لاتخف لانى فديتك دعوتك باسمك انت لي
ربنا عايز يقولنا انت خايف من ايه
اذا كنت انا فديتك
معقولة الدم اللى سفكته عشانك هسيبه يروح بلاش
هو انا سفكت دمى ليه ؟
مش عشان بحبك ؟
هو انا لو ماكنتش بحبك
كنت سيبت ملكى ونزلت لمستواك
ويمكن اقل من مستواك
انت لو عديت على زريبة هتسد مناخيرك من الريحة
الزريبة دى انا اتولدت فيها
ومع ذلك كنت مبسوط والملايكة كمان كانت فرحانة علشان رحلة خلاص الانسان بدأت
انا علشانك لفيت على رجلى اعلم بكلام لخلاصك
مش لخلاص التلاميذ والجموع اللى معايا بس
اى كلمة خرجت منى كانت موجها ليك انت
انت بشخصك وباسمك
انتى عندى اهم شئ
لايستهين احد بحداثتك
ماتقولش ربنا هيشوفنى ويرعانى ازاى وسط جموع العالم ده كله
انا عارفك
وعارف اللى فى قلبك
انا عارف عدد شعر راسك
مافيش شعرة بتقع الا بإذنى
اللى يمسك كأنه مس عينى
عمرك شوفت حد يضرب حد فى عينه ويسيبه
عشت ايام صعبة علشانك
استحملت عذاب والالم
من غير ما ارتكب ذنب
انا ماعملتش معجزات عشان اوريك انى ااقدر واقدر
لا كل معجزة عملتها كنت عايز اعلمك حاجة فيها
استحملت صليب ودق مسمار وشوك فى راسى وحربة فى جنبى
انت لو شوكة واحدة لمست طرف صباعك بتصرخ
امال انا اعمل ايه
عايز اقولك انى بعامل كل واحد فى الدنيا دى زى ابن وحيد ليا
شوف الاب لما بيكون عنده ابن وحيد بيحافظ عليه ازاى
فمابالك بقى ابوك السماوى
انا افضل من ابوك الارضى
انا بحبك اكتر منه
دعوتك باسمك
اللللللللللله جميلة اوى دى
دعوتك باسمك
يعنى تشيل اسمك دى من الاية وتحط اسمك انت
دعوتك يا.........
عشان تعرف بس انك مش تايه وسط زحمة
وماتقولش ربنا هيبصلى انا ولا هيبص للراجل اللى بيموت ولا مش عارف ايه
الكل واضح قدامى ومكشوف
انت لى
دى اروع بقى من اللى فاتت
انت لي
يعنى انت ملكي
انت بتاعى انا
لما حد كده يقولك انت بتاعي تحس ان حد ملكك وبيحضنك بذراعه
وبعد كل اللى انا عملتهولك
انت تخطئ وتغضبنى
وروحى جواك تأنبك وتشجعك على الاعتراف
ولما تعترف اقول انا معلش ضعف بشرى
واسامحك
وكل يوم اديك جسدى ودمى
زمان كانت المحرقة بياكلها رئيس الكهنة بس والكهنة
دلوقتى انا اديتلكوا جسدى ودمى
منقول
هو تأمل صغير انا نقلته عن واحد بس بصراحة كلامه عجبني وبالذات لان الايه اللي بني عليها التأمل من اكتر الايات اللي بحبها في الانجيل وخصوصا " انت لي "
بحس انها لخصت الانجيل كله عهد جديد وقديم في كلمتين
لخصت رحلة طويلة مشي فيها يسوع
رحلة بكل اللي فيها من فرح وحزن. الم وسعادة. حب وظلم. وفاء وخيانة
رحله فيها مشاعر كتير جدا
لخصتها من اولها لاخرها في كلمتين
فعلا لما حد بيحب بجد بيحس ان الشخص اللي بيحبه ملكه هو وبس في ناس بتسميها انانية بس انا عن نفسي بسميها قمة العشق
اكيد كلنا شايفين وحاسين العالم اللي بنعيش فيه مش هتلاقي حد يحبك مش يعشقك بجد
يبقي المفروض لما نلاقي حد يعشقنا لازم نحافظ عليه وعلي حبه
لان هو اللي باقي لينا
وطالما مش قادر تسعده علي الاقل مش تكون انت سبب حزنه
سامحوني طولت عليكم في الكلام بس فعلا اية رهيبة
ربنا معاكم