت هشمك من على بُعد متين ميل :heat:
أستمر ياجو ...أستمر ...كمل علينا ونكد كمان 30:

 

[هيفاء الهاشمي]

اوسي الله يعطيك وظيفه احسن.. بايبل عسى الله يفرج عليك قريبا..

 

[عبود عبده عبود]

اوسي الله يعطيك وظيفه احسن.. بايبل عسى الله يفرج عليك قريبا..

ماتاخديهم وتشحتى بيهم على باب الجامع أحسن ياهيوف ؟

 

[بايبل333]

اوسي الله يعطيك وظيفه احسن.. بايبل عسى الله يفرج عليك قريبا..

اميــــــــــــن
اى وظيفة وخلاص رئيس مجلس ادارة مدير شركة مشرف تنمية مشرف مبيعات رئيس مصلحة رئيس جمعية حاجات هايفة وخلاص مفيش رجل اعمال هنا يتبرع ياخدنى انا والاخ ايسو ناو.؟

 

[عبود عبده عبود]

تعرفت على شلة قذرة نهائى لم تعلمنى غير مشاهدة الافلام فقط لا مخدارات ولا يحزنون

طيب وبالذمة يعنى دة مزاج دة ؟؟؟
الدماغ اللى من غير كيف تستاهل حد السيف
آديك سقطت يا فالح 30: